ഡല്ഹി ജന്തര് മന്തറില് വിദ്യാര്ഥികള് നടത്തുന്ന പ്രക്ഷോഭത്തിന് പിന്തുണച്ച് മലയാളം താരങ്ങളും
നീറ്റ്യുജി ചോദ്യപേപ്പര് ചോര്ച്ചയിലും സിബിഎസ്ഇ മൂല്യനിര്ണയത്തിലെ അപാകതകളിലും പ്രതിഷേധിച്ച് ഡല്ഹി ജന്തര് മന്തറില് വിദ്യാര്ഥികള് നടത്തുന്ന പ്രക്ഷോഭത്തിന് പിന്തുണയേറുന്നു. വിദ്യാര്ഥികള്ക്ക് ഐക്യദാര്ഢ്യം പ്രഖ്യാപിച്ചുകൊണ്ട് മലയാളത്തില് നിന്നും ബോളിവുഡില് നിന്നും കൂടുതല് സിനിമാ താരങ്ങള് സോഷ്യല് മീഡിയയിലൂടെ രംഗത്തെത്തി. സിനിമാ താരങ്ങളായ ഇന്ദ്രജിത്ത് സുകുമാരന്, മീനാക്ഷി, കുഞ്ചാക്കോ ബോബന്, സിജു സണ്ണി, റഹ്മാന്, വിനയ് ഫോര്ട്ട്, കാളിദാസ് ജയറാം, നസ്ലിന്, നിഖില വിമല്, ഗ്രേസ് ആന്റണി, ദീപ തോമസ്, ഹാഷിര് തുടങ്ങിയവരാണ് ഇന്ന് പ്രതികരണവുമായി എത്തിയത്. കഴിഞ്ഞ ദിവസം വിസ്മയ മോഹന്ലാല്, ടൊവിനോ തോമസ്, പാര്വതി തിരുവോത്ത്, റിമ കല്ലിങ്കല്, പ്രാചി തെഹ്ലാന്, സംവിധായകന് ആഷിഖ് അബു എന്നിവര് ശക്തമായ പ്രതിഷേധം രേഖപ്പെടുത്തിയിരുന്നു.
വിദ്യാര്ഥികള്ക്ക് നേരെയുണ്ടായ പൊലീസ് നടപടിയെ രൂക്ഷമായ ഭാഷയിലാണ് നടന് ഇന്ദ്രജിത്ത് സുകുമാരന് വിമര്ശിച്ചത്.
''ഇന്ന് ജന്തര് മന്തറില് വിദ്യാര്ഥികളോട് പെരുമാറിയ രീതി തികച്ചും മൃഗീയമായിരുന്നു. അഭിപ്രായവ്യത്യാസങ്ങള് രേഖപ്പെടുത്താനും സമാധാനപരമായി പ്രതിഷേധിക്കാനുമുള്ള അവകാശം ഓരോ പൗരന്റെയും അവകാശമാണ്; അത് സമാധാനപരമായിരിക്കുമ്പോള് ഒരധികാരകേന്ദ്രവും അവരെ നേരിടാന് അക്രമം ഉപയോഗിക്കാന് പാടില്ല. ചോര്ന്ന ചോദ്യപേപ്പര് കാരണം ജീവന് നഷ്ടപ്പെട്ട വിദ്യാര്ഥികള്ക്കും, ഇന്നത്തെ പ്രതിഷേധത്തില് പരുക്കേറ്റവര്ക്കും ഹൃദയം നിറഞ്ഞ സഹതാപം! നിങ്ങളുടെ വേദനയും ആശങ്കകളും എത്രയും വേഗം പരിഹരിക്കപ്പെടേണ്ടതുണ്ട്. ഞാന് നിങ്ങളോടൊപ്പം നില്ക്കുന്നു! അധികാരത്തിലുള്ളവരേക്കാള് ശക്തമാണ് ജനങ്ങളുടെ ശക്തി. ജയ് ഹിന്ദ്..' ഇന്ദ്രജിത് സുകുമാരന് കുറിച്ചു.
സമാധാനത്തിനായുള്ള ആഹ്വാനവുമായാണ് നടന് കുഞ്ചാക്കോ ബോബന് എത്തിയത്. ''സമാധാനം പുലരട്ടെ. നമ്മുടെ ഭാവി തലമുറയെ തകര്ത്തു തരിപ്പണമാക്കരുത്. ജയ് ഹിന്ദ്.'' കുഞ്ചാക്കോ ബോബന്റെ കുറിപ്പ് ഇങ്ങനെ.പോരാടുന്ന വിദ്യാര്ഥികള്ക്ക് പിന്തുണ പ്രഖ്യാപിച്ച് നടന് സിജു സണ്ണിയും രംഗത്തെത്തി.''എന്റെ സുഹൃത്തുക്കള്, എന്റെ സഹോദരങ്ങള്, എന്റെ അച്ഛന്, എന്റെ അമ്മ, എന്റെ മക്കള്... എന്റെ പ്രിയപ്പെട്ടവരുടെ ചോരയില് കുതിര്ന്ന മണ്ണില് നിന്ന് അവര് പോരാടുന്നു. ആയുധങ്ങള് കൊണ്ട് നേരിടുന്ന നിങ്ങളുടെ ഭയത്തെ എല്ലാ ബഹുമാനത്തോടെയും നേരിടും. എന്റെ രാജ്യം, എന്റെ രാജ്യം, എന്റെ രാജ്യം...'''ഒരു ജനാധിപത്യത്തിന്റെ യഥാര്ഥ പരീക്ഷണം പ്രതിഷേധങ്ങളല്ല. മറിച്ച്, അതിനോട് ഭരണകൂടം എങ്ങനെ പ്രതികരിക്കുന്നു എന്നതാണ്.'' നിഖില വിമല് കുറിച്ചതിങ്ങനെയാണ്. എല്ലാ കണ്ണുകളും ജന്തര് മന്തറിലേക്ക് എന്ന പോസ്റ്ററും നിഖില പങ്കുവച്ചിട്ടുണ്ട്.
https://www.facebook.com/Malayalivartha
