ഷൂട്ടിങ് ലോകകപ്പിൽ (ഐഎസ്എസ്എഫ്) ഇന്ത്യക്ക് സുവർണ നേട്ടം. വനിതകളുടെ 25 മീറ്റർ പിസ്റ്റൾ വിഭാ​ഗത്തിൽ ഇന്ത്യയുടെ ഇഷ സിങ് തകർപ്പൻ പ്രകടനത്തോടെ സ്വർണം നേടി. രണ്ട് തവണ ഒളിംപിക് മെഡൽ സ്വന്തമാക്കിയ മനു ഭാക്കർ ഇതേ ഇനത്തിൽ വെങ്കലവും നേടി.

നടന്നുകൊണ്ടിരിക്കുന്ന ലോകകപ്പിൽ ഇന്ത്യയുടെ ആദ്യ സ്വർണമാണിത്.

ഈ വർഷം ആദ്യം ഈയിനത്തിൽ ലോക റെക്കോർഡ് കുറിച്ച താരമായ ഇഷ ലോകകപ്പ് ഫൈനലിലും മികച്ച പ്രകടനം നടത്തി. 50ൽ 40 പോയിന്റുകളും 21കാരിയായ താരം വെടിവച്ചിട്ടു. നേരത്തെ മ്യൂണിക്കിൽ ഈ വർഷം ആദ്യ നടന്ന ലോകകപ്പ് അധ്യായത്തിലാണ് താരം ലോക റെക്കോർഡ് തിരുത്തിയത്. സമാന മികവാണ് ഇത്തവണയും ഹാങ്ഷു ലോകകപ്പ് അധ്യായത്തിലും താരം ആവർത്തിച്ചത്.
അതേസമയം ചൈനയുടെ യുവേയുവേ ഷാങിനാണ് വെള്ളി. താരം 37 പോയിന്റുകൾ നേടി. ഉത്തര കൊറിയൻ താരം ​ഹ്യോൻ ​ഗിയോങ് പാക്കിന്റെ കടുത്ത വെല്ലുവിളി അതിജീവിച്ചാണ് മനു ഭാക്കർ വെങ്കലം കരസ്ഥമാക്കിയത്.