കണ്ണൂരില് പുലിയിറങ്ങി; നാട്ടിലെ പുലികള് മാളത്തിലൊളിച്ചു... മുഖ്യമന്ത്രിയെ കല്ലെറിഞ്ഞ നാട്ടില് രാജ്നാഥ് സിംഗിന് കാവി പരവതാനി; സിബിഐ ഉടന് വരും
മെഷീന് ഗണ്ണേന്തിയ കരിമ്പൂച്ചകളുടേയും സംസ്ഥാന പോലീസിന്റേയും വന് സംഘത്തിന്റെ അകമ്പടിയോടെ കേന്ദ്ര ആഭ്യന്തര മന്ത്രിയും ബിജെപി മുന് ദേശീയ അധ്യക്ഷനുമായ രാജ്നാഥ് സിംഗ് പാര്ട്ടി ഗ്രാമത്തിലൂടെ കതിരൂരിലെത്തി. മുഖ്യമന്ത്രി ഉമ്മന് ചാണ്ടിയെ കല്ലെറിഞ്ഞ നാട്ടില് രാജ്നാഥ് സിംഗിനെതിരെ പ്രതിഷേധിക്കാന് ഒരീച്ചയെ പോലും കണ്ടില്ല. കണ്ടാല് അറിയും. ഇത് കേരള പോലീസല്ല. കരിമ്പൂച്ചകളുടെ തോക്കുകള് തീ തുപ്പും. മാത്രമല്ല ഇപ്പോള് തന്നെ വികൃതമായ സിപിഎമ്മിന്റെ മുഖം ലോകം അറിയും. അതിനാല് തന്നെ യാതൊരു പ്രകോപനവും ഉണ്ടാക്കരുതെന്ന് നേതാക്കന്മാര് അണികളെ പറഞ്ഞു മനസിലാക്കി.
കേരളത്തിന്റെ നാലു ദിക്കുകളില് മാത്രം ഒതുങ്ങി നിന്നിരുന്ന കൊലപാതക രാഷ്ട്രീയത്തിന് അങ്ങനെ ഇപ്പോള് ദേശീയ പ്രാധാന്യം കൈവന്നിരിക്കുന്നു. കാലങ്ങളായി വെട്ടിമരിക്കുമ്പോഴും ഉറ്റവരെ നഷ്ടപ്പെട്ടവരുടെ കണ്ണീര് മാത്രം അവശേഷിപ്പിച്ച് വീണ്ടും പാര്ട്ടി ഭേദമില്ലാതെ കൊലപാതകം അഭംഗുരം തുടര്ന്നു വന്നു. എന്നാല് ടിപി ചന്ദ്രശേഖരന്റൈ കൊലപാതകത്തോടെ കാര്യങ്ങളെല്ലാം കലങ്ങി മറിഞ്ഞു. ആഭ്യന്തര മന്ത്രിയായിരുന്ന തിരുവഞ്ചൂര് രാധാകൃഷ്ണന്റെ തുടക്കത്തിലെ ധീരമായ തീരുമാനം സിപിഎമ്മിനെ പ്രതിക്കൂട്ടിലാക്കി. അങ്ങനെ എല്ലാം ജനങ്ങള് മറന്നു തുടങ്ങിയപ്പോഴാണ് കണ്ണൂരില് വീണ്ടും കൊലപാതക രാഷ്ട്രീയം നടന്നത്. ആര്എസ്എസ് നേതാവ് മനോജിന്റെ കൊലപാതകം ബിജെപി ഭരണകൂടം ഏറ്റെടുത്തതോടെ സിപിഎം വീണ്ടും വെട്ടിലായി.
ടിപിയില് നടക്കാതെപോയ സിബിഐ മനോജിലൂടെ വരുമെന്നായി. ഇതോടെ കണ്ണൂരിലെ സിപിഎമ്മിലെ പ്രമുഖര് കുടുക്കിലാകുമെന്ന് പാര്ട്ടിക്കുള്ളില് തന്നെ അഭ്യൂഹമായി. ഇത് സിപിഎമ്മിന്റെ ദേശീയ രാഷ്ട്രീയത്തെ ബാധിക്കുമെന്നായി. അതിനിടയിലാണ് കേന്ദ്ര ആഭ്യന്തരമന്ത്രി രാജ്നാഥ് സിംഗ് കണ്ണൂരിലെത്തി കൊല്ലപ്പെട്ട മനോജിന്റെ വീട് സന്ദര്ശിച്ചത്. കേസില് സിബിഐ അന്വേഷണം ഉടന് പ്രഖ്യാപിക്കുമെന്നും രാജ്നാഥ് സിംഗ് അറിയിച്ചു.
കേന്ദ്ര ആഭ്യന്തരമന്ത്രിയുടെ കണ്ണൂര് സന്ദര്ശനം ദേശീയ ചാനലുകള് ആഘോഷമാക്കി. രാജ്നാഥ് സിംഗ് വന്നത് ബിജെപിക്കാരെ ഊര്ജസ്വലരാക്കി. അക്രമ രാഷ്ട്രീയം ഉപേക്ഷിച്ച് വോട്ടര്മാരെ വളര്ത്തുക എന്ന തന്ത്രമാണ് ബിജെപി അവലംബിക്കുന്നത്. അങ്ങനെ സമാധാനത്തിന്റെ പാതയിലായിരിക്കുകയാണ് ബിജെപിയും സിപിഎമ്മും. കേന്ദ്രം ഭരിക്കുന്നതിനാല് അക്രമം വെടിയാന് ബിജെപിയും പേരു ദോഷം മാറ്റാന് സിപിഎമ്മും ശ്രമിച്ചു കഴിഞ്ഞു. അതിനാല് കണ്ണൂരില് ഉടന് രക്തം ചീന്തില്ല. സമാധാനം ജയിക്കട്ടെ. കണ്ണൂരില് ഇനിയാരും കരയാതിരിക്കട്ടെ.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
