മാധ്യമങ്ങള്ക്കും യു.ഡി.എഫിനും ബി.ജെ.പിക്കും ജാതിമത ശക്തികള്ക്കും എതിരെ ആഞ്ഞടിച്ച് മുഖ്യമന്ത്രി പിണറായി വിജയന് ; ആത്യന്തിക വിധി പറയുന്നത് ജനങ്ങളാണെന്നും പിണറായി
ജാതിമത കണ്ണികള് ജനത്തെ വേര്തിരിച്ചു നിലനിര്ത്തുന്നതിന്റെ അടിസ്ഥാനത്തില് നടത്തുന്ന വിലപേശലിന് പ്രസക്തിയില്ലെന്ന് തെളിയിക്കുന്നതാണ് ചെങ്ങന്നൂര് ഉപതെരഞ്ഞെടുപ്പ് ഫലമെന്ന് മുഖ്യമന്ത്രി പിണറായി വിജയന്. നന്മയ്ക്കും ക്ഷേമത്തിനും വികസനത്തിനും ഒപ്പമാണ് ജനം. ഇത്തരത്തിലുള്ള പുതിയ രാഷ്ട്രീയ സംസ്ക്കാരം രൂപപ്പെട്ടുവന്നിരിക്കുന്നു ഇടത് മതനിരപേക്ഷ രാഷ്ട്രീയ സംസ്ക്കാരം നാടിന്റെ നന്മയ്ക്ക് വഴിതെളിയിക്കുന്നു. അത് ജനം അംഗീകരിക്കുന്നു. എല്.ഡി.എഫിന് കിട്ടിയ ഭൂരിപക്ഷ വര്ദ്ധനവ് രാഷ്ട്രീയ അടിത്തറയിലെ ശക്തി കൂട്ടി. സര്ക്കാരിന്റെ നയങ്ങള്ക്ക് വര്ദ്ധിച്ച സ്വീകാര്യത ലഭിക്കുന്നു. എല്.ഡി.എഫിനൊപ്പം കഴിഞ്ഞ തവണ ഇല്ലാതിരുന്ന ഒരുവിഭാഗം ജനങ്ങള് ഇത്തവണ ഒപ്പം നിന്നു എന്ന് ചെങ്ങന്നൂര് തെരഞ്ഞെടുപ്പ് ഫലം തെളിയിച്ചു. അവരെ എല്ലാ വിഭാഗം ജനങ്ങള്ക്കൊപ്പം പ്രത്യേകം അഭിനന്ദിക്കുന്നെന്നും മുഖ്യമന്ത്രി പറഞ്ഞു.
ഫാസിസ്റ്റ് സ്വഭാവത്തിലൂടെ രാഷ്ട്രീയലാഭം ഉണ്ടാക്കുന്ന ബി.ജെ.പിയുടെയും എന്.ഡി.എഫിന്റെയും പ്രതിച്ഛായ ജനം അംഗീകരിക്കുന്നില്ല എന്നതിന് തെളിവാണ് ജനവിധി. ന്യൂസ് അവറില് കോട്ട് ഇട്ട് ഇരിക്കുന്ന ആങ്കര് പേഴ്സണ്മാരല്ല ജനമാണ് യഥാര്ത്ഥ വിധികര്ത്താക്കള്. ചെങ്ങന്നൂരില് ജനമാണ് ആത്യന്തികമായി വിധി പ്രസ്താവിച്ചതെന്നും മുഖ്യമന്ത്രി ചൂണ്ടിക്കാട്ടി. പുരോഗമന സമീപനങ്ങളെ നിഷേധിക്കുന്ന കോണ്ഗ്രസിലും യു.ഡി.എഫിലും ജനങ്ങള്ക്കുള്ള വിശ്വാസം തകര്ന്നു. ജന നന്മയും നാടിന്റെ വികസനവും ലക്ഷ്യമാക്കി കൂടുതല് ശക്തമായി മുന്നോട്ട് പോകും. രാഷ്ട്രീയ താല്പര്യത്തിനായി യു.ഡി.എഫ് വികസനത്തിനായി തുരങ്കം വയ്ക്കുന്നു. കഴിഞ്ഞ യു.ഡി.എഫ് സര്ക്കാരിന്റെ കാലത്ത് ദേശീയപാത വിഷയത്തിലടക്കം ഞങ്ങള് സ്വീകരിച്ച നിലപാടാണ് ഇപ്പോഴും സ്വീകരിക്കുന്നതെന്നും അദ്ദേഹം പറഞ്ഞു.
ചില മാധ്യമങ്ങള് ഒറ്റപ്പെട്ട സംഭവങ്ങള് ഉയര്ത്തിക്കാട്ടി സര്ക്കാരിനെതിരെ തിരിയുന്നു. തന്റെ സുരക്ഷയ്ക്ക് 450 പൊലീസുകാര് എന്നുവരെ ഇവര് പ്രചരിപ്പിച്ചു. സര്ക്കാര് അക്രമികള്ക്കൊപ്പമാണെന്ന് ഇവര് പ്രചരിപ്പിക്കുന്നു. സദുദ്ദേശപരമായ വിമര്ശനങ്ങള് ഉള്ക്കൊണ്ട് തിരുത്തും. എന്നാല് അനാവശ്യ വിവാദങ്ങള്ക്ക് മുന്നില് സര്ക്കാര് കീഴടങ്ങില്ല. വ്യാജവാര്ത്തകള്ക്കെതിരായ ജനങ്ങളുടെ വിധി കൂടിയാണ് തെരഞ്ഞെടുപ്പ് ഫലം.ജാതിമത സമവാക്യങ്ങള് ജനം തള്ളിക്കളഞ്ഞു. ഫലം നല്കുന്ന സന്ദേശം യു.ഡി.എഫ് നേതാക്കളും ഉള്ക്കൊള്ളണം. ബി.ജെ.പിക്ക് ദയനീയ തിരിച്ചടിയാണ് ഉണ്ടായത്. ജാതി മത സംഘടനകളുടെ വില പേശല് രാഷ്ട്രീയത്തെ ജനം തള്ളി. കേരളത്തെ കൊലക്കളമാണെന്ന് വരുത്തി തീര്ക്കാനുള്ള ശ്രമങ്ങള്ക്കുള്ള തിരിച്ചടിയാണ് ഈ വിജയമെന്നും പിണറായി പറഞ്ഞു.
https://www.facebook.com/Malayalivartha
