ചെങ്ങന്നൂരില് പ്രതിപക്ഷപാര്ട്ടികള് ഉയര്ത്തിക്കാട്ടിയ ശ്രീജിത്തിന്റെ കസ്റ്റഡി മരണം, കെവിന് കൊലപാതകം, ഷുഹൈബ് വധം, തുടര്ച്ചയായ രാഷ്ട്രീയ കൊലപാതകങ്ങള്, ഓഖി ദുരന്തം കൈകാര്യം ചെയ്യുന്നതിലെ വീഴ്ച, നിത്യോപയോഗ സാധനങ്ങളുടെ വിലക്കയറ്റം; എല്ലാം വിഭലം; ഫലം പിണറായിക്ക് ആശ്വാസമായത് ഇങ്ങനെ
ശ്രീജിത്തിന്റെ കസ്റ്റഡി മരണം, കെവിന് കൊലപാതകം, ഷുഹൈബ് വധം, തുടര്ച്ചയായ രാഷ്ട്രീയ കൊലപാതകങ്ങള്, ഓഖി ദുരന്തം കൈകാര്യം ചെയ്യുന്നതിലെ വീഴ്ച, നിത്യോപയോഗ സാധനങ്ങളുടെ വിലക്കയറ്റം അങ്ങനെ സര്ക്കാരിനെ പ്രതിക്കൂട്ടിലാക്കിയ സംഭവങ്ങള് നിരവധിയായിരുന്നു. ഇതിനെല്ലാം പഴി കേട്ടത് മുഖ്യമന്ത്രി പിണറായി വിജയനും. ജനങ്ങളുടെ ജീവനും സ്വത്തിനും സംരക്ഷണം നല്കേണ്ട പൊലീസുകാര് ജീവനെടുക്കാന് തുടങ്ങിയതോടെ പിണറായി ശരിക്കും പ്രതിരോധത്തിലായിരുന്നു. സര്ക്കാര് അധികാരമേറ്റ ശേഷം നടന്ന രണ്ടു ഉപതെരഞ്ഞെടുപ്പുകള് തോറ്റ എല്ഡിഎഫിന് ഒരു പരാജയം താങ്ങാവുന്നതിലപ്പുറമായിരുന്നു. അതുകൊണ്ടുതന്നെ ചെങ്ങന്നൂര് വിജയം പിണറായി വിജയന് സമ്മാനിച്ച ആശ്വാസം ചെറുതല്ല.
പൊലീസിലെ ഗുണ്ടായിസവും രാഷ്ട്രീയ കൊലപാതകങ്ങളും എണ്ണിയെണ്ണി പറഞ്ഞാണ് ചെങ്ങന്നൂരില് യുഡിഎഫും ബിജെപിയും വോട്ട് തേടിയത്. ശ്രീജിത്ത് കസ്റ്റഡി കൊലപാതകമാണ് സര്ക്കാരിനെ ഏറ്റവുമധികം പ്രതിക്കൂട്ടിലാക്കിയത്. ചെങ്ങന്നൂര് ഉപതെരഞ്ഞെടുപ്പില് ഏറെ ചര്ച്ചയായ വിഷയമായിരുന്നു ഇത്. വീടാക്രമണ കേസില് ആളുമാറി അറസ്റ്റിലായ ശ്രീജിത്ത് എന്ന ചെറുപ്പക്കാരന് കസ്റ്റഡിയില് കൊല്ലപ്പെട്ടപ്പോള് പൊലീസിന്റെ അഴിഞ്ഞാട്ടത്തിനെതിരെ രൂക്ഷമായ വിമര്ശനങ്ങളും പ്രതിഷേധങ്ങളും ഉയര്ന്നു. എന്നാല് പൊലീസിനെ ന്യായീകരിക്കാനായിരുന്നു മുഖ്യമന്ത്രിയുടെ ശ്രമം. ശ്രീജിത്തിന്റെ വീട് സന്ദര്ശിക്കാത്ത മുഖ്യമന്ത്രിയുടെ നടപടിയും വിമര്ശിക്കപ്പെട്ടു.
തെരഞ്ഞെടുപ്പ് ദിവസം ചെങ്ങന്നൂരില് ഏറെ ചര്ച്ചയായ ഒന്നാണ് കെവിന് കൊലക്കേസ്. കെവിനെ അക്രമിസംഘം തട്ടിക്കൊണ്ടുപോയത് സംബന്ധിച്ച് പൊലീസ് സ്റ്റേഷനിലെത്തി പരാതി നല്കിയെങ്കിലും അത് അന്വേഷിക്കാന് തയ്യാറായില്ല. മുഖ്യമന്ത്രിക്ക് സുരക്ഷ ഒരുക്കണമെന്ന കാരണം പറഞ്ഞു കെവിന്റെ ഭാര്യ നീനുവിനെ ഗാന്ധിനഗര് എസ് ഐ മടക്കി അയച്ചു. എന്നാല് തനിക്ക് സുരക്ഷ ഒരുക്കുന്നത് എസ്ഐമാരല്ലെന്നും, പ്രത്യേക ടീം ആണെന്നും പറഞ്ഞ് ആ വിവാദത്തെ ചെറുക്കാനുള്ള മുഖ്യമന്ത്രിയുടെ ശ്രമം പാഴായി. കോട്ടയത്തെ പരിപാടിയില് മുഖ്യമന്ത്രിക്ക് സുരക്ഷ ഒരുക്കാന് ഗാന്ധിനഗര് എസ്ഐയും ഉണ്ടെന്ന് വ്യക്തമായി. ഇതോടെ നിലപാട് മാറ്റിയ മുഖ്യമന്ത്രി കൃത്യവിലോപം നടത്തിയ എസ്ഐയെ പഴിചാരി തലയൂരാന് ശ്രമിച്ചു.
സര്ക്കാര് അധികാരത്തിലേറ്റ ശേഷം കണ്ണൂരില് നടന്ന രാഷ്ട്രീയ കൊലപാതകങ്ങളും സര്ക്കാരിനെതിരെ എതിരാളികള് ആയുധമാക്കി. ഇതില് ഏറ്റവുമധികം ചര്ച്ചയായത് ഷുഹൈബ് വധമായിരുന്നു. കോടതിയില്നിന്ന് വരെ സര്ക്കാരിന് തിരിച്ചടി നേരിടേണ്ടിവന്ന കേസാണിത്. ചെങ്ങന്നൂര് തെരഞ്ഞെടുപ്പില് കോണ്ഗ്രസ് നേതാക്കള് സിപിഎമ്മിനെ വിമര്ശിക്കാന് കൊലപാതക രാഷ്ട്രീയം ഉയര്ത്തിക്കാട്ടി. ഓഖി ദുരന്തവും വിലക്കയറ്റവുമാണ് സര്ക്കാരിനെ പ്രതിരോധത്തിലാക്കിയ മറ്റ് സംഭവങ്ങള്. ഓഖി ദുരന്തം സംബന്ധിച്ച് മുന്നറിയിപ്പ് നല്കുന്നതില് സര്ക്കാര് വരുത്തിയ വീഴ്ചയാണ് ഏറെ വിമര്ശനവിധേയമായത്. കൃത്യമായ മുന്നറിയിപ്പ് നല്കിയിരുന്നെങ്കില് കൂടുതല് മല്സ്യത്തൊഴിലാളികള് അപകടത്തില്പ്പെടില്ലായിരുന്നു. ദുരന്തബാധിതര്ക്ക് യഥാസമയം ദുരിതാശ്വാസ സഹായം എത്തിക്കുന്നതിലും സര്ക്കാര് വീഴ്ച വരുത്തി. ആദിവാസി യുവാവ് മധു ആള്ക്കൂട്ടത്തിന്റെ മര്ദ്ദനമേറ്റ് മരിച്ചതും വിലക്കയറ്റവുമൊക്കെ സര്ക്കാരിനെതിരെ ചെങ്ങന്നൂരില് വലിയ ചര്ച്ചയായിരുന്നു.
സര്ക്കാരിനെതിരായ വിമര്ശനങ്ങള് മിക്കതും മാധ്യമസൃഷ്ടിയെന്ന് വരുത്താനായിരുന്നു മുഖ്യമന്ത്രി പിണറായി വിജയന്റെ ശ്രമം. കഴിഞ്ഞ ദിവസങ്ങളിലായി നടത്തിയ പത്രസമ്മേളനത്തിലും പൊതുയോഗങ്ങളിലും ഇക്കാര്യം എടുത്തുകാട്ടി, മാധ്യമങ്ങള്ക്കെതിരെ കയര്ത്തുസംസാരിക്കുകയായിരുന്നു മുഖ്യമന്ത്രി. ചെങ്ങന്നൂര് ജയം എടുത്തുകാട്ടി, സര്ക്കാര് വിരുദ്ധ വികാരമെന്ന വിമര്ശനത്തിന് മറുപടി പറയാനുള്ള ഊര്ജ്ജം മുഖ്യമന്ത്രിക്ക് ലഭിച്ചുകഴിഞ്ഞു. ആഭ്യന്തരവകുപ്പിന്റെ വീഴ്ചകളെ കുറച്ചുകാലത്തേക്കെങ്കിലും ചെങ്ങന്നൂര് ഉപയോഗിച്ച് പിണറായിക്ക് പ്രതിരോധിക്കാം. ഒരുപക്ഷേ ചെങ്ങന്നൂര് തോറ്റിരുന്നെങ്കില് എതിരാളികളില്നിന്ന് മാത്രമായിരിക്കില്ല, സ്വന്തം പാര്ട്ടിക്കാരില്നിന്നും മുന്നണിക്കകത്തുനിന്നും സമാനതകളില്ലാത്ത ആക്രമണം നേരിടേണ്ടിവരുമായിരുന്നു. അതുകൊണ്ടുതന്നെ ചെങ്ങന്നൂരിലെ ഉജ്ജ്വല വിജയത്തില് ഏറ്റവുമധികം ആശ്വസിക്കുന്നത് പിണറായി വിജയനാണെന്ന കാര്യത്തില് സംശയമില്ല.
https://www.facebook.com/Malayalivartha
