കുടുംബാരോഗ്യ കേന്ദ്രങ്ങളിലും ജില്ലാ ജനറല് ആശുപത്രികളിലും പ്രത്യേക പുകയില വിരുദ്ധ ക്ലിനിക്കുകള് സ്ഥാപിക്കുമെന്ന് ആരോഗ്യമന്ത്രി
സംസ്ഥാന ആരോഗ്യ വകുപ്പ് നടപ്പിലാക്കുന്ന ആര്ദ്രം പദ്ധതിയുലൂടെ കുടുംബാരോഗ്യ കേന്ദ്രങ്ങളിലും ജില്ലാ ജനറല് ആശുപത്രികളിലും പ്രത്യേക പുകയില വിരുദ്ധ ക്ലിനിക്കുകള് ആരംഭിക്കുമെന്ന് ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ . സമീപഭാവിയില് പുകയില വിമുക്ത കേരളം എന്ന സ്വപ്ന സാക്ഷാത്കാരത്തിന്റെ ഒരു ചുവടുവെപ്പായി ഈ പുകയില വിരുദ്ധ ദിനം മാറും. എല്ലാ മെഡിക്കല് കോളേജുകളിലും മിനി ക്യാന്സര് സെന്റര് തുടങ്ങുന്നതാണ്. പുകയില നിരോധനമല്ല പുകയില വര്ജനമാണ് ആദ്യം വേണ്ടത്. ഇതിനായുള്ള പ്രവര്ത്തനങ്ങള് ശക്തിപ്പെടുത്തും. യുവാക്കളും കൗമാരക്കാരും പുകയില വര്ജനത്തിനായി കൂടുതല് ശ്രദ്ധിക്കേണ്ടതാണ്. പുകയില നിരോധനം ഏര്പ്പെടുത്തിയാലുണ്ടാകുന്ന തൊഴിലാളികളുടെ പുനരധിവാസ പ്രശ്നങ്ങള് കൂടെ കണക്കിലെടുക്കേണ്ടതുണ്ട്. ഇതിനെപ്പറ്റി സര്ക്കാര് ഗൗരവമായി ചിന്തിക്കുന്നുണ്ടെന്നും മന്ത്രി പറഞ്ഞു. ലോകപുകയില വിരുദ്ധ ദിനാചരണം സംസ്ഥാനതല ഉദ്ഘാടനം നിര്വഹിച്ച് സംസാരിക്കുകയായിരുന്നു മന്ത്രി. ആരോഗ്യ വകുപ്പിന് കീഴിലുളള എല്ലാ സ്ഥാപനങ്ങളും, ആയുഷിനു കീഴിലുളള സ്ഥാപനങ്ങളും പുകയില വിമുക്തമായി മന്ത്രി പ്രഖ്യാപിച്ചു.
'പുകയിലയും ഹൃദ്രോഗങ്ങളും' എന്നതാണ് ഈ വര്ഷം ലോകാരോഗ്യ സംഘടന നല്കുന്ന സന്ദേശം. ഹൃദയാരോഗ്യം സംരക്ഷിക്കുന്നതിനോടൊപ്പം കുട്ടികളിലെ പുകയില ഉപയോഗ ശീലം പൂര്ണമായും ഒഴിവാക്കാന് ശക്തമായ നടപടികള് സ്വീകരിക്കുന്നതാണ്. ലോകമെമ്പാടും 7 ദശ ലക്ഷം ആള്ക്കാര് പുകയില ഉപയോഗത്താല് മരണപ്പെടുന്നതായും ഇതില് 9 ലക്ഷത്തോളം പേര് നിഷ്ക്രിയ പുകവലി മൂലമാണ് മരണപ്പെടുന്നത് എന്നതും ഗൗരവകരമായ സ്ഥിതി വിശേഷമാണ്. പുകയില അത് ഉപയോഗിക്കുന്നവരെ മാത്രമല്ല ഉപയോഗിക്കുന്നവര്ക്കൊപ്പമുളള സാധാരണ ജനങ്ങളെയും മാരകരോഗത്തിലേക്കും മരണത്തിലേക്കും തളളിവിടുന്നുവെന്നത് ആരോഗ്യ മേഖല ഉത്കണ്ഠതയോടെയാണ് വീക്ഷിക്കുന്നെന്നും മന്ത്രി പറഞ്ഞു.
പ്രമുഖ ക്രിക്കറ്റ് താരം സഞ്ജു വി സാംസണ് പുകയില വിരുദ്ധ പ്രതിജ്ഞ ചൊല്ലിക്കൊടുത്തു. ശ്രീചിത്ര ഡയറക്ടര് ഡോ. ആശ കിഷോര് അധ്യക്ഷയായ ചടങ്ങില് ആരോഗ്യ വകുപ്പ് ഡയറക്ടര് ഇന് ചാര്ജ് ഡോ. വി. ആര് രാജു, അഡീ. ഡയറക്ടര് ഡോ. കെ.ജെ. റീന, പി. വിജയന് ഐ.പി.എസ്., ആര്.സി.സി. ഡയറക്ടര് ഡോ. പോള് സെബാസ്റ്റ്യന്, ഡോ. വിപിന് ഗോപാല്, ഡോ. ജെ സ്വപ്നകുമാരി ഡോ. രാമന് കുട്ടി എന്നിവര് പങ്കെടുത്തു.
https://www.facebook.com/Malayalivartha
