കുമ്മനം രാജശേഖരനെ മിസോറാം ഗവര്ണറായി നിയമിച്ചതിന് പിന്നാലെ പ്രതിഷേധം ശക്തമാകുന്നു; ഗവര്ണറായി സ്ഥാനമേറ്റ കുമ്മനം രാജശേഖരന് മിസോറാം വിട്ട് പോകണമെന്ന ആവശ്യവുമായി പ്രിസം രംഗത്ത്
മിസോറാം ഗവര്ണറായി സ്ഥാനമേറ്റ കുമ്മനം രാജശേഖരന് മിസോറാം വിട്ട് പോകണമെന്ന ആവശ്യവുമായി പ്രിസം (പീപ്പിള്സ് റപ്രസന്റേഷന് ഫോര് ഐഡന്റിറ്റി ആന്റ് സ്റ്റാറ്റസ് ഓഫ് മിസോറാം) രംഗത്തെത്തി. ഇന്നലെ പുറത്തിറങ്ങിയ മിസോറാം പോസ്റ്റ് എന്ന പത്രത്തിന്റെ ആദ്യ പേജിലെ വാര്ത്തയായിരുന്നു ഇത്.
ദ മിസോറാം പോസ്റ്റാണ് ഇക്കാര്യം റിപ്പോര്ട്ട് ചെയ്തിരിക്കുന്നത്. ക്രിസ്ത്യന് ഭൂരിപക്ഷ സംസ്ഥാനത്ത് ഗവര്ണറായി എത്തിയിരിക്കുന്നത് ഹൈന്ദവ തീവ്രവാദിയാണെന്നാണ് അവിടുത്തെ സംഘടനകള് ഉന്നയിക്കുന്ന ആരോപണം. പീപ്പിള്സ് റെപ്രസന്റേഷന് ഫോര് ഐഡന്റിറ്റി ആന്ഡ് സ്റ്റാറ്റസ് ഓഫ് മിസോറാം (പ്രിസം) ആണ് കുമ്മനത്തിന് എതിരായ പ്രതിഷേധങ്ങള്ക്ക് നേതൃത്വം നല്കുന്നത്.
കേരളത്തിലെ മതേതരത്വത്തിന് എതിരായ പ്രവര്ത്തനങ്ങള് നടത്തിയെന്നും 1983ല് നിലക്കലില് നടന്ന ഹിന്ദു-ക്രിസ്ത്യന് കലാപത്തിന്റെ കാരണക്കാരനാണെന്നും പ്രിസം മിസോറാമിലെ 13 പള്ളികളുടെ കൂട്ടായ്മയായ എംകെഎച്ച്സിക്ക് എഴുതിയ കത്തില് ചൂണ്ടിക്കാട്ടി.
ക്രിസ്ത്യാനികള്ക്കെതിരായും ക്രിസ്ത്യന് മിഷണറികള്ക്ക് എതിരായും നിലപാടുകള് എടുത്തിട്ടുള്ള ആളാണ് കുമ്മനമെന്നും കത്തില് ആരോപിക്കുന്നു. കുമ്മനം രാജശേഖരനെ മിസോറാം ഗവര്ണറായി നിയമിച്ചതിന് പിന്നാലെ മിസോറാമുമായി ബന്ധപ്പെട്ട് പ്രവര്ത്തിക്കുന്ന നിരവധി സംഘടനകള് ഇതിനെതിരെ രംഗത്ത് വരികയും രാഷ്ട്രപതി രാംനാഥ് കോവിന്ദിന് നിയമനം റദ്ദാക്കണമെന്ന് ആവശ്യപ്പെട്ട് കത്തെഴുതുകയും ചെയ്തിരുന്നു.
തീവ്ര ഹിന്ദുത്വ നിലപാടുകളുള്ള ആര് എസ് എസുകാരനാണ് കുമ്മനം രാജശേഖരനെന്നും മിസോറാമിലെ ക്രിസ്റ്റ്യന് ജനതയ്ക്ക് ഭീഷണിയാണ് കുമ്മനത്തിന്റെ നിലപാടുകളെന്നുമാണ് പ്രിസം വാര്ത്താക്കുറിപ്പില് വ്യക്തമാക്കിയത്.
ആര്.എസ്.എസിന്റെയും ഹിന്ദു ഐക്യവേദിയുടെയും പ്രവര്ത്തകനായ കുമ്മനം ഗവര്ണറാകുന്നത് മിസോറാമിന് ഭീഷണിയാണെന്നും ഇത് തങ്ങളെ ആശങ്കാകുലരാക്കുന്നവെന്നും പ്രിസം പുറത്തിറക്കിയ പത്രക്കുറിപ്പില് പറയുന്നു. ക്രിസ്ത്യന് ഭൂരിപക്ഷ പ്രദേശമാണ് മിസോറാം. മിസോറാമിന്റെ 18മത് ഗവര്ണറായാണ് കുമ്മനം നിയമിതനായത്.
https://www.facebook.com/Malayalivartha
