ഉമ്മന്ചാണ്ടിയും ചെന്നിത്തലയും അടക്കമുള്ള ഗ്രൂപ്പ് നേതാക്കളെയും അവരുടെ ശിങ്കിടികളെയും വിമര്ശിച്ചും മര്ക്കസ്സുകളിലും മഠങ്ങളിലും അരമനകളിലും കയറിയിറങ്ങുന്നത് അവസാനിപ്പിക്കണമെന്നും അവിടങ്ങളിലുള്ളവര് കാറ്റുള്ളപ്പോള് തൂറ്റുന്നവരാണെന്നും കോണ്ഗ്രസ് മുഖപത്രം
ഉമ്മന്ചാണ്ടിയും രമേശ് ചെന്നിത്തലയും അടക്കമുള്ള ഗ്രൂപ്പ് നേതാക്കള്ക്കെതിരെ ആഞ്ഞടിച്ച് കോണ്ഗ്രസ് മുഖപത്രമായ വീക്ഷണം. ഗ്രൂപ്പിസം കൊണ്ടല്ല കോണ്ഗ്രസ് തോല്ക്കുന്നതും ക്ഷീണിക്കുന്നതും. ഗ്രൂപ്പിന്റെ പേരില് അണ്ടനും മൊശകോടനും നേതൃസ്ഥാനത്ത് എത്തുന്നത് കൊണ്ടാണെന്നും വീക്ഷണം എഡിറ്റോറിയലില് ആഞ്ഞടിച്ചു. നേതാക്കളെത്തുമ്പോള് വെണ്മയും ഇസ്തിരി വടിവും മായാത്ത വസ്ത്രമണിഞ്ഞ് മുഖം കാണിച്ചും ചെവി തിന്നും പെട്ടി പേറിയും നടക്കുന്നവര് പാര്ട്ടിയിലെ പതിരും കളകളുമാണ്. ഈ കള പറിച്ചും പതിരു കളഞ്ഞും മാത്രമേ കേരളത്തിലെ കോണ്ഗ്രസ് പ്രസ്ഥാനത്തെ രക്ഷിക്കാനാവൂ എന്ന നിര്ദ്ദേശവും മുന്നോട്ട് വയ്ക്കുന്നു. ഗ്രൂപ്പിന് അതീതനായി കോണ്ഗ്രസിനെ നയിക്കുന്ന പി.ടി തോമസ് എം.എല്.എയാണ് വീക്ഷണത്തിന്റെ ചീഫ് എഡിറ്റര്.
മത സാമുദായിക നേതാക്കളുടെ കരം ചുംബിക്കുന്നതും കാലില് നമിക്കുന്നതും കോണ്ഗ്രസ്സിന് വേണ്ടിയാകരുതെന്നും എഡിറ്റോറിയല് ചൂണ്ടിക്കാണിക്കുന്നു. വിശ്വാസികളുടെയും അവിശ്വാസികളുടെയും താത്പര്യം സംരക്ഷിക്കുന്ന കോണ്ഗ്രസ് മര്ക്കസ്സുകളിലും മഠങ്ങളിലും അരമനകളിലും കയറിയിറങ്ങുന്നത് അവസാനിപ്പിക്കണം. അവരില് പലരും വാഗ്ദാനം പാലിക്കുന്നവരല്ല. കാറ്റുളളപ്പോള് തൂറ്റാന് ഇറങ്ങുന്നവരാണ്. സമൂഹം നല്കുന്ന ആദരവിനപ്പുറം അതിരുകടന്ന സൗഹാര്ദം അവരുമായി ആവശ്യമില്ലെന്നും മുഖപ്രസംഗം താക്കീത് നല്കുന്നു.
2016ലെ നിയമസഭാ തെരഞ്ഞെടുപ്പില് തുടര്ഭരണത്തിനുളള സാധ്യത കളഞ്ഞുകുളിച്ച യു.ഡി എഫ് വീഴ്ചകളില് നിന്ന് പാഠം പഠിക്കുന്നില്ല. ശക്തരായ പ്രതിയോഗികളോട് ഏറ്റുമുട്ടാന് ആവണക്കെണ്ണ കുടിച്ച വയറുമായി രംഗത്തിറങ്ങിയിട്ട് കാര്യമില്ല. ആധുനിക അടിതട പ്രയോഗങ്ങള് പയറ്റിയിട്ടേ കാര്യമുളളൂ. കാടിയും പുല്ലും കൊടുക്കാത്ത പശു എങ്ങനെ കൂടുതല് പാല് ചുരത്താനാണ്. കെ പി സി സിയുടെയും ഡിസി സിയുടേയും പുന:സംഘടനയില് മാത്രമാണ് നേതാക്കള്ക്ക് താത്പര്യം.
പാര്ട്ടിയുടെ സ്പൈനല് കോഡായ മണ്ഡലം കമ്മിറ്റികളും നാഡീവ്യൂഹങ്ങളായ ബൂത്ത് കമ്മിറ്റികളും ഉണര്വും ഉയിരും ഉശിരുമില്ലാതെ ജഡാവസ്ഥയിലാണ്. പലപ്പോഴും പുന:സംഘടനയുടെ പെരുമ്പറ കൊട്ടി ഡല്ഹിയിലേക്ക് നേതാക്കളും ഭൂതഗണങ്ങളും വിമാനം കയറും. മണ്ണാങ്കട്ടയും കരിയിലയും കാശിക്ക് പോയ പോലെ തിരിച്ചു വരും. ഇപ്പോള് പാര്ട്ടി പുന:സംഘടന എത്തി നില്ക്കുന്നത് രാമേശ്വരത്തെ ക്ഷൗരം പോലെയാണ്.
കെ പി സി സി അധ്യക്ഷന് എം എം ഹസന് ചെയര്മാനും ശൂരനാട് രാജശേഖരന് മാനേജിങ് എഡിറ്ററും പി ടി തോമസ് എഡിറ്ററുമായ പാര്ട്ടി മുഖപത്രത്തില് പാര്ട്ടിയെയും നേതാക്കളെയും നേതാക്കളുടെ എര്ത്തുകളെയും വിമര്ശിച്ച് നിലംപരിശാക്കിയ എഡിറ്റോറിയല് വന്നത് എതിര്പാര്ക്കാരെ പോലും ഞെട്ടിച്ചിരിക്കുകയാണ്.
https://www.facebook.com/Malayalivartha
