ചെങ്ങന്നൂരിലെ കോണ്‍ഗ്രസിന്റെ തോല്‍വി ഒന്നോ, രണ്ടോ പേരുടെ തലയില്‍ കെട്ടിവയ്ക്കുന്നത് ശരിയല്ലെന്നും തോല്‍വിയുടെ ഉത്തരവാദിത്തം ഏറ്റെടുക്കുന്നതായും പ്രതിപക്ഷനേതാവ് രമേശ് ചെന്നിത്തല. സംഘടനാ തലത്തിലെ പോരായ്മകള്‍ അംഗീകരിക്കുന്നു. തോല്‍വിയില്‍ എല്ലാവര്‍ക്കും ഉത്തരവാദിത്തമുണ്ട്. ഗ്രൂപ്പ് തര്‍ക്കം ഇല്ലാതെയാണ് ചെങ്ങന്നൂരില്‍ സ്ഥാനാര്‍ത്ഥിയെ അടക്കം തീരുമാനിച്ചത്. ഇക്കാര്യം എല്ലാവര്‍ക്കും അറിയാം. കെ.എസ്.യു സ്ഥാപക ദിനാഘോഷത്തില്‍ സംസാരിക്കുകയായിരുന്നു അദ്ദേഹം. തോല്‍വിയെ കുറിച്ച് പാര്‍ട്ടി പരിശോധിക്കുകയും പഠിക്കുകയും ചെയ്യും. 

രമേശ് ചെന്നിത്തല, ഉമ്മന്‍ ചാണ്ടി, എം.എം. ഹസന്‍ എന്നിവര്‍ ഏഴാം തീയതി ഡല്‍ഹിയിലെത്താന്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ആവശ്യപ്പെട്ടു. സമൂദായിക ദ്രുവീകരണമാണ് ചെങ്ങന്നൂരിലെ തോല്‍വിക്ക് കാരണമെന്ന് സംസ്ഥാന നേതൃത്വം ഹൈക്കമാന്‍ഡിനെ ധരിപ്പിച്ചെങ്കിലും അവരത് മുഖവിലയ്ക്ക് എടുത്തിട്ടില്ല. പാര്‍ട്ടിയില്‍ അടിമുടി മാറ്റമുണ്ടാകുമെന്നാണ് അറിയുന്നത്. പ്രത്യേകിച്ച് രാജ്യസഭാ തെരഞ്ഞെടുപ്പ് അടക്കം കേരളത്തില്‍ നടക്കാനിരിക്കെ. എം.എം ഹസന് പകരം മുല്ലപ്പള്ളി രാമചന്ദ്രന്‍ കെ.പി.സി.സി പ്രസിഡന്റ് ആയേക്കും. ചിലപ്പോള്‍ പ്രതിപക്ഷനേതൃസ്ഥാനത്ത് നിന്ന് ചെന്നിത്തലയെ മാറ്റാനും സാധ്യതയുണ്ട്. യു.ഡി.എഫ് കണ്‍വീനര്‍ സ്ഥാനത്ത് നിന്ന് പി.പി തങ്കച്ചനേയും മാറ്റിയേക്കും. 

കെ.എസ്.യു, യൂത്ത് കോണ്‍ഗ്രസ് അടക്കം നേതൃത്വത്തിനെതിരെ വിമര്‍ശനം ഉന്നയിച്ച സാഹചര്യത്തിലാണ് പാര്‍ട്ടിയെ താഴേ തട്ടില്‍ നിന്ന് അടിമുടി ഉടച്ച് വാര്‍ക്കാന്‍ ഹൈക്കമാന്‍ഡ് ലക്ഷ്യം വയ്ക്കുന്നത്. തന്റെ വിശ്വസ്ഥരായ കെ.സി വേണുഗോപാല്‍ അടക്കമുള്ള നേതാക്കളുമായി രാഹുല്‍ ഇക്കാര്യങ്ങള്‍ ചര്‍ച്ച ചെയ്യും. രാജ്യസഭാ സീറ്റ് യുവാക്കള്‍ക്ക് നല്‍കണമെന്ന ആവശ്യവും ശക്തമാണ്.