മുൻ എംഎൽഎയും ഇപ്പോൾ സി പി എം നേതാവുമായ ശോഭനാ ജോർജിന് നൽകാൻ സി പി എം തസ്തിക അന്വേഷിക്കുന്നു. ശോഭനക്ക് പറ്റിയ ഒരു പോസ്റ്റ് നൽകണമെന്ന് സി പി എം തീരുമാനിച്ചു കഴിഞ്ഞു. പിണറായിയും കോടിയേരിയും ഉൾപ്പെടെയുള്ള നേതാക്കൾ ശോഭനയുടെ പ്രകടനത്തിൽ സംപ്രീതമാണ്.

അതേ സമയം ശോഭനയുടെ ആവശ്യം മറ്റൊന്നാണ്. അവർക്ക് പോസ്റ്റൊന്നും വേണ്ട. പകരം അടുത്ത നിയമസഭാ തെരഞ്ഞടുപ്പിൽ പത്തനംതിട്ടയിലെ ഏതെങ്കിലും മണ്ഡലത്തിൽ സീറ്റ് വേണം. അത് നൽകാമെന്ന് സി പി എം സമ്മതിച്ചിട്ടുണ്ടെന്നാണ് ശോഭനയുമായി അടുത്ത വ്യത്തങ്ങൾ പറയുന്നത്. തങ്ങളെ സഹായിച്ചവരെ തങ്ങളും സഹായിക്കുമെന്നാണ് സി പി എം പറയുന്നത്.

ക്രൈസ്തവ മേഖലകളിൽ ശോഭന കയറിയിറങ്ങി പ്രചരണം നടത്തിയിരുന്നു. ചെങ്ങന്നൂരിലെ പൾസ് അറിയാവുന്ന നേതാവാണ് ശോഭന. കോൺഗ്രസ് സീറ്റ് നിഷേധിച്ചിട്ടും ശോഭന ചെണ്ടന്നുരിൽ തന്നെ തുടർന്നിരുന്നു. മണ്ഡലത്തിലെ മുക്കിലും മൂലയിലും ശോഭന പ്രവർത്തനം തുടർന്നു. അതു കൊണ്ടു തന്നെ ചെങ്ങന്നൂരുകാരെ സംബന്ധിച്ചsത്തോളം ശോഭന അവരുടെ പ്രിയപ്പെട്ട നേതാവാണ്. ചെങ്ങന്നൂരിൽ ശോഭന കൊണ്ടുവന്ന വികസന വസന്തം മറ്റാർക്കും നടത്താൻ കഴിഞ്ഞിട്ടില്ലെന്നും നാട്ടുകാർ പറയുന്നു. സജി ചെറിയാനാണ് ശോഭനയെ ഇടതിലെത്തിച്ചത്. ശോഭന വരുന്നതിനോട് ആദ്യം ചിലർ എതിർപ്പ് പ്രകടിപ്പിച്ചിരുന്നു. എന്നാൽ സജിയുടെ തീരുമാനം തികച്ചും ശരിയായിരുന്നു എന്ന് മനസിലായി.

ശോഭനക്ക് സർക്കാർ വാഹനമുള്ള ഒരു പോസ്റ്റ് നൽകണമെന്നാണ് സർക്കാർ ആഗ്രഹിക്കുന്നത്. ഭരണത്തിലെ താക്കോൽ സ്ഥാനങ്ങളൊക്കെ വീതം വച്ചു പോയി. ഇനി ഒഴിവുവരുന്ന പ്രധാന തസ്തികക്ക് മാസങ്ങളെടുക്കും. അതിനു മുമ്പ് തന്നെ ശോഭനയെ സഹായിക്കാനാണ് പാർട്ടി ആലോചിക്കുന്നത്. കോൺഗ്രസിന്റെ തകർച്ച ശോഭന ആസ്വദിക്കുകയാണ്. തനിക്ക് സീറ്റ് നിഷേധിച്ചവർക്കെതിരെ ശോഭന ഉറഞ്ഞു തുള്ളുന്നു.

കരുണാകരനെ വഞ്ചിച്ചതാണ് ചെന്നിത്തലയുടെ ഇന്നത്തെ അവസ്ഥക്ക് കാരണമെന്ന് ശോഭന അടക്കം പറയുന്നുണ്ട്. സജി ചെറിയാന്റെ ഭൂരിപക്ഷം 20,000 കടന്നത് ശോഭനക്ക് വലിയ ആശ്വാസമാണ്. സഭകൾ ഒപ്പം നിന്നതിൽ ശോഭനയുടെ സ്വാധീനം നിർണായകമാണെന്നാണ് സജി ചെറിയാൻ പറയുന്നത്. സഭാ നേതാക്കളെ നേരിട്ട് കണ്ട് നിരന്തരം സംസാരിച്ചത് ശോഭനയാണ്. ഓർത്തഡോക്സ് നേതൃത്വത്തെ മുഖ്യമന്ത്രിയുമായി സംസാരിപ്പിച്ചതും ശോഭനാ ജോർജാണ്. കൊച്ചിയിൽ നടന്ന സഭാ നേതാക്കളുടെ യോഗത്തിലും ശോഭനയുടെ പങ്ക് എടുത്തു പറയേണ്ടതാണ്.