മനോനില തെറ്റിയ പൂജാരിയെ കീഴ്‌പ്പെടുത്താനെത്തിയ പോലീസുകാരന് വെട്ടേറ്റു. വടകര വള്ളിയാട് ക്ഷേത്രത്തിലെ ശാന്തിക്കാരനായ കര്‍ണാടക സ്വദേശി റാം ഭട്ടാണ് വടകര പോലീസ് സ്‌റ്റേഷനിലെ സീനിയര്‍ പോലീസുകാരനായ പി.അശോകനെ വെട്ടി പരുക്കേല്‍പ്പിച്ചത്. വലതു കൈയ്ക്ക് ഗുരുതരമായി പരുക്കേറ്റ അശോകനെ അടിയന്തിര ശസ്ത്രക്രിയയ്ക്ക് വിധേയനാക്കി.
ഇന്നു പുലര്‍ച്ചെയായിരുന്നു സംഭവം.
അസമയത്ത് ക്ഷേത്രത്തില്‍ നിന്നും ശബ്ദം കേട്ട് ഓടിയെത്തിയ നാട്ടുകാരാണ് ക്ഷേത്രത്തിനുള്ളില്‍ ഭീകരാന്തരീക്ഷം സൃഷ്ടിച്ചുകൊണ്ടിരുന്ന ശാന്തിക്കാരനെ കണ്ടത്. നാട്ടുകാര്‍ അറിയിച്ചതിനെ തുടര്‍ന്ന് പോലീസും ഫയര്‍ഫോഴ്‌സും സ്ഥലത്തെത്തി.
ശ്രീകോവിലില്‍ നിന്നും നിലവിളക്കുകളും മറ്റ് പൂജാ ഉപകരണങ്ങളും പുറത്തേയ്ക്ക് വലിച്ചെറിഞ്ഞു കൊണ്ടിരുന്ന ശാന്തിക്കാരനെ നാട്ടുകാരും പോലീസും ഇടപെട്ട് പിന്തിരിപ്പിക്കാന്‍ ശ്രമിച്ചുവെങ്കിലും ഫലം കണ്ടില്ല. തുടര്‍ന്ന് വെളിച്ചപ്പാടിന്റെ വാളുമായി ഉറഞ്ഞുതുള്ളുകയും തലയ്ക്ക് സ്വയം വെട്ടാന്‍ ശ്രമിക്കുകയും ചെയ്തതോടെ പോലീസുകാര്‍ ഇയാളുടെ കയ്യില്‍ നിന്നും വാള്‍ പിടിച്ചുവാങ്ങി. ഇതിനിടെയാണ് അശോകിന് വെട്ടേറ്റത്.
പോലീസുകാരനെ വെട്ടിയശേഷം ശ്രീകോവിലിനുള്ളില്‍ ഒളിച്ച ഇയാളെ ഏറെ പണിപ്പെട്ടാണ് പുറത്തെത്തിച്ചത്. കഴിഞ്ഞ ഒന്നര വര്‍ഷമായി ഇതേ ക്ഷേത്രത്തിലെ ശാന്തിക്കാരനാണ് റാം ഭട്ട്. പോലീസ് ഇയാളെ സ്‌റ്റേഷനിലേയ്ക്ക് മാറ്റി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha