ഉമ്മന്‍ചാണ്ടിക്കും ചെന്നിത്തലയ്ക്കും എതിരെ സുധീരന്‍ കോണ്‍ഗ്രസില്‍ കലാപക്കൊടി ഉയര്‍ത്തിയ സാഹചര്യത്തില്‍ സുധീരന്‍ കെ.പി.സി.സി പ്രസിഡന്റായിരുന്നത് ഐ, എ ഗ്രൂപ്പ് പ്രവര്‍ത്തകര്‍ക്കും നേതാക്കള്‍ക്കും അദ്ദേഹത്തിനോടുണ്ടായിരുന്ന എതിര്‍പ്പ് വ്യക്തമാക്കുന്ന കാര്യം പുറത്തായി. 2017 മാര്‍ച്ച് അഞ്ചിന് കോഴിക്കോട് ഡി.സി.സി ഓഫീസില്‍ വെച്ച് ചാനല്‍ ക്യാമറാ കേബിളില്‍ തട്ടി വി.എം സുധീരന്‍ വീണ് കോഴിക്കോട് സ്വകാര്യ ആശുപത്രിയിലായപ്പോള്‍ പ്രവര്‍ത്തകരില്‍ ഭൂരിപക്ഷവും പല നേതാക്കളും കോണ്‍ഗ്രസ് രക്ഷപെടുമെന്ന് വിചാരിച്ചെന്ന് കോട്ടയം പുതുപ്പള്ളി സ്വദേശിയായ പ്രവാസി പ്രസൂണ്‍ എബ്രഹാം ജേക്കബ് എന്നയാള്‍ ഫെയിസ്ബുക്കിലൂടെ വെളിപ്പെടുത്തി. ഉമ്മന്‍ചാണ്ടിയുടെ സഹായിയായിരുന്ന ടെന്നിജോപ്പന്റെയും ചെങ്ങന്നൂരിലെ കോണ്‍ഗ്രസ് നേതാവായ ബിപിന്‍ മാമന്റെയും സുഹൃത്താണ് പ്രസൂണ്‍ എബ്രഹാം.

2017 മാര്‍ച്ച് അഞ്ചിന് ഇട്ട പോസ്റ്റ് ഇങ്ങിനെയാണ് : 

ഇത് കഥയല്ല ഇന്ന് നടന്ന സംഭവമാണ്. ആരെയും അപകീര്‍ത്തിപ്പെടുത്താന്‍ താല്പര്യം ഇല്ലാത്തതുകൊണ്ട് പാര്‍ട്ടിയുടെ പേരും നേതാവിന്റെ പേരും മനഃപൂര്‍വം പറയുന്നില്ല.. ഇന്ന് വൈകീട്ട് കോഴിക്കോട് പാര്‍ട്ടി ഓഫിസില്‍ വെച്ച് പാര്‍ട്ടിയുടെ സംസ്ഥാന പ്രസിഡന്റ് കേബിളില്‍ കാല്‍തട്ടി വീണതിനെ തുടര്‍ന്ന് കോഴിക്കോട് സ്വകാര്യ ആശുപത്രിയില്‍ പ്രവേശിപ്പിച്ചു. പ്രവര്‍ത്തകര്‍ മ്ലാനതയിലാണ്. ഒരുനിമിഷം പ്രസ്ഥാനം രക്ഷപ്പെടുമെന്ന് സങ്കല്‍പ്പിച്ച പാര്‍ട്ടി പ്രവര്‍ത്തകര്‍ പെട്ടന്നാണ് മ്ലാനതയിലായത്... കാരണം പ്രസിഡന്റ്‌റിനു സാരമായ പരുക്കില്ലെന്ന വിവരമാണ് ആശുപത്രിയില്‍ നിന്നും ലഭിച്ചത്. ഈ പാര്‍ട്ടി ഒരുവിധത്തിലും രക്ഷപ്പെടിലെ എന്നാണ് പ്രവര്‍ത്തകരില്‍ ചിലര്‍ ഗൗരവത്തോടെ തമ്മില്‍ തമ്മില്‍ ചോദിക്കുന്നത്.. മറ്റു ചിലര്‍ ഒന്ന് മനസ്സറിഞ്ഞു ചിരിക്കാന്‍ കിട്ടിയ അവസരത്തില്‍ സന്തോഷത്തിലാണ്.
കോഴിക്കോട് നിന്നും പേര് വെളിപ്പെടുത്താന്‍ ആഗ്രഹിക്കാത്ത റിപ്പോര്‍ട്ടറോടൊപ്പം പേര് വെളിപ്പെടുത്താന്‍ ആഗ്രഹിക്കാത്ത കാമറാമാന്‍ :

പുതിയ പോസ്റ്റ് 
അന്ന് താനീ പോസ്റ്റിട്ടപ്പോള്‍ അടുത്തസുഹൃത്തുക്കളും മറ്റും വിമര്‍ശനവുമായി രംഗത്തെത്തിയെന്നും ചിലര്‍ പോസ്റ്റ് പിന്‍വലിക്കണമെന്നും ആവശ്യപ്പെട്ടെന്ന് പ്രസൂണ്‍ ഇപ്പോള്‍ ഫെയിസ്ബുക്കിലൂടെ പറയുന്നു. എന്നാല്‍ തന്റെ നിലപാടില്‍ ഉറച്ച് നിന്നു. സുധീരന് പരിക്കേറ്റ് ഏതാന് ദിവസങ്ങള്‍ക്ക് ശേഷം അദ്ദേഹം കെ.പി.സി.സി അധ്യക്ഷസ്ഥാനം രാജിവെച്ചു. ആരോഗ്യപ്രശ്‌നങ്ങള്‍ ഉള്ളതിനാല്‍ പ്രസിഡന്റ് പദവിയോട് നീതി പുലര്‍ത്താനാകില്ലെന്നാണ് അന്ന് സുധീരന്‍ പറഞ്ഞത്. എന്നാല്‍ കഴിഞ്ഞയാഴ്ച തിരുവനന്തപുരത്തെ വസതിയില്‍ അദ്ദേഹം നടത്തിയ വാര്‍ത്താസമ്മേളനത്തില്‍ ഗ്രൂപ്പ്മാനേജര്‍മാര്‍ വളഞ്ഞിട്ട് ആക്രമിച്ചതിനെ തുടര്‍ന്നാണ് അധ്യക്ഷസ്ഥാനം രാജിവെച്ചതെന്ന് സുധീരന്‍ തിരുത്തിപ്പറഞ്ഞു. ഇത് തന്നെയാണ് അന്ന് പാര്‍ട്ടിയുടെയോ നേതാവിന്റെയോ പേര് വ്യക്തമാക്കാതെ ഫെയിസ്ബുക്കില്‍ കുറിച്ചതെന്നും പ്രസൂണ്‍ അവകാശപ്പെടുന്നു. താന്‍ വി.എം സുധീരന് എതിരല്ലെന്നും ധാര്‍മിക പ്രസംഗത്തിലൂടെ ജനങ്ങളെ വിഡ്ഢികളാക്കാമെന്ന അദ്ദേഹത്തിന്റെ മനോഭാവത്തിനും യാഥാര്‍ത്ഥ്യം മനസിലാക്കാതെയുള്ള പ്രസ്താവനകളോടും യോജിപ്പില്ലെന്നും പറഞ്ഞാണ് കുറിപ്പ് അവസാനിക്കുന്നത്.