ബ്യട്ടീഷനായി തുടങ്ങി നടിയായിത്തീര്‍ന്ന 39-കാരി യുവതി തന്റെ രണ്ടാം ഭര്‍ത്താവിനെതിരേ പരാതിയുമായി പോലീസ് സ്‌റ്റേഷനിലെത്തി. ശരീരമാസകലം മുറിവുമായാണ് യുവതി സ്റ്റേഷനിലെത്തിയത്. നാളുകളായി തന്നെമുറിയില്‍ പൂട്ടിയിട്ട് ക്രൂരമായി പീഡിപ്പിക്കുകയായിരുന്നു എന്നാണ് അവര്‍ പറയുന്നത്.

ആദ്യ വിവാഹം മറച്ചുവെച്ച് അവരെ വിവാഹം കഴിച്ച 42-കാരനായ ശരവണന്‍ എന്ന ബിസിനസ്സുകാരനാണ് പ്രതി. തൃച്ചിയിലെ അണ്ണാനഗറില്‍ ബ്യൂട്ടി ക്ലിനിക്ക് ബിസിനസുമായി തിരക്കിലായിരുന്ന യുവതി പിന്നീട് അഭിനയ രംഗത്ത് എത്തിപ്പെടുകയായിരുന്നു. ആദ്യ വിവാഹബന്ധം വേര്‍പ്പെടുത്തി നിന്നപ്പോള്‍ താനുമായി ശരവണന്‍ അടുക്കുകയായിരുന്നു എന്ന് യുവതി പറയുന്നു. 2014-ല്‍ ആയിരുന്നു അത്. തുടര്‍ന്ന് തങ്ങള്‍ വിവാഹം ചെയ്യാന്‍ തീരുമാനിക്കുകയായിരുന്നുവെന്നും യുവതി പറയുന്നു.

എന്നാല്‍ പിന്നീട് ശരവണന്‍ മദ്യലഹരിയിലായിരിക്കുമ്പോള്‍ സുഹൃത്തുക്കള്‍ക്ക് മുന്നില്‍ നിന്നും നൃത്തം ചെയ്യാന്‍ നടിയെ നിര്‍ബന്ധിക്കുമെന്നും തന്നെ മുറിയില്‍ പൂട്ടിയിടുകയായിരുന്നു പതിവെന്നും അവരുടെ പരാതിയില്‍ പറയുന്നു. ഇത്തരത്തിലാണ് തന്റെ സിനിമാജീവിതം അവസാനിച്ചതെന്നും യുവതി പറയുന്നു. ശരവണന്റെ വിവാഹം കഴിഞ്ഞതാണെന്നും അയാള്‍ക്ക് ഭാര്യയും കുട്ടികളും ഉള്ളതായി 2016-ലാണ് താന്‍ അറിയുന്നതെന്നും യുവതി പോലീസിനോട് പറഞ്ഞു.

ഇതുകൂടാതെ തന്റെ 25ലക്ഷം രൂപയും കുടുംബം തനിക്ക് തന്ന തന്റെ 100 പവന്‍ സ്വര്‍ണാഭരണങ്ങളും ഇയാള്‍ തട്ടിയെടുത്തെന്ന് യുവതി പറയുന്നു. തന്നെ മുറിയില്‍ പൂട്ടിയിട്ട് ബലാത്സംഗം ചെയ്ത ശേഷം ദൃശ്യങ്ങള്‍ ശരവണന്‍ ക്യാമറയില്‍ പകര്‍ത്തിയിട്ടുണ്ടെന്നും അത് സോഷ്യല്‍ മീഡിയകളില്‍ അപ് ലോഡ് ചെയ്യുമെന്ന് ഭീഷണിപ്പെടുത്തുകയുമാണെന്ന് നടി പരാതിയില്‍ ചൂണ്ടിക്കാട്ടി. ജനുവരി എട്ടിന് തന്റെ മൂത്ത മകനെ ശരവണന്റെ അംഗരക്ഷകന്‍ ഉപദ്രവിച്ചുവെന്നും യുവതിയുടെ പരാതിയില്‍ പറയുന്നു. (ലൈംഗികാതിക്രമത്തിന് വിധേയരായ പരാതിക്കാരുടെ സ്വകാര്യത സംരക്ഷിക്കണമെന്ന സുപ്രീംകോടതിയുടെ നിര്‍ദ്ദേശം മാനിച്ച് നടിയുടെ വിവരങ്ങള്‍ വെളിപ്പെടുത്തുന്നില്ല).