കോടതി കയറേണ്ട... കല്ക്കരി അഴിമതി കേസില് മന്മോഹന് സിംഗിനെ പ്രതി ചേര്ത്ത പ്രത്യേക സി.ബി.ഐ കോടതിയുടെ ഉത്തരവ് സുപ്രീം കോടതി സ്റ്റേ ചെയ്തു
കല്ക്കരി അഴിമതി കേസില് മുന് പ്രധാനമന്ത്രി മന്മോഹന് സിംഗിനെ പ്രതി ചേര്ത്ത പ്രത്യേക സി.ബി.ഐ കോടതിയുടെ ഉത്തരവ് സുപ്രീംകോടതി സ്റ്റേ ചെയ്തു. മന്മോഹന് സിംഗിനെ പ്രതി ചേര്ത്ത സി.ബി.ഐ കോടതിയുടെ ഉത്തരവ് സുപ്രീംകോടതി സ്റ്റേ ചെയ്തതോടെ ഈ മാസം എട്ടിന് അദ്ദേഹം കോടതിയില് ഹാജരാവേണ്ടതില്ല. മന്മോഹനെ കൂടാതെ ഹിന്ഡാല്കോ ഉടമ കുമാര്മംഗലം ബിര്ള, അന്നത്തെ കല്ക്കരി സെക്രട്ടറി പി.സി.പരേഖ്, ഹിന്ഡാല്കോ പ്രതിനിധികളായ ശുഭേന്ദു അമിതാഭ്, ഡി.ഭട്ടാചാര്യ എന്നിവര്ക്കെതിരേയുള്ള നടപടികളും സ്റ്റേ ചെയ്തിട്ടുണ്ട്. കേസില് സി.ബി.ഐയ്ക്കും കോടതി നോട്ടീസ് അയച്ചു. മൂന്നാഴ്ചയ്ക്കകം മറുപടി നല്കാനാണ് കോടതിയുടെ നിര്ദ്ദേശം. കേസ് നാലാഴ്ച കഴിഞ്ഞ് വീണ്ടും പരിഗണിക്കും.
പ്രമുഖ അഭിഭാഷകനും മുന് കേന്ദ്ര മന്ത്രിയുമായ കപില് സിബലാണ് മന്മോഹന് സിംഗിന് വേണ്ടി കോടതിയില് ഹാജരായത്. ഭരണപരമായ നടപടിക്രമം നിയമലംഘനമായി കാണാനാവില്ലെന്നും സിബല് വാദിച്ചു. സി.ബി.ഐ കോടതിയുടെ വിധിയില് പിഴവുകളുണ്ടെന്നും സിബല് കോടതിയില് ചൂണ്ടിക്കാട്ടി.
ക്രിമിനല് ഗൂഢാലോചന, അഴിമതി, ജനപ്രതിനിധിയെന്ന നിലയിലുള്ള വിശ്വാസ വഞ്ചന എന്നീ കുറ്റങ്ങളാണ് മന്മോഹന്സിംഗിന് മേല് ചുമത്തിയിരിക്കുന്നത്. ഹിന്ഡാല്കോയ്ക്ക് ഒഡിഷയിലെ തലബിറ2 കല്ക്കരി ബ്ലോക്ക് ലൈസന്സ് അനുവദിക്കുന്നതില് ഗൂഢാലോചന നടന്നുവെന്ന് കണ്ടെത്തിയാണ് സി.ബി.ഐ കേസെടുത്തത്. വന് അഴിമതി നടന്നെന്ന സി.എ.ജി റിപ്പോര്ട്ടിന്റെ അടിസ്ഥാനത്തിലായിരുന്നു ഇത്. സര്ക്കാരിന് വന്നഷ്ടമുണ്ടാക്കി ചട്ടങ്ങള് ലംഘിച്ച് ആദിത്യ ബിര്ള ഗ്രൂപ്പ് കമ്പനിയായ ഹിന്ഡാല്കോയ്ക്ക് 2005ല് കല്ക്കരിപാടം അനുവദിക്കാന് തീരുമാനിച്ചത് അന്ന് പ്രധാനമന്ത്രിയായിരുന്ന മന്മോഹന്സിംഗ് കല്ക്കരി വകുപ്പിന്റെ കൂടി ചുമതല വഹിക്കുമ്പോഴായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
