ശിവസേന നേതാവ് സഞ്ജയ് റാവുത്ത് നടത്തിയ വിവാദ പ്രസ്താവന തൂങ്ങി പിടിച്ചാണ് കോണ്‍ഗ്രസ് ജനറല്‍ സെക്രട്ടറി ദിഗ്‌വിജയ് സിങ് രംഗത്തെത്തിയിരിക്കുന്നത്. മുസ്‌ലിംകളുടെ വോട്ടവകാശം റദ്ദാക്കണമെന്ന് പ്രസ്താവനയാണ് ദിഗ്‌വിജയ് സിങിനെ പ്രകോപിപ്പിച്ചത്. സഞ്ജയ് റാവുത്തിന്റെ ഈ പ്രസ്താവന പ്രകോപനപരവും ഭരണഘടയ്ക്ക് നിരക്കാത്തതുമാണെന്നാണ് ദിഗ്‌വിജയ് സിങ് വ്യക്തമാക്കിയിരിക്കുന്നത്.

ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്. ശിവസേന മുഖപത്രമായ സാമ്‌നയില്‍ ഇന്നലെയാണ് ലേഖനം പുറത്ത് വന്നത്. മുസ്‌ലിംകളുടെ വോട്ടവകാശം റദ്ദാക്കണമെന്നു മുഖപത്രത്തില്‍ വ്യക്തമാക്കുന്നു. സാമ്‌ന എക്‌സിക്യൂട്ടീവ് എഡിറ്ററും രാജ്യസഭാംഗവുമായ സഞ്ജയ് റാവുത്തിന്റെ ലേഖനത്തിലായിരുന്നു ഇത്തരത്തിലൊരു പരാമര്‍ശം. മുസ്‌ലിം സമുദായം നേരിടുന്ന വിവേചനത്തിന്റെയും അനീതിയുടെയും പേരു പറഞ്ഞുള്ള വോട്ട്ബാങ്ക് രാഷ്ട്രീയമാണ് അരങ്ങേറുന്നത്. ഒരുകാലത്തു കോണ്‍ഗ്രസാണ് ഇത്തരം വോട്ട്ബാങ്ക് രാഷ്ട്രീയം കളിച്ചിരുന്നത്.

ഇപ്പോള്‍ മറ്റുപലരും മതനിരപേക്ഷതയുടെ പേരു പറഞ്ഞു മുസ്‌ലിം സമുദായത്തെ രാഷ്ട്രീയ നേട്ടത്തിനായി ഉപയോഗപ്പെടുത്തുന്നു. ഇങ്ങനെയാണെങ്കില്‍ അവര്‍ക്ക് ഒരിക്കലും പുരോഗതിയുണ്ടാകില്ല. അതുകൊണ്ടാണു മുസ്‌ലിംകളുടെ വോട്ടവകാശം എടുത്തുമാറ്റണമെന്നു ശിവസേനാ സ്ഥാപകന്‍ ബാല്‍ താക്കറെ 15 വര്‍ഷം മുന്‍പ് ആവശ്യപ്പെട്ടതെന്നും ലേഖനത്തില്‍ പറയുന്നു.

നിരവധി രാഷ്ട്രീയ, സമുദായ നേതാക്കള്‍ ലേഖനത്തിനെതിരെ രംഗത്തെത്തിയിരുന്നു. തുടര്‍ന്നാണ് ശിവസേന നിലപാട് മാറ്റിയത്. ഏതായാലും റാവുത്തിന്റെ ഇത്തരത്തിലുള്ളൊരു പ്രസ്താവന ഇനിയും ഏറെ വിവാദം ഉണ്ടാക്കുമെന്നാണ് ചില കോണ്‍ഗ്രസ് നേതാക്കള്‍ വ്യക്തമാക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha