പ്രായപൂര്‍ത്തിയാകാത്ത പെണ്‍കുട്ടികളെ പീഡിപ്പിക്കുകയും അശ്ലീല വീഡിയോകള്‍ പകര്‍ത്തുകയും ചെയ്ത സംഭവത്തില്‍ കൂടുതല്‍ വിവരങ്ങള്‍ പുറത്ത്. മഹാരാഷ്ട്രയില്‍ അറസ്റ്റിലായ പ്രതി അഹമ്മദ് തന്‍വീറിന്റെ (19) പ്രവൃത്തികളില്‍ നേരത്തെ തന്നെ സംശയം തോന്നിയിരുന്നെന്നും ഇത് വീട്ടുടമയെ അറിയിച്ചിരുന്നെന്നും ഫ്‌ലാറ്റിലെ താമസക്കാരന്‍ പറഞ്ഞു. എന്നാല്‍ നടപടിയൊന്നും ഉണ്ടായില്ലെന്നും ഇദ്ദേഹം വ്യക്തമാക്കി. പ്രണയക്കെണിയില്‍ പെടുത്തിയാണ് തന്‍വീര്‍ പെണ്‍കുട്ടികളെ വശത്താക്കിയിരുന്നത്. ചതിയില്‍പ്പെടുത്തി പെണ്‍കുട്ടികളെ കൂട്ടിക്കൊണ്ടു പോയ ശേഷം നഗ്‌ന വീഡിയോകള്‍ ചിത്രീകരിക്കുകയായിരുന്നു. പീന്നീട് ഈ വീഡിയോ ഉപയോഗിച്ച് പെണ്‍കുട്ടികളെ ഭീഷണിപ്പെടുത്തി പെണ്‍വാണിഭത്തിന് ഉപയോഗിക്കുകയായിരുന്നു എന്നും പൊലീസ് പറഞ്ഞു.

അമരാവതിയിലെ പരത്വാഡയിലുള്ള ഒരു ഫ്‌ലാറ്റിലാണ് പ്രതി 180 ഓളം പെണ്‍കുട്ടികളെ എത്തിച്ചിരുന്നത്. പെണ്‍കുട്ടികളുടെ അശ്ലീല വീഡിയോകള്‍ ചിത്രീകരിക്കാന്‍ ഈ ഫ്‌ലാറ്റാണ് പ്രതി ഉപയോഗിച്ചിരുന്നത്. അര്‍ദ്ധ രാത്രികളിലാണ് പ്രതി പെണ്‍കുട്ടികളുമായി എത്തുന്നത്. പ്രതിദിനം ആളുകള്‍ ഇവിടെ വരുമായിരുന്നു. കൂടുതലായും രാത്രിയിലാണ്. ഉറങ്ങാന്‍ പോലും കഴിയില്ലെന്ന് ഫ്‌ലാറ്റിലെ താമസക്കാരന്‍ പറഞ്ഞു. വീട്ടുടമയുടെ പങ്കും അന്വേഷിക്കണമെന്ന് അദ്ദേഹം ആവശ്യപ്പെട്ടു.

കേസില്‍ അഹമ്മദ് തന്‍വീറിനൊപ്പം സുഹൃത്ത് ഉജേര്‍ ഖാനും (20) അറസ്റ്റിലായിരുന്നു. പെണ്‍കുട്ടികളെ അഹമ്മദ് തന്‍വീര്‍ ലൈംഗികമായി ഉപയോഗിക്കുന്ന ദൃശ്യങ്ങള്‍ പകര്‍ത്തിയത് ഉജേര്‍ ഖാനായിരുന്നു. ഇവരുടെ ഫോണില്‍ നിന്ന് പൊലീസിന് ലഭിച്ചത് 350ഓളം അശ്ലീല വീഡിയോകളാണ്. ഇരുവരും തമ്മിലുണ്ടായ അഭിപ്രായ വ്യത്യാസവും സാമ്പത്തിക തര്‍ക്കവുമാണ് സംഭവം പുറത്തറിയാന്‍ കാരണം. അഹമ്മദ് തന്‍വീറിന് പണി കൊടുക്കുക എന്ന ഉദ്ദേശ്യത്തോടെ പെണ്‍കുട്ടികളുമായി ലൈംഗിക ബന്ധത്തിലേര്‍പ്പെടുന്ന വീഡിയോകള്‍ ഉജേര്‍ ഖാന്‍ ഇന്‍സ്റ്റഗ്രാമിലും സ്‌നാപ് ചാറ്റിലും പോസ്റ്റ് ചെയ്തു. വീഡിയോകള്‍ ശ്രദ്ധയില്‍പ്പെട്ടതോടെ പെണ്‍കുട്ടികളുടെ മാതാപിതാക്കള്‍ പൊലീസിനെ സമീപിക്കുകയായിരുന്നു.