സംസ്ഥാനത്ത് എസ്എസ്എല്‍സി പരീക്ഷാഫലം മെയ് മൂന്നാം വാരം പ്രഖ്യാപിക്കുമെന്ന് വിദ്യാഭ്യാസ മന്ത്രി വി ശിവന്‍കുട്ടി. നേരത്തെ മെയ് 8 ആയിരുന്നു തീരുമാനിച്ചിരുന്നത്. ഏപ്രില്‍ 16 മുതല്‍ മെയ് 2 വരെ മൂല്യനിര്‍ണയം നടക്കുക. മൂല്യനിര്‍ണയം 72 ക്യാമ്പുകളില്‍ നടക്കും. ഹയര്‍സെക്കന്‍ഡറി പരീക്ഷാഫലം മെയ് 25ന് പ്രഖ്യാപിക്കും. ജൂണ്‍ ഒന്നിന് പ്രവേശനോത്സവം നടക്കുമെന്നും മന്ത്രി വ്യക്തമാക്കി.ഇന്റേണല്‍ മാര്‍ക്ക് പരാതിയുണ്ടെങ്കില്‍ പ്രത്യേക സമിതി പരിശോധിക്കും.

അവധിക്കാല ക്ലാസുകള്‍ക്ക് കുട്ടികളെ ചില സ്‌കൂളുകള്‍ നിര്‍ബന്ധപൂര്‍വ്വം ക്ലാസ്സെടുക്കുന്നു തൊഴില്‍ വകുപ്പ് പോലും ചൂടു പരിഗണിച്ച് തീരുമാനമെടുത്തിരിക്കെ അത്തരമൊരു നീക്കത്തില്‍ നിന്ന് സ്‌കൂളുകള്‍ പിന്തിരിയണമെന്നും മന്ത്രി വി ശിവന്‍കുട്ടി ആവശ്യപ്പെട്ടു. സമഗ്ര ശിക്ഷാ കേരള എസ്എസ്‌കെയില്‍ 1158 കോടി കേന്ദ്രത്തില്‍ നിന്ന് ലഭിക്കാനുണ്ട്. പല പ്രധാനകാര്യങ്ങളും പ്രതിസന്ധിയില്‍ ആണെന്നും മന്ത്രി ചൂണ്ടിക്കാട്ടി.

പൊതുവിദ്യാലയങ്ങളിലെ ഒന്ന് മുതല്‍ ഒന്‍പത് വരെയുള്ള ക്ലാസുകളിലെ വിദ്യാര്‍ഥികളുടെ പരീക്ഷാഫലം മെയ് രണ്ടിന് പ്രസിദ്ധീകരിക്കും. മാര്‍ച്ച് അഞ്ചിന് ആരംഭിച്ച എസ്എസ്എല്‍സി, ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി പരീക്ഷകള്‍ മാര്‍ച്ച് 16നാണ് അവസാനിച്ചത്. സംസ്ഥാനത്തെ 3,031 കേന്ദ്രങ്ങളിലായാണ് പരീക്ഷകള്‍ നടന്നത്. കുറ്റമറ്റ രീതിയില്‍ മൂല്യനിര്‍ണയം പൂര്‍ത്തിയാക്കി വേഗത്തില്‍ ഫലം പ്രഖ്യാപിക്കാനുള്ള ക്രമീകരണങ്ങളാണ് നിലവില്‍ പുരോഗമിക്കുന്നത്.അതേസമയം നിയമസഭ തെരഞ്ഞെടുപ്പിന്റെ പശ്ചാത്തലത്തില്‍ പുനഃക്രമീകരിച്ച എസ്എസ്എല്‍സി, ഹയര്‍ സെക്കന്‍ഡറി പരീക്ഷകളുടെ മൂല്യനിര്‍ണയം ആരംഭിച്ചു. നേരത്തെ തീരുമാനിച്ച തീയതികള്‍ വോട്ടെടുപ്പ് കാരണം മാറ്റുകയായിരുന്നു. ഇരുപതിനായിരത്തില്‍ അധികം അധ്യാപകരാണ് സംസ്ഥാനത്ത് മൂല്യനിര്‍ണയത്തില്‍ പങ്കെടുക്കുക.

ഏപ്രില്‍ ആറ് മുതല്‍ 25 വരെ മൂല്യനിര്‍ണയം നടത്താനായിരുന്നു നേരത്തെ വിദ്യാഭ്യാസ വകുപ്പ് തീരുമാനിച്ചിരുന്നത്. എന്നാല്‍ സംസ്ഥാനത്ത് ഏപ്രില്‍ ഒന്‍പതിന് വോട്ടെടുപ്പ് പ്രഖ്യാപിച്ചതോടെ അധ്യാപകര്‍ക്ക് തെരഞ്ഞെടുപ്പ് ഡ്യൂട്ടി നല്‍കേണ്ടി വന്നു. ഇതേത്തുടര്‍ന്നാണ് മൂല്യനിര്‍ണയ തീയതികളില്‍ മാറ്റം വരുത്തിയത്.പുതുക്കിയ കലണ്ടര്‍ പ്രകാരം മൂന്ന് ഘട്ടങ്ങളിലായാണ് നടപടികള്‍ പൂര്‍ത്തിയാക്കുക. ഒന്നാം ഘട്ടം ഏപ്രില്‍ 16 മുതല്‍ 18 വരെയും രണ്ടാം ഘട്ടം ഏപ്രില്‍ 20 മുതല്‍ 25 വരെയും നടക്കും. അവസാന ഘട്ടമായ മൂന്നാം ഘട്ടം ഏപ്രില്‍ 27 മുതല്‍ മെയ് രണ്ട് വരെ നീളും.

സംസ്ഥാനത്തെ 70 കേന്ദ്രങ്ങളിലായാണ് മൂല്യനിര്‍ണയം നടക്കുന്നത്. ഇത്തവണ 4.14 ലക്ഷം വിദ്യാര്‍ഥികളാണ് എസ്എസ്എല്‍സി പരീക്ഷയെഴുതിയത്. ഇവരുടെ മുപ്പത്താറ് ലക്ഷത്തോളം ഉത്തരക്കടലാസുകള്‍ പരിശോധിക്കാനുണ്ട്. ഇതിനായി 10,500 അധ്യാപകരെയാണ് നിയോഗിച്ചിരിക്കുന്നത്. ഹയര്‍ സെക്കന്‍ഡറി വിഭാഗത്തില്‍ 8.7 ലക്ഷം വിദ്യാര്‍ഥികള്‍ പരീക്ഷ എഴുതി. ഇവരുടെ എണ്‍പത് ലക്ഷത്തോളം ഉത്തരക്കടലാസുകള്‍ മൂല്യനിര്‍ണയം ചെയ്യും. വിഎച്ച്എസ്‌സി വിഭാഗത്തില്‍ മുപ്പതിനായിരം വിദ്യാര്‍ഥികളും പരീക്ഷ എഴുതിയിട്ടുണ്ട്. വേനല്‍ അവധിക്ക് ശേഷം സ്‌കൂളുകള്‍ തുറക്കുന്നതിന് മുന്‍പ് തന്നെ ഫലപ്രഖ്യാപനം നടത്താനാണ് വിദ്യാഭ്യാസ വകുപ്പിന്റെ തീരുമാനം.