സിപിഎം അഖിലേന്ത്യാ സെക്രട്ടറിയായി വ്യന്ദാകരാട്ടിനെ തെരഞ്ഞെടുത്തേക്കുമെന്ന് റിപ്പോര്‍ട്ട്. കഴിഞ്ഞ കുറച്ച് ദിവസങ്ങളായി പുതിയ സെക്രട്ടറിയാര് എന്ന രീതിയില്‍ പലതരത്തിലുള്ള ചര്‍ച്ചകള്‍ ദേശീയ സംസ്ഥാന രാഷ്ട്രീയത്തില്‍ സജീവമായിരുന്നു. ദേശീയ രാഷ്ടീയത്തില്‍ തിളങ്ങിനില്‍ക്കുന്ന മുഖമായിരിക്കണം അടുത്ത സിപിഎം സെക്രട്ടറിയെന്ന് പാര്‍ട്ടിക്ക് നിശ്ചയമുണ്ട്. ഇത് സംബന്ധിച്ച് ഇന്ന് കൂടുന്ന പിബിയോഗത്തില്‍ ധാരണയുണ്ടാകുമെന്നാണ് അറിയുന്നത്. തീരുമാനമായല്‍ നാളത്തെ കേന്ദ്രകമ്മിറ്റിയിലും പുതിയ സെക്രട്ടറിയുടെ പേര് ചര്‍ച്ച ചെയ്യും. വ്യന്ദാ കരാട്ടിനു പുറമേ, സീതാറാം യെച്ചൂരി, എസ് രാമചന്ദ്രപിള്ള, ബി രാഘവലു എന്നിവരുടെ പേരുകളാണ് സിപിഎം സെക്രട്ടറി സ്ഥാനത്തേക്ക് പരിഗണിക്കുന്നത്. പാര്‍ട്ടികോണ്‍ഗ്രസില്‍ മാത്രമേ ഇത് സംബന്ധിച്ച് അന്തിമ തീരുമാനമുണ്ടാകു.
നിലവില്‍ ഒന്നാമത്തെ സാധ്യത സീതാറാം യെച്ചൂരിക്കാണ്. പ്രകാശ് കരാട്ട് കഴിഞ്ഞാല്‍ പാര്‍ട്ടിയുടെ ജനസ്വീകാര്യനായ നേതാവ് യെച്ചൂരിയാണ്. പാര്‍ലമന്റിലും പുറത്തും യെച്ചൂരിക്കുള്ള ബന്ധം പ്രകാശ് കരാട്ടിനെപ്പോലും കടത്തി വെട്ടുന്നതാണ്. ബംഗാളില്‍ നിന്നുള്ള രാജ്യസഭാംഗമാണ് യെച്ചൂരി. അഖിലേന്ത്യാ സെക്രട്ടറി ആകുന്നതോടെ ഇരട്ടപദവി ആകുമെന്നതിനാല്‍ എംപി സ്ഥാനം രാജിവെക്കേണ്ടി വന്നേക്കാം. എന്നാല്‍, പകരമായി അംഗത്തെ രാജ്യസഭയില്‍ എത്തിക്കാന്‍ നിലവിലെ കക്ഷിനില വച്ച് സിപിഎമ്മിന് സാധിക്കില്ല. അതുകൊണ്ട് സീതാറാം യച്ചൂരിയെ പാര്‍ലമെന്ററി രംഗത്ത് നിലനിര്‍ത്താനാണ് പാര്‍ട്ടി ആലോചിക്കുന്നത്.മാത്രമല്ല പാര്‍ട്ടി നേതൃത്വത്തിനെതിരെ ബദല്‍ രേഖ തയ്യാറാക്കിയത് വഴി സീതാറാം യെച്ചൂരി നേതൃത്വത്തിന് അനഭിമതനാണ്. കേരളത്തില്‍ വിഎസിന്റെ രക്ഷകനായി എത്തുന്ന യെച്ചൂരിയെ കേരളത്തിലെ നേതാക്കള്‍ക്കും അത്രയ്ക്ക് താല്‍പ്പര്യമില്ല. യെച്ചൂരിക്ക് തിരിച്ചടിയാകുന്ന മറ്റൊരു ഘടകം പാര്‍ലമെന്ററി പാര്‍ട്ടി നേതൃത്വമാണ്.
വൃന്ദാ കാരാട്ടാണ് സെക്രട്ടറിയാകാന്‍ സാധ്യതയുള്ള മറ്റൊരു പോളിറ്റ്ബ്യൂറോ അംഗം. എന്നാല്‍, വ്യന്ദക്ക് സെക്രട്ടറി സ്ഥാനത്തോട് താല്‍പര്യമില്ലെന്നാണ് റിപ്പോര്‍ട്ട്. വ്യന്ദയെ പാര്‍ട്ടി സെക്രട്ടറിയാക്കിയാല്‍ സിപിഎമ്മിന്റെ  തന്നെ ചരിത്രത്തിലാദ്യമായിരിക്കും ഇത്തരത്തിലുള്ള നടപടി. ഇതിനാല്‍ ലോകത്തിന്റെ ശ്രദ്ധ പിടിച്ചുപറ്റുവാന്‍ സിപിഎമ്മിന് കഴിയും. മാദ്ധ്യമങ്ങളോട് അടുത്ത നിലപാട് സ്വീകരിക്കുന്ന വൃന്ദ സെക്രട്ടറിയായാല്‍ അത് പാര്‍ട്ടിക്ക് ഉണര്‍വ് നല്‍കുമെന്ന് കരുതുന്നവരും പാര്‍ട്ടിയിലുണ്ട്. എന്നാല്‍, ഇക്കാര്യത്തില്‍ യെച്ചൂരിയുടെയും മറ്റ് നേതാക്കളുടെയും നിലപാടും നിര്‍ണ്ണായകമാണ്.
ഒരു തവണ സെക്രട്ടറി പദവി വഹിക്കാനുള്ള താല്‍പ്പര്യം എസ് രാമചന്ദ്രന്‍പിള്ള പ്രകടിപ്പിച്ചിട്ടുണ്ട്. ഇതിന് എതിര്‍പ്പുമായി അധികമാരുമില്ല. എങ്കിലും വടക്കേ ഇന്ത്യയിലെ നേതാക്കള്‍ക്ക് കൂടുതല്‍ താല്‍പ്പര്യം യെച്ചൂരിയോടാണ്. പോളിറ്റ്ബ്യൂറോ അംഗമായ ബി വി രാഘവുലുവിന്റെ പേരും സെക്രട്ടറി സ്ഥാനത്തേക്ക് പറഞ്ഞു കേള്‍ക്കുന്നുണ്ട്.എന്നാല്‍, പാര്‍ലമെന്ററി പാര്‍ട്ടി കാര്യങ്ങള്‍ പറഞ്ഞ് യെച്ചൂരിയെ അകറ്റി നിര്‍ത്താനുള്ള ശ്രമവുമുണ്ട്. അതേസമയം പാര്‍ട്ടി നല്‍കുന്ന ഏത് ഉത്തരവാദിത്വവും ഏറ്റെടുക്കാന്‍ തയ്യാറെന്ന് സിപിഐഎം പിബി അംഗം സീതാറാം യെച്ചൂരി പറഞ്ഞു. പാര്‍ട്ടിയില്‍ സ്ഥാനമാനങ്ങളല്ല വലുതെന്നും കമ്മ്യൂണിസ്റ്റുകാര്‍ പദവി ആഗ്രഹിച്ചല്ല പ്രവര്‍ത്തിക്കുന്നതെന്നും അദ്ദേഹം വ്യക്തമാക്കിയിട്ടുണ്ട്. തന്റെ ജീവിതത്തില്‍ പാര്‍ട്ടി പറഞ്ഞ കാര്യങ്ങള്‍ നിറവേറ്റിയിട്ടുണ്ടെന്നും യെച്ചൂരി കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha