സീതാറാം യെച്ചൂരി സിപിഎം ജനറല് സെക്രട്ടറി, കേരള ഘടകവും അനുകൂലിച്ചതായി സൂചന
സി പി എമ്മിന്റെ ചരിത്രത്തില് മുന്പെങ്ങുമുണ്ടാകാത്ത ആകാംക്ഷയ്ക്ക് വിരാമമിട്ട് പുതിയ പാര്ട്ടി ജനറല് സെക്രട്ടറിയെ നിശ്ചയിച്ചു. സീതാറാം യെച്ചുരിയാകും ഇനി സിപിഎമ്മിനെ നയിക്കുക. വിശാഖപട്ടണം പാര്ട്ടി കോണ്ഗ്രസില് കേരളാ ഘടകത്തിന്റെ നീക്കങ്ങള്ക്ക് ഏറ്റ തിരിച്ചടികൂടിയാണ് ഇത്. ബംഗാള് ഘടകവും ത്രിപുര മുഖ്യമന്ത്രി മണിക് സര്ക്കാരും യെച്ചൂരിക്കായി അണിനിരന്നപ്പോള് പിണറായി വിജയന്റേയും കോടിയേരി ബാലകൃഷ്ണന്റേയും നീക്കങ്ങള് പാളി. എസ് രാമചന്ദ്രന് പിള്ളയുടെ പേരുയര്ത്തി യെച്ചൂരിയെ പ്രതിരോധിക്കാനുള്ള മുന് ജനറല് സെക്രട്ടറി പ്രകാശ് കാരാട്ടിന്റെ നീക്കവും ഫലം കണ്ടില്ല. ഇതോടെ മത്സരമൊഴിവാക്കി യെച്ചൂരിയെ ജനറല് സെക്രട്ടറിയാക്കാന് കേന്ദ്ര നേതൃത്വത്തില് ധാരണയായി. വോട്ടെടുപ്പ് നടന്നാല് യെച്ചൂരി ജയിക്കുമെന്ന് മനസ്സിലാക്കി പ്രകാശ് കാരാട്ടും അവസാന നിമിഷം പിന്മാറി. ഇതിനിടെ മത്സരത്തിലൂടെ ജനറല് സെക്രട്ടറിയാകാനില്ലെന്ന് എസ് രാമചന്ദ്രന് പിള്ളയും വ്യക്തമാക്കി.
1974ല് എസ്.എഫ്.ഐയിലൂടെ യെച്ചൂരി തന്റെ പ്രവര്ത്തനം ആരംഭിച്ചത്. ജെഎന്യുവിലെ പഠനത്തിനിടയില് അടിയന്തരാവസ്ഥക്കെതിരെ പ്രധിഷേധം ഉയര്ത്തിയതിനെ തുടര്ന്ന് അറസ്റ്റിലായി. മൂന്നു തവണ യെച്ചൂരിയെ ജെഎന്യു വിദ്യാര്ഥി യൂണിയന് പ്രസിഡണ്ടായി തെരഞ്ഞെടുത്തു.
1978 ല് എസ്.എഫ്.ഐ അഖിലേന്ത്യാ ജോയിന്റ് സെക്രട്ടറി ആയി തെരഞ്ഞെടുക്കപ്പെട്ട യെച്ചൂരി അതെ വര്ഷം തന്നെ എസ്.എഫ്.ഐ അഖിലേന്ത്യാ പ്രസിഡണ്ടായും തെരഞ്ഞെടുക്കപ്പെട്ടു. 1985ല് സിപിഎം കേന്ദ്രകമ്മിറ്റിയിലേക്ക് തിരഞ്ഞെടുക്കപ്പെട്ട യെച്ചൂരി 1992 മുതല് സിപിഎം പോളിറ്റ് ബ്യൂറോ അംഗമാണ്.
അന്താരാഷ്ട്രവിഷയങ്ങളുടെ സിപിഎം തലവനും പാര്ട്ടി മുഖപ്പത്രമായ പീപ്പിള് ഡെമോക്രസിയുടെ എഡിറ്ററും കൂടി ആണ് യെച്ചൂരി. വാഗ്മിയും നയതന്ത്രജ്ഞനും ആയ യെച്ചൂരി, നേപ്പാളില് മാവോയിസ്റ്റുകളെ ജനതിപത്യത്തിന്റെ പാതയിലേക്ക് നയിക്കുന്നതിനായി ഒരു മധ്യസ്ഥന് എന്ന നിലയില് നടത്തിയ ഇടപെടലുകള് പ്രശംസാര്ഹമായതായിരുന്നു.
ആഗോളവല്ക്കരണ ഉദാര വല്ക്കരണ നയങ്ങളുടെ പൊള്ളത്തരങ്ങള് തുറന്നു കാണിക്കുന്ന നിരവധി രചനകള് സീതാറാം യെച്ചൂരി നടത്തിയിട്ടുണ്ട്. \'ആഗോളവല്ക്കരണ കാലത്തെ സോഷ്യലിസം\' എന്ന പുസ്തകം ഇതിനു മികച്ച ഉദാഹരണമാണ്. യുപിഎ ഭരണത്തില് ഇന്ത്യയില് ഉയര്ന്നു വന്ന അഴിമതികളള് പലതും ആദ്യമേ തന്നെ പാര്ലമെന്റില് ഉയര്ത്തിയത് യെച്ചൂരിയായിരുന്നു. മികച്ച പാര്ലമെന്റെറിയന് കൂടിയാണ് അദ്ദേഹം. പത്രപ്രവര്ത്തകയായ സീമ ക്രിസ്റ്റിയാണ് യച്ചൂരിയുടെ ഭാര്യ.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha