ഇനിയും കുലുങ്ങുമോ എന്താകും, എന്തുചെയ്യണം ഭീതിയോടെ ഒന്നും ചോദിക്കാതെ എല്ലാ മുഖങ്ങളും ഒന്നു പോലെ ഇതാണ് ഇപ്പോഴത്തെ ബീഹാറെന്ന് ഗജീന്ദര്‍ സിംഗ്. ഏകദേശം 12.30 ആയതോടെ ഇടിമുഴക്കം പോലൊരു ശബ്ദം കേട്ടു പിന്നെ മനസ്സിലായി വീണ്ടും ഭൂചലനം എത്തുകയാണെന്ന് എല്ലാവരും ഓടി കൂട്ടത്തില്‍ ഞാനും സംഭവം വിവരിക്കുമ്പോള്‍ നാട്ടുകാരനായ ഗജീന്ദറിന്റെ മുഖത്ത് ഭീതി കാണാം. ഇദ്ദേഹത്തിന്റെ കണ്‍മുന്നിലാണ് കെട്ടിടം തകര്‍ന്നു വീണ് പിഞ്ചു കുഞ്ഞ് മരിക്കുന്നത്. ഒന്നു നോക്കാന്‍ പോലുമായില്ലെന്ന് ഗജീന്ദര്‍ വിലപിക്കുന്നു. വെറുതെയുള്ള ഒരു കുലക്കമല്ല ബീഹാറിലെ ഭൂചലനം. സത്യത്തില്‍ പ്രകൃതി സംഹാര താണ്ഡവമാടുകയാണ്. എല്ലാവരും നിസഹായര്‍, ഓട്ടം മാത്രം രക്ഷ. ഏപ്രില്‍ 25നുണ്ടായ ഭൂചലനത്തെ തുടര്‍ന്ന് അമ്പതിലേറെ പേരാണ് ബിഹാറില്‍ മരിച്ചത്. അതിന്റെ ഭീതി മാറും മുമ്പാണ് അടുത്തത്. പണക്കാരനും പാവപ്പെട്ടവനും ഒഴിഞ്ഞ സ്ഥലത്ത് നില്‍ക്കുകയാണ് തുടര്‍ ചലനങ്ങളെ ഭയന്ന്. ഇന്നത്തെ ഭൂചലനത്തില്‍ ഇതിനോടകം ബിഹാറില്‍ രണ്ടു പേര്‍ മരിച്ചതായി റിപ്പോര്‍ട്ടുണ്ട്. മരണ സംഖ്യ ഉയരാനും സാധ്യത യെന്നാണ് റിപ്പോര്‍ട്ട്.
ദനപുരയിലെ ആനന്ദ് ബസാറിലും വൈശാലിയിലെ മഹുവയിലുമാണ് മരണം റിപ്പോര്‍ട്ട് ചെയ്തിരിക്കുന്നത്. ആനന്ദ് ബസാറില്‍ കെട്ടിടം തകര്‍ന്നുവീണ് തൊഴിലാളിയും മഹുവയില്‍ ഒരു ബാലികയുമാണ് മരിച്ചത്. ബിഹാറില്‍ 12.36നും 1.09നുമായി രണ്ട് ഭൂചലനങ്ങളാണ് അനുഭവപ്പെട്ടത്.
ഭൂചലനത്തെ തുടര്‍ന്ന് ആളുകള്‍ വീടുകളില്‍ നിന്ന് തുറസ്സായ സ്ഥലത്തേക്ക് ഓടി. നഗരത്തിലെ കെട്ടിടങ്ങളില്‍ ഉണ്ടായിരുന്നവര്‍ ഗാന്ധി മൈതാനിയിലും എക്കോ പാര്‍ക്കിലും തമ്പടിച്ചിരിക്കുകയാണ്.
വടക്കന്‍ ബിഹാറിലെ ഈസ്റ്റ് ചമ്പാരണ്‍, വെസ്റ്റ് ചമ്പാരണ്‍, സിതമാര്‍ഹി, മധുബനി, സുപൗള്‍, അരാരിയ എന്നിവിടങ്ങളിലാണ് ഭൂചലനം ഏറ്റവും ഭീതി വിതച്ചത്. നേപ്പാള്‍ അതിര്‍ത്തിയോട് ചേര്‍ന്നുള്ള പ്രദേശങ്ങളാണിവ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha