നിയമസഹായം തേടാന് പൊലിസ് അനുവദിക്കുന്നില്ല; തനിക്ക് വസ്ത്രങ്ങളുമായി എത്തിയവര്ക്കെതിരെ പോലും കേസെടുത്തെന്ന് പ്രിയങ്ക; പ്രിയങ്കാ ഗാന്ധിയുടെ മോചനത്തിനായി രാജ്യവ്യാപകമായി പ്രക്ഷോഭം ശക്തമാക്കി കോണ്ഗ്രസ്
അറസ്റ്റിലായ എ.ഐ.സി.സി ജനറല് സെക്രട്ടറി പ്രിയങ്കാ ഗാന്ധിയുടെ മോചനത്തിനായി കോണ്ഗ്രസ് പ്രക്ഷോഭം ശക്തമാക്കി. പ്രിയങ്ക തടവിലാക്കപ്പെട്ട സീതാപുര് പൊലിസ് കേന്ദ്രത്തിന് പുറത്താണ് മെഴുകുതിരി കത്തിച്ചും പന്തം കൊളുത്തിയും കോണ്ഗ്രസ് പ്രവര്ത്തകരുടെ പ്രതിഷേധം. അതിനിടെ അറസ്റ്റ് രേഖപ്പെടുത്തിയ വിവരം ഇതുവരെയും പൊലിസ് ഉദ്യോസ്ഥര് പ്രിയങ്കയെ അറിയിച്ചിട്ടില്ലാത്തതിനാല് നിയമവിരുദ്ധമായാണ് തടങ്കലിലാക്കിയതെന്ന് കോണ്ഗ്രസ് ആരോപിച്ചു. അറസ്റ്റ് സംബന്ധിച്ച് ഔദ്യോഗികമായ ഒരറിയിപ്പുമില്ലെന്ന് പ്രിയങ്ക ഗാന്ധിയും പ്രതികരിച്ചു. തനിക്ക് വസ്ത്രങ്ങളുമായി എത്തിയവര്ക്കെതിരെ പോലും കേസെടുത്തു. കൂടാതെ, തന്നെ ഇത് വരെയും മജിസ്ട്രേട്ടിന് മുന്നില് ഹാജരാക്കിയിട്ടുമില്ല. നിയമസഹായം തേടാന് തന്നെ പൊലിസ് അനുവദിക്കുന്നില്ലെന്നും പ്രിയങ്ക പറഞ്ഞു.
30 മണിക്കൂറിലധികം നീണ്ട കരുതല് തടങ്കലിനൊടുവിലാണ് പ്രിയങ്ക ഗാന്ധിയെ പൊലിസ് അറസ്റ്റ് ചെയ്തത്. സമാനാന്തരീക്ഷത്തിന് ഭംഗം വരുത്തിയെന്ന കുറ്റമാണ് പ്രിയങ്ക ഗാന്ധി, ദിപേന്ദര് സിംഗ് ഹൂഡ, ഉത്ത!ര്പ്രദേശ് പിസിസി അധ്യക്ഷന് അജയ് കുമാര് ലല്ലു എന്നിവരടക്കം 11 കോണ്ഗ്രസ് നേതാക്കള്ക്കെതിരെ പൊലിസ് കേസെടുത്തത്. ക്രമസമാധാനം തകര്ക്കാന് ശ്രമിച്ചെന്ന് ആരോപിച്ചാണ് നേതാക്കള്ക്കെതിരെ കേസെടുത്തത്. കൊല്ലപ്പെട്ട കര്ഷകരുടെ കുടുംബാംഗങ്ങളെ സന്ദര്ശിക്കാന് കാല്നടയായി ലഖിംപൂരിലേക്ക് പോകുന്നതിനിടെയാണ് ഇവരെ യു.പി പൊലിസ് തടഞ്ഞത്. പ്രിയങ്കയെ പുരുഷ പൊലിസ് ഉദ്യോഗസ്ഥരാണ് അറസ്റ്റ് ചെയ്തത് എന്നത് നാണക്കേടുണ്ടാക്കുന്ന കാര്യമാണെന്ന് പി .ചിദംബരം പ്രതികരിച്ചു.അതേസമയം, ലഖിംപൂര് സംഭവത്തില് കേന്ദ്ര ആഭ്യന്തരസഹമന്ത്രിയായ അജയ് മിശ്രയ്ക്കെതിരെയും പൊലിസ് കേസെടുത്തിരുന്നു. എന്നാല്, ലഖീംപൂര് സംഭവം എങ്ങനെയുണ്ടായെന്ന് അറിയില്ലെന്ന വിശദീകരണവുമായി കേന്ദ്ര സഹമന്ത്രി അജയ് മിശ്ര രംഗത്തെത്തി. കര്ഷകര്ക്കിടയിലേക്ക് വാഹനം ഓടിച്ചുകയറ്റുന്നതിന്റെ ദൃശ്യങ്ങള് പുറത്തുവന്നതിന് പിന്നാലെയാണ് അജയ് മിശ്രയുടെ പ്രതികരണം. ദൃശ്യങ്ങള് ആയുധമാക്കിയ പ്രിയങ്ക ഗാന്ധി , സംഭവത്തില് പ്രധാനമന്ത്രി മാപ്പ് പറയണമെന്ന് ആവശ്യപ്പെട്ടിരുന്നു. എന്നാല് കര്ഷകര്ക്കാര്ക്കും വെടിയേറ്റില്ലെന്നാണ് പോസ്റ്റുമോര്ട്ടം റിപ്പോര്ട്ട്.
പ്രതിഷേധിച്ച് മുന്നോട്ട് പോകുന്ന കര്ഷകര്ക്കിയിലേക്ക് ഒരു ജീപ്പും മറ്റൊരു വാഹനവും ഇടിച്ചു കയറ്റുന്നതും ഇതേത്തുടര്ന്ന് വാഹനം നിറുത്തി ഒരാള് ഇറങ്ങി ഓടുന്നതിന്റെയും ദൃശ്യങ്ങളാണ് കോണ്ഗ്രസ് നേതാക്കള് പുറത്തു വിട്ടത്. ദൃശ്യങ്ങള് യഥാര്ത്ഥമാണോ എന്ന് സ്ഥിരീകരിക്കാന് പൊലിസ് തയ്യാറായിട്ടില്ല. വാഹനം ആക്രമിക്കുന്ന സൂചന ഈ ദൃശ്യങ്ങളില് ഇല്ല. ദൃശ്യങ്ങള് പ്രതിപക്ഷത്തിന് ആയുധമായി. ലക്നൗവില് എത്തിയ പ്രധാനമന്ത്രി ഇതേക്കുറിച്ച് പ്രതികരിക്കാത്തതെന്തെന്നും പ്രിയങ്ക ഗാന്ധി ചോദിച്ചു.
https://www.facebook.com/Malayalivartha