പുതുവര്‍ഷത്തിന്റെ തുടക്കത്തില്‍തന്നെ ചൈന ഇന്ത്യയ്ക്കെതിരെ അതിത്തിയിലുടനീളം യുദ്ധത്തിന് കോപ്പുകൂട്ടുകയാണ്. ഇന്ത്യന്‍ അതിര്‍ത്തിയില്‍ തുടര്‍ച്ചയായ കടന്നേറ്റത്തിനു മുതിരുന്നതിനൊപ്പം പാക്കിസ്ഥാന് ആയുധസന്നാഹം ഒരുക്കി നല്‍കി ഒരേ സമയം ഇരുരാജ്യങ്ങളും ഇന്ത്യയ്ക്കെതിരെ ആക്രമണനീക്കം നടത്തുകയാണ്.


അരുണാചല്‍ പ്രദേശ് ചൈനയുടെ പ്രദേശമാണെന്നും സംസ്ഥാനം അപ്പാടെ തങ്ങള്‍ക്കു വേണമെന്നുമുള്ള നിലപാടിലാണ് ഇന്ത്യയ്ക്കെതിരെ അതിര്‍ത്തിയില്‍ അസ്വസ്ഥതയുടെ വിത്തു വിതച്ചുകൊണ്ടിരിക്കുന്നത്. സൈനികര്‍ക്കു പുറമെ അരുണാചല്‍ അതിര്‍ത്തിയിലേക്ക് ആയുധനീക്കവും ചൈന നടത്തിക്കൊണ്ടിരിക്കുന്നു.

അതിര്‍ത്തി ഇന്ത്യന്‍ സംസ്ഥാനമായ അരുണാചല്‍ പ്രദേശിലെ 15 സ്ഥലങ്ങളുടെ പേര് പുതുവര്‍ഷത്തില്‍ മാറ്റിയതിനു പിന്നാലെ അതിര്‍ത്തിമേഖലയില്‍ യുദ്ധ സന്നാഹമൊരുക്കി ഇന്ത്യയെ പ്രകോപിക്കുകയാണ് ചൈന. കടുത്ത മഞ്ഞുവീഴ്ചയും ഒപ്പം മലയിടിച്ചിലുള്ള സമയമായതിനാല്‍ ചൈനയ്ക്ക് തന്ത്രപരമായി അരുണാചല്‍ പ്രദേശിലേക്ക് കടന്നുവരാനാകുമെന്നതാണ് അവര്‍ക്ക് അനുകൂലമായിരിക്കുന്നത്.


അരുണാചല്‍ അതിര്‍ത്തി പ്രദേശങ്ങളിലെ ഗ്രാമങ്ങള്‍ക്കും മലകള്‍ക്കും പുഴകള്‍ക്കും ചൈനീസ്, ടിബറ്റന്‍, റോമന്‍ ഭാഷകളില്‍ 15 പുതിയ സ്ഥലപ്പേരുകള്‍ ചൈനയുടെ സിവില്‍ അഫയേഴ്‌സ് മന്ത്രാലയം പ്രസിദ്ധപ്പെടുത്തിക്കഴിഞ്ഞു. ഇതിനൊപ്പം ഇന്ത്യന്‍ അതിര്‍ത്തിക്കുള്ളിലെ കൂടുതല്‍ പ്രദേശങ്ങള്‍ക്ക് ചൈനീസ് പേരുകള്‍ നല്‍കാനുള്ള നീക്കത്തിലാണ് മഞ്ഞപ്പട.ദക്ഷിണ ടിബറ്റ് എന്നാണ് ചൈന, അരുണാചല്‍ പ്രദേശിനെ കാലങ്ങളായി വിശേഷിപ്പിച്ചുകൊണ്ടിരിക്കുന്നത്.

ഹോങ്കോഗിനെ വിഴുങ്ങാന്‍ ശ്രമിക്കുന്നതുപോലെ ഇന്ത്യയിലെ വടക്കുകിഴക്കന്‍ സംസ്ഥാനങ്ങളിലെ മൂന്നു സംസ്ഥാനങ്ങള്‍ക്കൂടി വരുതിയിലാക്കാന്‍ ഏറെക്കാലമായി ചൈനയ്ക്ക് ആഗ്രഹമുണ്ട്. അതിര്‍ത്തിയില്‍ പുതിയതായി നല്‍കിയിരിക്കുന്ന 15 പേരുകളില്‍ എട്ടെണ്ണം ജനവാസ മേഖലകള്‍ക്കും നാലെണ്ണം പര്‍വതങ്ങള്‍ക്കും രണ്ടെണ്ണം നദികള്‍ക്കും ഒരെണ്ണം ചുരത്തിനുമാണ് ചൈന നനല്‍കിയിരിക്കുന്നതെന്ന് ചൈനീസ് സര്‍ക്കാര്‍ ഉടമസ്ഥതയിലുള്ള ഗ്ലോബല്‍ ടൈംസ് ദിനപ്പത്രം റിപ്പോര്‍ട്ട് ചെയ്തു.


അരുണാചല്‍ പ്രദേശിലെ ഷാനാന്‍ പ്രവിശ്യയിലെ കോന കൗണ്ടിയിലുള്ള സെങ്കെസോംഗ്, ഡാഗ്ലുങ്സോംഗ്, ലുന്‍സെ കൗണ്ടിയിലുള്ള മെജാഗ്, നൈഞ്ചി പ്രവിശ്യയിലെ മെഡോഗ് കൗണ്ടിയിലുള്ള മണിഗാങ്, ഡൂഡിംഗ്, മിഗ്പെയിന്‍, ഗോലിംഗ്, അതേ പ്രവിശ്യയിലെ സായു കൗണ്ടിയിലുള്ള ഡാംബ, എന്നിവയാണ് പേര് മാറ്റുന്ന ജനവാസകേന്ദ്രങ്ങള്‍. ഇതിനൊപ്പം നാലു പര്‍വതങ്ങളുടെയും രണ്ടു നദികളുടെയും പേരുകളും ചൈന മാറ്റിയിരിക്കുന്നു.
2017ലെ ദലൈലാമയുടെ ഇന്ത്യന്‍ സന്ദര്‍ശനത്തിന് തൊട്ടുപിന്നാലെ അരുണാചല്‍ പ്രദേശില്‍ ആറ് സ്ഥലങ്ങള്‍ക്ക് ചൈനീസ് പേരുകള്‍ നല്‍കിയിരുന്നു.

2021 ഒക്ടോബര്‍ 23 ന് 'ാന്‍ഡ് ബോര്‍ഡേഴ്‌സ് ലോ എന്ന പുതിയ അതിര്‍ത്തി നിയമം ചൈന പാസാക്കിയിരുന്നു. 2022 ജനുവരി ഒന്നു മുതല്‍ ഈ നിയമം പ്രാബല്യത്തില്‍ വന്നതിനു മുന്നോടിയായാണ് അരുണാചല്‍ പ്രദേശിലെ അതിര്‍ത്തി ഗ്രാമങ്ങളുടെയും നദികളുടെയും മറ്റും പേര് മാറ്റാനുള്ള തന്ത്രപരമായ നീക്കം നടത്തിവരുന്നത്.
ഇന്ത്യ മാത്രമല്ല റഷ്യ, ഉത്തര കൊറിയ, ഭൂട്ടാന്‍, മംഗോളിയ തുടങ്ങി നിരവധി രാജ്യങ്ങളുമായി അതിര്‍ത്തി പങ്കിടുന്ന രാജ്യമാണ് ചൈന. ഇതില്‍ ഇന്ത്യയ്ക്കെതിരെ നീക്കം നടത്താനാണ് എക്കാലത്തും ചൈനയുടെ താല്‍പര്യം. ഉത്തരകൊറിയയ്ക്കും റഷ്യയ്ക്കും നേരേ തിരിഞ്ഞാല്‍ ശക്തമായ തിരിച്ചടി ലഭിക്കുമെന്നതിനാല്‍ ഇന്ത്യന്‍ അതിര്‍ത്തിയില്‍ മാത്രമാണ് ചൈനയുടെ കടന്നേറ്റവും സൈനിക അഭ്യാസവും പതിവായിരിക്കുന്നത്.

കിഴക്കന്‍ ലഡാക്കിലെ നിയന്ത്രണ രേഖയില്‍ ഇന്ത്യയും ചൈനയും തമ്മില്‍ 2020 മെയ് മാസത്തില്‍ തുടങ്ങിയ സംഘര്‍ഷത്തിന്റെ പശ്ചാത്തലത്തിലാണ് ചൈനയുടെ ഏറ്റവും പുതിയ നടപടി എന്നതാണ് ഇന്ത്യയെ ആശങ്കയിലാഴ്ത്തിയിരിക്കുന്നത്. ഇരു വിഭാഗങ്ങളിലേയും നിരവധി സൈനികരാണ് ആക്രമണത്തില്‍ കൊല്ലപ്പെട്ടത്.
ടിബറ്റിന്റെ തെക്കന്‍ ഭാഗം പുരാതന കാലം മുതല്‍ തങ്ങളുടെ പ്രദേശമാണെന്നും അരുണാചലിന്റെ ഭാഗമായ സ്ഥലങ്ങള്‍ക്ക് ചൈനീസ് പേര് പ്രഖ്യാപിച്ചത് പിന്‍വലിക്കില്ലെന്നുമാണ് ചൈനയുടെ നിലപാട്.