കനത്തമഴയെത്തുടര്‍ന്ന് വെള്ളപ്പൊക്കം രൂക്ഷമായ ചെന്നൈയില്‍ പ്രമുഖ ടാക്‌സി ഓപ്പറേറ്റര്‍മാര്‍ ബോട്ട് സര്‍വീസ് ആരംഭിച്ചു. തമിഴ്‌നാട് അഗ്നിശമന സേനാ വിഭാഗത്തിന്റെ അഭ്യര്‍ഥന മാനിച്ചാണ് ബോട്ട് സര്‍വീസ് ആരംഭിച്ചിരിക്കുന്നത്. പ്രെഫഷണല്‍ തുഴച്ചില്‍ക്കാരെയും രക്ഷാപ്രവര്‍ത്തകരെയും ഉള്‍പ്പെടുത്തിയാണ് ബോട്ട് സര്‍വീസ് ആരംഭിച്ചിരിക്കുന്നത്. ബോട്ടില്‍ ഭക്ഷണവും വെള്ളവും നല്‍കുന്നുണ്ട്. ഒമ്പതു പേരെ ഉള്‍ക്കാള്ളാന്‍ കഴിയുന്നതാണ് ബോട്ടുകള്‍. മൂന്നു ദിവസത്തേക്കാണു ബോട്ട് സര്‍വീസ് ഏര്‍പ്പെടുത്തിയിരിക്കുന്നതെങ്കിലും മഴ തുടര്‍ന്നാല്‍ സേവനം തുടരുമെന്നു കമ്പനി അധികൃതര്‍ പറഞ്ഞു. 

കനത്ത മഴയില്‍ മരണസംഖ്യ 71 ആയിട്ടുണ്ട്. ചെന്നൈ നഗരത്തില്‍ മിക്ക ഭാഗങ്ങളിലും വെള്ളം കയറിയിട്ടുണ്ട്. നഗരത്തില്‍ സ്വകാര്യ സ്ഥാപനങ്ങള്‍ക്കുള്‍പ്പടെ അവധി പ്രഖ്യാപിച്ചിട്ടുണ്ട്. സംസ്ഥാനത്തെ 15 ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് സര്‍ക്കാര്‍ അവധി പ്രഖ്യാപിച്ചു.

അടുത്ത മൂന്ന് ദിവസത്തേയ്ക്ക് കൂടി തമിഴ്‌നാട്, പുതുച്ചേരി, തീരദേശ ആന്ധ്ര എന്നിവിടങ്ങളില്‍ കനത്ത മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം നല്‍കുന്ന മൂന്നറിയിപ്പ്. സ്ഥിതിഗതികള്‍ നിരീക്ഷിക്കാന്‍ മുതിര്‍ന്ന ഐഎഎസ് ഉദ്യോഗസ്ഥരെ സര്‍ക്കാര്‍ നിയോഗിച്ചിട്ടുണ്ട്. ചെന്നൈയില്‍ ട്രാക്കില്‍ വെള്ളം കയറിയതിനാല്‍ ലോക്കല്‍ ട്രെയിനുകളുടെ പ്രവര്‍ത്തനം തടസപ്പെട്ടു.

ചെമ്പരമ്പാക്കം തടാകത്തിലെ വെള്ളം തുറന്നുവിട്ടത് ഭീഷണി സൃഷ്ടിക്കുന്നുണ്ട്. ശനിയാഴ്ച്ച രാത്രി മുതല്‍ ചെറിയ ഇടവേളകളൊഴിച്ചാല്‍ നഗരത്തില്‍ കനത്ത മഴ തുടരുകയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha