പേപ്പട്ടികളെയും അപകടകാരികളായ തെരുവുനായ്ക്കളെയും കൊല്ലാന്‍ തദ്ദേശസ്ഥാപനങ്ങള്‍ക്ക് അനുമതി നല്‍കി സുപ്രീംകോടതിയുടെ ഇടക്കാല ഉത്തരവ്. മൃസംരക്ഷണവുമായി ബന്ധപ്പെട്ട ചട്ടങ്ങള്‍ കര്‍ശനമായി പാലിച്ചു മാത്രമേ നായ്ക്കളെ കൊല്ലാന്‍ പാടുള്ളൂവെന്ന് ഇടക്കാല ഉത്തരവില്‍ ജസ്റ്റിസുമാരായ ദീപക് മിശ്ര, എസ്.കെ. സിങ് എന്നിവരടങ്ങുന്ന ബെഞ്ച് വ്യക്തമാക്കി.

ഇടക്കാല ഉത്തരവിന്റെ പകര്‍പ്പ് എല്ലാ സംസ്ഥാനങ്ങളിലെയും ചീഫ് സെക്രട്ടറിമാര്‍ക്ക് അയച്ചുകൊടുക്കാന്‍ സുപ്രീംകോടതി നിര്‍ദേശിച്ചു. അന്തിമവിധി വരുംവരെ ഹൈക്കോടതികള്‍ തെരുവുനായയുമായി ബന്ധപ്പെട്ട ഹര്‍ജികള്‍ പരിഗണിക്കുകയോ ഉത്തരവ് പുറപ്പെടുവിക്കുകയോ ചെയ്യരുതെന്നും കോടതി വ്യക്തമാക്കി. എന്നാല്‍, നായ്ക്കളെ കൂട്ടത്തോടെ കൊന്നൊടുക്കുന്നത് അംഗീകരിക്കാനാവില്ലെന്ന് കോടതി പറഞ്ഞു.
അതേസമയം, മനുഷ്യന്റെ ജീവനും പരിഗണന നല്‍കേണ്ടതുണ്ട്. ഭരണപരമായ വീഴ്ചകള്‍ കാരണം മനുഷ്യര്‍ക്ക് നായ്ക്കളുടെ കടിയേല്‍ക്കരുതെന്നും കോടതി ഇടക്കാല ഉത്തരവില്‍ പറഞ്ഞു. അപകടകാരികളായ തെരുവുനായകളെ കൊല്ലാന്‍ തദ്ദേശസ്ഥാപനങ്ങള്‍ക്ക് അനുമതി നല്‍കിയ കേരള ഹൈക്കോടതി ഉത്തരവ് ചോദ്യംചെയ്ത് സമര്‍പ്പിച്ച ഹര്‍ജിയിലാണ് സുപ്രീംകോടതിയുടെ ഇടക്കാല ഉത്തരവ്.
തെരുവുനായകളെ പിടിച്ച് സൂക്ഷിക്കുന്നതിനുള്ള കേന്ദ്രങ്ങള്‍ തയ്യാറാക്കാനുള്ള ചുമതല തദ്ദേശഭരണ സ്ഥാപനങ്ങള്‍ക്കാണെന്ന് ചട്ടങ്ങള്‍ ഉദ്ധരിച്ച് കോടതി വ്യക്തമാക്കി. തെരുവുനായ്ക്കളെ പിടിച്ചുകൊണ്ടുപോകാന്‍ ആവശ്യമായ വാഹനങ്ങളും അവയുടെ ജനനനിയന്ത്രണത്തിനുവേണ്ട അടിസ്ഥാനസൗകര്യങ്ങളും തദ്ദേശസ്ഥാപനങ്ങള്‍ ഒരുക്കണം. നിയമം ഇല്ലാത്തതല്ല, അത് കര്‍ശനമായി നടപ്പാക്കാത്തതാണ് തെരുവുനായ ശല്യം കൂടാന്‍ കാരണം. തെരുവുനായ്ക്കളെ കൊല്ലുന്നതിനും മറ്റും തദ്ദേശഭരണ സ്ഥാപനങ്ങള്‍ സ്വീകരിച്ച നടപടികള്‍ വ്യക്തമാക്കി സത്യവാങ്മൂലം സമര്‍പ്പിക്കാനും കോടതി ഉത്തരവായി. തെരുവുനായ്ക്കളുടെ എണ്ണവും വ്യക്തമാക്കണം. അവയെ സംരക്ഷിക്കുന്നതിന് എടുത്ത നടപടികളും രേഖപ്പെടുത്തണം. കേസില്‍ അടുത്തവര്‍ഷം മാര്‍ച്ച് 9ന് അന്തിമവാദം തുടങ്ങും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha