വിവാഹമോചനം കിട്ടിയില്ലെങ്കിലും ഭര്‍ത്താവിന്റെയും വീട്ടുകാരുടെയും പക്കല്‍നിന്ന് സ്ത്രീധനം മടക്കിച്ചോദിക്കാന്‍ ഭാര്യക്ക് അവകാശമുണ്ടെന്ന് സുപ്രീംകോടതി വിധിച്ചു. വിവാഹമോചനം ലഭിക്കുന്നതിനുമുമ്പ് കോടതി ഉത്തരവുപ്രകാരം വേര്‍പിരിഞ്ഞ് താമസിക്കുന്ന സമയത്ത് സ്ത്രീധനം മടക്കിനല്‍കാത്തത് ഗാര്‍ഹികപീഡന നിയമപ്രകാരം കുറ്റകരമാണെന്നും കോടതി വ്യക്തമാക്കി. ത്രിപുര ഹൈക്കോടതിയുടെ ഉത്തരവ് റദ്ദാക്കിക്കൊണ്ടാണ് ജസ്റ്റിസുമാരായ ദീപക് മിശ്ര, പി. സി. പന്ത് എന്നിവരുടെ വിധി. സ്ത്രീധനം മടക്കിനല്‍കിയില്ലെങ്കില്‍ വിശ്വാസവഞ്ചനയ്ക്ക് ക്രിമിനല്‍ നടപടി സ്വീകരിക്കാന്‍ ഭാര്യക്ക് അവകാശമുണ്ടെന്നും രണ്ടംഗബെഞ്ച് വ്യക്തമാക്കി.

സ്ത്രീധനത്തിനുമേല്‍ ഭര്‍ത്താവിനോ കുടുംബത്തിനോ ഒരവകാശവുമില്ലെന്ന് കോടതി വിധിച്ചു. അത് സ്ത്രീക്കുമാത്രം അവകാശപ്പെട്ടതാണ്. ഇഷ്ടമനുസരിച്ച് ഉപയോഗിക്കാം. ഭര്‍ത്താവും വീട്ടുകാരും സൂക്ഷിപ്പുകാര്‍ മാത്രമാണ്. ബുദ്ധിമുട്ടുള്ള സമയത്ത് ഭര്‍ത്താവിന് അവ ഉപയോഗിക്കാമെങ്കിലും തുല്യമൂല്യത്തോടെ അത് മടക്കിനല്‍കണം. വിവാഹമോചനം നേടിയാലും കോടതിയുത്തരവുപ്രകാരം വേര്‍പിരിഞ്ഞ് കഴിയുന്ന കാലത്തെ നടപടി കുറ്റകരമാണെന്ന് കോടതി വിധിച്ചു. കോടതിയുത്തരവുപ്രകാരം വേര്‍പിരിഞ്ഞ് താമസിക്കുമ്പോള്‍ ഗാര്‍ഹിക ബന്ധമില്ലാത്തതിനാല്‍ സ്ത്രീധനം മടക്കിനല്‍കാത്തത് ഗാര്‍ഹികപീഡന നിയമത്തിന്റെ പരിധിയില്‍ വരില്ലെന്നായിരുന്നു കീഴ്‌കോടതിയുടെ കണ്ടെത്തല്‍. ഇതിനോട് ഹൈക്കോടതി യോജിച്ചു. ഇത് ചോദ്യംചെയ്തായിരുന്നു സുപ്രീം കോടതിയിലെ ഹര്‍ജി. ഗാര്‍ഹികപീഡനവുമായി ബന്ധപ്പെട്ട നിയമം സ്ത്രീ സംരക്ഷണത്തിന് വേണ്ടിയുള്ളതാണ്. എല്ലാ വശങ്ങളും പരിശോധിച്ചാണ് ഇതില്‍ തീരുമാനമെടുക്കേണ്ടതെന്നും കോടതി വിശദീകരിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha