പാക് പൗരന്‍മാരായ ഹസനും ഹംസയും പാമ്പുകളുടെ കൂടെയാണ് ജീവിക്കുന്നത്. നൂറിലധികം പാമ്പുകളാണ് ഇവരുടെ വീട്ടില്‍ കുടുംബാംഗങ്ങളെപ്പോലെ കഴിയുന്നത്. ഹംസയ്ക്കും ഹസനും പാമ്പുകളെ വളരെയേറെ ജീവനാണ്. ചെറുപ്പത്തില്‍ ജംഗിള്‍ബുക്ക് ടെലിവിഷന്‍ പരമ്പര കണ്ടതു മുതലാണ് സഹോദരങ്ങള്‍ക്ക് പാമ്പുകളോട് പ്രണയം തുടങ്ങിയത്. പരമ്പര കണ്ടു കാടിനോട് ഇഷ്ടം തോന്നിയ സഹോദരങ്ങള്‍ ആദ്യം ഒരു പാമ്പിനെ സ്വന്തമാക്കി. തുടര്‍ന്ന് ഇത്രയും വര്‍ഷത്തിനിടെ നൂറുകണക്കിന് പാമ്പുകളെ സഹോദരങ്ങള്‍ വാങ്ങിക്കൂട്ടി.
വെറും അഞ്ചു വര്‍ഷം കൊണ്ടാണ് അപുര്‍വ ഇനമായ ആല്‍ബിനോ പൈത്തോണ്‍ അടക്കം നൂറിലധികം പാമ്പുകളെ സഹോദരങ്ങള്‍ സ്വന്തമാക്കിയത്. വീട്ടില്‍ പാമ്പിനെ വളര്‍ത്താന്‍ തുടങ്ങിയതോടെ അയല്‍വാസികള്‍ പരാതിയുമായി അധികൃതരെ സമീപിച്ചു. എന്നാല്‍ ഇപ്പോള്‍ അയല്‍വാസികള്‍ക്കും പരാതിയില്ല. പാമ്പുകള്‍ അയല്‍വാസികളുടെ വീട്ടിലേക്ക് പോകാതെ ശ്രദ്ധിക്കുന്നതാണ് ഏറെ വെല്ലുവിളിയെന്ന് പൈത്തോണ്‍ ബ്രദേഴ്‌സ് എന്ന അപരനാമത്തില്‍ അറിയപ്പെടുന്ന സഹോദരങ്ങള്‍ പറഞ്ഞു.

ഇവരുടെ വീട്ടിലെ വളര്‍ത്തു മൃഗങ്ങളെ കാണാന്‍ ദൂരെ നിന്നുപോലും സന്ദര്‍ശകര്‍ എത്തുന്നുണ്ട്. പാമ്പ് പ്രേമം മൂത്ത് ഇവര്‍ വിദേശത്ത് നിന്നടക്കം അപൂര്‍വ ഇനം പാമ്പുകളെ ഇറക്കുമതി ചെയ്തിട്ടുണ്ട്. കോഴിയും താറാവും എലിയുമൊക്കെയാണ് പാമ്പുകളുടെ ഭക്ഷണം. ഇതിനായി മാസം പതിനയ്യായിരത്തിലധികം രൂപ ഹംസയും ഹസനും ചെലവഴിക്കുന്നു. ചിലപ്പോഴൊക്കെ ആക്രമിച്ചിട്ടുണ്ടെങ്കിലും ഹസന്റെയും ഹംസയുടെയും വളര്‍ത്തു മൃഗങ്ങള്‍ പൊതുവെ പാവങ്ങളാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha