രാജ്യമൊട്ടാകെ നടക്കുന്ന അവയവദാനം നിരീക്ഷിക്കാനും പ്രോത്സാഹിപ്പിക്കാനും അതിനാവശ്യമായ സൗകര്യമൊരുക്കാനും കേന്ദ്രസര്‍ക്കാര്‍ ദേശീയ അവയവദാന രജിസ്ട്രി തുടങ്ങി. ഇതിന്റെ ഉദ്ഘാടനം ന്യൂഡല്‍ഹിയിലെ സഫ്ദര്‍ജങ് ആസ്പത്രിയില്‍ കേന്ദ്ര ആരോഗ്യമന്ത്രി ജെ.പി. നഡ്ഡ വെള്ളിയാഴ്ച നിര്‍വഹിച്ചു.

നാഷണല്‍ ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്റ് ഓര്‍ഗനൈസേഷന്‍ (എന്‍.ഒ.ടി.ടി.ഒ) എന്നാണ് രജിസ്ട്രിക്ക് പേര്. സഫ്ദര്‍ജങ് ആസ്പത്രിയാണ് ഇതിന്റെ ആസ്ഥാനം. അവയവദാനത്തിനുള്ള മാര്‍ഗനിര്‍ദേശങ്ങളും മര്യാദക്രമങ്ങളും ഉള്‍പ്പെടെയുള്ള നയങ്ങള്‍ രൂപവത്കരിക്കുന്നത് എന്‍.ഒ.ടി.ടി.ഒ. ആയിരിക്കും. സംസ്ഥാനതലത്തിലുള്ള സംഘടനകളുമായി ബന്ധം സ്ഥാപിക്കുന്നതിനുള്ള ഉത്തരവാദിത്വവും എന്‍.ഒ.ടി.ടി.ഒയ്ക്കാണ്.
അവയവദാനം, അവയവംമാറ്റിവെക്കല്‍ എന്നീ കാര്യങ്ങളില്‍ പാരാമെഡിക്കല്‍ ജീവനക്കാര്‍ക്കും ആരോഗ്യരക്ഷാപ്രവര്‍ത്തകര്‍ക്കും കേന്ദ്രം പരിശീലനംനല്‍കും. മതപരമായ കാരണങ്ങളാല്‍ അവയവദാനത്തിന് മടിക്കുന്നവരെ കണ്ടെത്തി ബോധവത്കരിക്കാന്‍ ഇവരെ ശീലിപ്പിക്കും.
അവയവദാനത്തിന്റെ പ്രാധാന്യം പാഠ്യപദ്ധതിയില്‍ ഉള്‍പ്പെടുത്തും. അതുവഴി കുട്ടികള്‍ക്ക് ഇതേക്കുറിച്ച് വ്യക്തമായ കാഴ്ചപ്പാട് ലഭിക്കുമെന്ന് രാജ്യത്തെ ആറാം അവയവദാന ദിനാചരണത്തിനെത്തിയവരെ അഭിസംബോധന ചെയ്യവേ അദ്ദേഹം പറഞ്ഞു. രാജ്യമെമ്പാടും നിന്നുള്ള ഒട്ടേറെ അവയവദാതാക്കളെയും കുടുംബങ്ങളെയും ചടങ്ങില്‍ ആദരിച്ചു.

ഇന്ത്യയില്‍ ഓരോ വര്‍ഷവും രണ്ടുലക്ഷം പേര്‍ക്ക് വൃക്കയും ഒരുലക്ഷം പേര്‍ക്ക് കരളും ആവശ്യമുണ്ടെന്നാണ് ആരോഗ്യമന്ത്രാലയത്തിന്റെ കണക്ക്. എന്നാല്‍, ആവശ്യമായതിന്റെ രണ്ടോ മൂന്നോ ശതമാനം അവയവങ്ങളേ ലഭിക്കുന്നുള്ളൂ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha