നമ്മുടെ രാജ്യത്തിൻറെ അഭിമാനമായ വന്ദേ ഭാരത് ട്രെയിനുകൾ ഏറെ അഭിമാനമായിരുന്നു. ഓരോ സംസ്ഥാങ്ങളിലായി വന്ദേ ഭാരതിനെ അവതരിപ്പിച്ചു കൊണ്ട് കേന്ദ്രം വികസനം എത്തിക്കാൻ നോക്കുകയാണ്. മലയാളികളെ സംബന്ധിച്ചും വന്ദേ ഭാരത് വന്നതോടെ മാറ്റങ്ങൾ ഒരുപാടായി. ചരിത്രം വഴി മാറും ചിലർ വരുമ്പോൾ എന്ന് പറയുന്നത് പോലെയാണ് വന്ദേ ഭാരത് വന്നപ്പോൾ കേരളത്തിലെ അവസ്ഥ. ഇപ്പോഴിതാ വീണ്ടും വന്ദേ ഭാരത സ്ലീപ്പറുകൾ അതിനേക്കാൾ ഗംഭീരമായിട്ടാവും അവതരിപ്പിക്കാൻ കേന്ദ്രം ഒരുങ്ങുന്നത്. രണ്ടുമാസത്തിനുള്ളിൽ ട്രാക്കിലെത്തുന്ന വന്ദേ ഭാരത് സ്ലീപ്പർ ട്രെയിനിൻ്റെ പുറംകാഴ്ചകളിലും മാറ്റങ്ങൾ. വന്ദേ ഭാരത് എക്സ്പ്രസ് പോലെ എൽഎച്ച്ബി കോച്ചുകളെ അടിസ്ഥാനമാക്കിയാണ് നിർമിച്ചതെങ്കിലും ട്രെയിനിൻ്റെ മുന്നിലും പിന്നിലുമുള്ള ഡിസൈനിലടക്കം മാറ്റങ്ങളുണ്ടാകും. പുതിയ ട്രെയിനിൻ്റെ കോച്ചുകളുടെ ഉൾഭാഗം എങ്ങനെയാകുമെന്ന് കഴിഞ്ഞ ദിവസം റെയിൽവേ മന്ത്രി രേഖാചിത്രങ്ങളിലൂടെ വ്യക്തമാക്കിയിരുന്നു.

വന്ദേ ഭാരത് സാങ്കേതികവിദ്യ ഉപയോഗിക്കുന്ന സ്ലീപ്പർ ട്രെയിനിന് വെളുപ്പും ഓറഞ്ചും ഇളം നീല നിറവും കലർന്ന ലിവറിയായിരിക്കും ഉപയോഗിക്കുക എന്നാണ് രേഖാചിത്രങ്ങൾ വ്യക്തമാക്കുന്നത്. റെയിൽവേ മന്ത്രി ഇൻസ്റ്റഗ്രാമിൽ പങ്കുവെച്ച വീഡിയോകളിലാണ് പുതിയ ട്രെയിനിൻ്റെ പുറംഭാഗം സംബന്ധിച്ച സൂചനകളുള്ളത്.റാപ്പിഡ് റെയിൽ ട്രെയിനുകളെ അനുസ്മരിപ്പിക്കുന്ന കൂർത്ത മുൻഭാഗമാണ് വന്ദേ ഭാരത് ട്രെയിനുകളുടെ പ്രത്യേകത.ഇരുവശത്തും സാധാരണ എൽഎച്ച്ബി കോച്ചുകളുടെ രൂപഭാവങ്ങളുണ്ടങ്കിലും ന്യൂമാറ്റിക് വാതിലുകളും കോച്ചുകൾക്കിടയിൽ സീൽഡ് ഗാങ്‍വേകളും കൂട്ടിച്ചേ‍ർത്തതോടെ വശക്കാഴ്ചകളിലും ആധുനികരൂപമുണ്ട്. ഇതിൽ പല ഘടകങ്ങളും വന്ദേ ഭാരത് സ്ലീപ്പറിലും ആവ‍ർത്തിക്കും. എന്നാൽ ട്രെയിനിൻ്റെ കൂ‍ർത്ത മുൻഭാഗത്ത് മാറ്റങ്ങളുണ്ടാകും എന്നാണ് രേഖാചിത്രങ്ങൾ വ്യക്തമാക്കുന്നത്.

ഉരുണ്ട മുൻഭാഗത്തിനു പകരം കൂടുതൽ ഒടിവുകളുള്ള മോഡേൺ ലുക്കിലാണ് വന്ദേ ഭാരത് സ്ലീപ്പ‍ർ. ലോക്കോപൈലറ്റിനു ട്രാക്ക് കാണാനുള്ള മുൻ വിൻഡ്ഷീൽഡിന് കാര്യമായ വ്യത്യാസങ്ങളില്ല. എന്നാൽ ചുറ്റുമുള്ള ഭാഗങ്ങളെല്ലാം കൂടുതലായി കറുത്ത നിറത്തിലേക്ക് മാറിയിരിക്കുന്നു. ഹെഡ്ലാംപുകളുടെ ആകൃതിയിലാണ് കൂടുതൽ വ്യത്യാസം. വശങ്ങളിലേക്കുകൂടി ഒഴുകിയിറങ്ങുന്ന ത്രികോണാകൃതിയിലുള്ള ലാംപുകൾക്ക് വലുപ്പവും കൂടുതലുണ്ട്. ട്രെയിനിൻ്റെ ഏറ്റവും മുന്നിലുള്ള ഫൈബർഗ്ലാസ് 'മൂക്കും' താരതമ്യേന കൂടുതൽ കൂർത്ത രൂപത്തിലാണ്. എൽഎച്ച്ബി കോച്ചുകളുടെ ചതുരവടിവുകൾക്ക് കൂടുതൽ ചേരുന്ന തരത്തിലാണ് പുതിയ ഫ്രണ്ട് ഫേഷ്യ. ട്രാക്കിനോടു കൂടുതൽ പറ്റിച്ചേർന്നു നിൽക്കുന്ന ഭാഗങ്ങൾ മുൻചക്രങ്ങളെ പാതിയോളം മറയ്ക്കുന്നുമുണ്ട്.പുതിയ ട്രെയിനിൻ്റെ പുറത്തെ നിറങ്ങളിലുമുണ്ട് വ്യത്യാസം. ജനലുകൾക്ക് മുകളിൽ വശങ്ങളിൽ പൂർണമായും ഓറഞ്ച് നിറമാണ്. ജനലുകൾക്കു ചുറ്റും കറുത്ത നിറവും താഴേയ്ക്ക് വെളുപ്പും നൽകിയിട്ടുണ്ട്.

ട്രെയിനിൻ്റെ ഒത്ത നീളത്തിൽ ജനലുകൾക്ക് താഴെയായി ഇളംനീല നിറത്തിൽ ഒരു വരയും ഉണ്ടാകും. ബീജും ചാരനിറവും കലർന്ന ട്രെയിനിൻ്റെ ഉൾഭാഗത്തെ ചിത്രങ്ങളും മന്ത്രി പുറത്തുവിട്ടിരുന്നു.ബിഇഎംഎലുമായി സഹകരിച്ച് ചെന്നൈ ഇൻ്റഗ്രൽ കോച്ച് ഫാക്ടറിയിൽ പത്ത് ട്രെയിനുകളാണ് നിർമിക്കുന്നത്. ഇതിൽ ആദ്യ ട്രെയിനിൻ്റെ നിർമാണം ഈ ഡിസംബറിൽ പൂർത്തിയാകും. ഫെബ്രുവരി മാസത്തോടെ ആദ്യ വന്ദേ ഭാരത് സ്ലീപ്പർ ട്രെയിൻ ട്രാക്കിലിറങ്ങുമെന്നാണ് റെയിൽവേ മന്ത്രിയുടെ പ്രഖ്യാപനം. ഈ പ്രോട്ടോടൈപ്പ് ട്രെയിനിൻ്റെ കുറവുകൾ നികത്തി പിന്നാലെ മറ്റു ട്രെയിനുകളും പുറത്തിറങ്ങും. ഇതിനു പുറമെ സ്വകാര്യ കമ്പനികളുടെ അടക്കം സഹകരണത്തോടെ 200 ട്രെയിനുകൾ നിർമിക്കാനും റെയിൽവ കരാർ നൽകിയിട്ടുണ്ട്. ഇവയുടെ നിർമാണം രണ്ടുവർഷത്തിനുള്ളിൽ പൂർത്തിയാകും. ഈ ട്രെയിനുകൾക്കെല്ലാം ഒരേ രൂപഭംഗിയും സൗകര്യങ്ങളുമാകും ഉണ്ടാകുകയെന്നും റെയിൽവേ വ്യക്തമാക്കിയിട്ടുണ്ട്.