കാനഡയ്‌ക്കെതിരെ ഇന്ത്യ നിർണായകമായ ചില കാര്യങ്ങൾ തുറന്നടിച്ച് രംഗത്ത് വന്നിരിക്കുകയാണ്. ഇന്ത്യൻ ഉദ്യോഗസ്ഥരെ കാനഡ നിരീക്ഷിച്ചുവെന്ന് ഇന്ത്യ വ്യക്തമാക്കി. വിയന്ന കൺവെൻഷൻ ചട്ടങ്ങൾ കാനഡ സ്ഥിരമായി ലംഘിക്കുന്നതിൽ അതൃപ്തി അറിയിച്ചിരിക്കുകയാണ് ഇന്ത്യ.

തീവ്രവാദികളെ കൈമാറാനുള്ള നിർദേശം കാനഡ അംഗീകരിക്കുന്നില്ലെന്നും ഇന്ത്യ വ്യക്തമാക്കി. ഇന്ത്യയിലെ നയതന്ത്ര ഓഫീസുകളിലായുള്ള 41 ഉദ്യോഗസ്ഥരെ കാനഡ പിൻവലിച്ച വിഷയത്തിൽ വിദേശകാര്യ മന്ത്രി എസ് ജയശങ്കർ നിർണായകമായ ചില പ്രതികരണങ്ങൾ നടത്തിയിരിക്കുകയാണ് .

കാനഡയിലുള്ള ഇന്ത്യൻ നയതന്ത്ര ഉദ്യോഗസ്ഥരുടെ സുരക്ഷയിൽ പുരോഗതി കണ്ടാൽ ഇന്ത്യ കനേഡിയൻ പൗരന്മാർക്ക് വിസ നൽകുന്നത് പുനരാരംഭിക്കുന്ന കാര്യം പരിഗണിക്കും. മാത്രമല്ല കാനഡയ്ക്കെതിരെ ഗുരുതര ആരോപണങ്ങളും ഇന്ത്യ ഉന്നയിക്കുന്നുണ്ട് . ഇന്ത്യയുടെ ആഭ്യന്തര വിഷയങ്ങളിൽ കനേഡിയൻ ഉദ്യോഗസ്ഥർ ഇടപെട്ടിരുന്നു. ഇന്ത്യയ്ക്ക് കനേഡിയൻ രാഷ്ട്രീയത്തിലെ ചില വിഭാഗങ്ങളുമായി പ്രശ്നങ്ങൾ ഉണ്ട് .

സെപ്റ്റംബർ മാസം മുതൽ ഇന്ത്യയിലെ കനേഡിയൻ നയതന്ത്രജ്ഞരുടെ എണ്ണം നിയന്ത്രിക്കണമെന്ന ആവശ്യം മുർന്നിരുന്നു . ഇന്ത്യയുടെ വാദം , ഒട്ടോവയിലുള്ള ഇന്ത്യയുടെ നയതന്ത്ര ഉദ്യോഗസ്ഥരുടെ എണ്ണം മാത്രം ഇവിടെയും മതിയെന്നായിരുന്നു.കാനഡയിലുള്ള ഇന്ത്യൻ നയതന്ത്ര ഉദ്യോഗസ്ഥരുടേത്, ഇന്ത്യയിലുള്ള കനേഡിയൻ നയതന്ത്ര ഉദ്യോഗസ്ഥരുടെ എണ്ണത്തേക്കാൾ വളരെയധികം കുറവാണ്. ഇന്ത്യയുടെ നിർ‌ദ്ദേശത്തിന് പിന്നാലെ തന്നെ കാനഡയ്ക്ക് ഉദ്യോഗസ്ഥരുടെ എണ്ണം കുറയ്ക്കേണ്ടതായി വന്നിരുന്നു. ഇവരെ ദക്ഷിണേഷ്യയിലുള്ള മറ്റ് രാജ്യങ്ങളിലേക്കാണ് കാനഡ നിയമിച്ചിരിക്കുന്നത്.