പത്താന്‍കോട്ട് ഭീകരാക്രമണവുമായി ബന്ധപ്പെട്ട് പാകിസ്ഥാന്‍ ഇന്ത്യയ്ക്ക് പ്രാഥമിക റിപ്പോര്‍ട്ട് കൈമാറി. ഇന്ത്യ കൈമാറിയ ഫോണ്‍ നമ്പരുകള്‍ സംബന്ധിച്ച വിവരങ്ങള്‍ ലഭ്യമല്ലെന്നും പാകിസ്ഥാന്‍ വ്യക്തമാക്കി. ഇന്ത്യയുടെ സമ്മര്‍ദ്ദം ശക്തമായതിനെ തുടര്‍ന്നാണ് പാകിസ്ഥാന്‍ അന്വേഷണം പ്രഖ്യാപിച്ചത്. അന്വേഷണത്തിന്റെ ഭാഗമായി വിവിധയിടങ്ങളില്‍ പാകിസ്ഥാന്‍ റെയ്ഡ് നടത്തി. പത്താന്‍കോട്ട് ആക്രമണവുമായി ബന്ധമുണ്ടെന്ന് സംശയിക്കപ്പെടുന്ന നാല് പേരെ അറസ്റ്റ് ചെയ്യുകയും ചെയ്തിരുന്നു.

സിയാല്‍കോട്ട്, ബഹാവല്‍പൂര്‍ എന്നിവടങ്ങളില്‍ നിന്നാണ് ഇവരെ അറസ്റ്റ് ചെയ്തത്. ഗുജ്‌റാന്‍വാല, ഝലം, ബഹാവല്‍പൂര്‍ ജില്ലകളിലാണ് റെയ്ഡ് നടത്തിയത്. പാക് പ്രധാനമന്ത്രി നവാസ് ഷെരീഫിന്റെ നിര്‍ദ്ദേശപ്രകാരം ഫെഡറല്‍ അന്വേഷണ ഏജന്‍സി, രഹസ്യാന്വേഷണ വിഭാഗങ്ങള്‍, ഭീകരവാദ വിരുദ്ധ വിഭാഗം എന്നീ ഏജന്‍സികള്‍ ചേര്‍ന്നാണ് പാകിസ്ഥാനില്‍ അന്വേഷണം നടത്തുന്നത്.

പത്താന്‍കോട്ട് ആക്രമണത്തിന് പിന്നില്‍ പാകിസ്ഥാനിലെ നിരോധിത സംഘടനയായ ജെയ്‌ഷെ മുഹമ്മദിന്റെ പങ്കു വ്യക്തമാക്കുന്ന തെളിവുകളാണ് ഇന്ത്യ കൈമാറിയിരിക്കുന്നത്. സംഭവസ്ഥലത്തു നിന്നും കണ്ടെടുത്ത ആയുധങ്ങള്‍ പാക് നിര്‍മ്മിതമാണെന്നും കണ്ടെത്തിയിരുന്നു. ഇന്ത്യന്‍ സൈനികര്‍ വധിച്ച ആറു ഭീകരരുടെ ഡിഎന്‍എ സാമ്പിളുകളും ഭീകരരുടെ ഫോണ്‍ സംഭാഷണങ്ങളും തെളിവായി ഇന്ത്യ കൈമാറിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha