തമിഴ്‌നാട്ടിലെ പൊങ്കല്‍ ഉത്സവത്തോടനുബന്ധിച്ച് നടക്കുന്ന ജെല്ലിക്കെട്ടിന് അനുമതി നല്‍കിയ കേന്ദ്രസര്‍ക്കാര്‍ വിജഞാപനം സുപ്രീംകോടതി സ്‌റ്റേ ചെയ്തു.
കാളകളെ ഉപയോഗിച്ച് ജെല്ലിക്കെട്ട് നടത്തുന്നതിന് നിയന്ത്രണം ഏര്‍പ്പെടുത്തിക്കൊണ്ട് 2011ല്‍ പരിസ്ഥിതിമന്ത്രാലയം പുറപ്പെടുവിച്ച വിജ്ഞാപനത്തില്‍ ഭേദഗതി വരുത്തിയാണ് കേന്ദ്ര സര്‍ക്കാര്‍ അനുമതി നല്‍കിയത്. ജെല്ലിക്കെട്ട് മൃഗങ്ങളോടുള്ള ക്രൂരത തന്നെയെന്ന് കോടതി അഭിപ്രായപ്പെട്ടു. 21ാം നൂറ്റാണ്ടിലും വിനോദത്തിനായി മൃഗങ്ങളെ പീഡിപ്പിക്കരുതെന്നും കോടതി വ്യക്തമാക്കി.
കേന്ദ്ര സര്‍ക്കാര്‍ നല്‍കിയ അനുമതി ചോദ്യംചെയ്ത് കേന്ദ്ര മൃഗക്ഷേമ ബോര്‍ഡും മൃഗസ്‌നേഹികളുടെ മൂന്ന് സംഘടനകളുമാണ് സുപ്രീംകോടതിയില്‍ ഹര്‍ജികള്‍ സമര്‍പ്പിച്ചത്. ജെല്ലിക്കെട്ടിനും കാളപൂട്ടിനും കോഴിപ്പോരിനും അനുമതി നല്‍കിയ ജനുവരി ഏഴിലെ കേന്ദ്ര സര്‍ക്കാര്‍ വിജ്ഞാപനം ചോദ്യംചെയ്താണ് ഹര്‍ജിക്കാര്‍ കോടതിയെ സമീപിച്ചത്.
ജെല്ലിക്കെട്ടിന് കാളകളെ പരിശീലിപ്പിക്കുകയോ ഉപയോഗിക്കുകയോ ചെയ്യരുതെന്ന് 2011ലെ വിജ്ഞാപനത്തില്‍ പരിസ്ഥിതി മന്ത്രാലയം വ്യക്തമാക്കിയിരുന്നു. ഇത് 2014ല്‍ സുപ്രീംകോടതി ശരിവയ്ക്കുകയും ചെയ്തു. ഈ വിജ്ഞാപനത്തിലാണ് മന്ത്രാലയം മാറ്റം വരുത്തിയത്. പരമ്പരാഗതമായ ആചാരങ്ങളും ആഘോഷങ്ങളും സംഘടിപ്പിക്കാന്‍ അനുവദിക്കണമെന്നാവശ്യപ്പെട്ട് തമിഴ്‌നാട് മുഖ്യമന്ത്രി ജയലളിത ഉള്‍പ്പെടെയുള്ളവര്‍ കേന്ദ്രത്തിന് കത്തെഴുതിയിരുന്നു. ഇത്തരം സമ്മര്‍ദങ്ങളെ തുടര്‍ന്നാണ് വിജ്ഞാപനത്തില്‍ മാറ്റംവരുത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha