തമിഴ്‌നാട്ടില്‍ ജെല്ലിക്കെട്ട് നടത്താന്‍ അനുവദിച്ചുകൊണ്ട് ഓര്‍ഡിനന്‍സ് പുറപ്പെടുവിക്കണമെന്നാവശ്യപ്പെട്ട് മുഖ്യമന്ത്രി ജയലളിത പ്രധാനമന്ത്രിക്ക് കത്തയച്ചു. ജനങ്ങളുടെ വികാരംമാനിച്ച് കേന്ദ്രം ഇടപെടണമെന്നാണ് ജയലളിത കത്തില്‍ ആവശ്യപ്പെട്ടിരിക്കുന്നത്. ജെല്ലിക്കെട്ട് അനുവദിച്ച കേന്ദ്രസര്‍ക്കാരിന്റെ നടപടി സുപ്രീംകോടതി തളളിയതോടെയാണ് ഓര്‍ഡിനന്‍സ് പുറപ്പെടുവിക്കണമെന്ന് ജയലളിത ആവശ്യപ്പെട്ടിരിക്കുന്നത്.
കഴിഞ്ഞ ഡിസംബറിലും ഇതുമായി ബന്ധപ്പെട്ട് ഓര്‍ഡിനന്‍സ് പുറപ്പെടുവിക്കണമെന്ന് കേന്ദ്രത്തോട് ജയലളിത ആവശ്യപ്പെട്ടിരുന്നു. ഇതിന്റെ അടിസ്ഥാനത്തില്‍ മാനദണ്ഡങ്ങള്‍ പാലിച്ചു പൊങ്കല്‍ ഉത്സവത്തിന്റെ ഭഗമായി ജെല്ലിക്കെട്ട് നടത്താന്‍ അനുവദിച്ച് കേന്ദ്രം ജനുവരി ഏഴിന് വിജ്ഞാപനം പുറപ്പെടുവിച്ചു. ഇത് സുപ്രീംകോടതി സ്റ്റേ ചെയ്തു.

അനിമല്‍ വെല്‍ഫയര്‍ ബോര്‍ഡ് ഓഫ് ഇന്ത്യ (എഡബ്ല്യുബിഐ), വിവിധ സന്നദ്ധസംഘടനകള്‍ എന്നിവരാണു സുപ്രീംകോടതിയില്‍ കേന്ദ്രസര്‍ക്കാരിന്റെ ഉത്തരവിനെതിരേ ഹര്‍ജി സമര്‍പ്പിച്ചിരുന്നത്.കൃത്യമായ ട്രാക്കില്‍ രണ്ടു കിലോമീറ്റര്‍ ദൂരം മാത്രം കാളവണ്ടിയോട്ടം സംഘടിപ്പിക്കാമെന്നു കേന്ദ്ര സര്‍ക്കാര്‍ ഉത്തരവിലുണ്ടായിരുന്നു.

അനിമല്‍ ഹസ്‌ബെന്‍ഡറി ആന്‍ഡ് വെറ്ററിനറി വകുപ്പ് ഉദ്യോഗസ്ഥര്‍ പരിശോധിച്ച് ഫിറ്റ്‌നസ് സര്‍ട്ടിഫിക്കറ്റ് നല്കിയ കാളകളെ മാത്രമേ ഓട്ടത്തില്‍ പങ്കെടുപ്പിക്കാന്‍ പാടുള്ളൂയെന്നും കേന്ദ്ര സര്‍ക്കാരിന്റെ നിര്‍ദേശത്തില്‍ സൂചിപ്പിച്ചിരുന്നു. ഇവയാണ് സുപ്രീംകോടതി നിരുപാധികം തള്ളിയത്.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha