എവിടെയായാലും പ്രത്യേകിച്ച് അപകടത്തില്‍ തക്കസമയത്ത് ഇടപെടുക എന്നതാണ് ഒരു ധീരന്റെ കഴിവ്. പകച്ചു നില്‍ക്കുന്നവര്‍ എന്നും അവിടെ നില്‍ക്കുകയേ ഉള്ളൂ. റോഡ് അപകടത്തില്‍ ഗുരുതരമായി പരുക്കേറ്റ് റോഡില്‍ വീണ യുവാവ് മരിച്ചുവെന്ന് കരുതി കൂടി നിന്ന ആളുകള്‍ മൊബൈലില്‍ വീഡിയോ എടുക്കുന്നതിനാണ് താല്‍പര്യം പ്രകടിപ്പിച്ചത്. അയാളെ രക്ഷിക്കാന്‍ ശ്രമിക്കാതെ ആളുകള്‍ ചിത്രം പിടിക്കാന്‍ മല്‍സരിച്ചപ്പോള്‍ രണ്ട് പെണ്‍കുട്ടികള്‍ റോഡില്‍ ദൈവദൂതരായി. അപ്പോളോ ആശുപത്രിയില്‍ ഇന്റേണ്‍ഷിപ്പ് ചെയ്യുന്ന ഡോക്ടര്‍മാരായ ഫൈസ അഞ്ചുമും സാവിത്രി ദേവിയും ഗുരുതരമായി പരുക്കേറ്റു കിടന്ന യുവാവിന് തിരിച്ച് നല്‍കിയത് ഒരു ജീവിതമാണ്.
സെക്കന്തരാബാദിലാണ് സംഭവം.ഇന്നലെ രാത്രിയില്‍ സ്വകാര്യ പരിപാടികള്‍ക്ക് ശേഷം മടങ്ങുകയായിരുന്ന ഡോക്ടര്‍മാര്‍ അപകടസ്ഥലത്തിന് സമീപം എത്തിയപ്പോഴാണ് ദാരുണമായ കാഴ്ച കണ്ടത്. ഹൃദയസ്പന്ദന നിരക്ക് തീരെ ഇല്ലാത്ത അവസ്ഥയിലായിരുന്ന യുവാവ് മരിച്ചുവെന്നാണ് കൂട്ടം കൂടി നിന്നവര് വിശ്വസിച്ചിരുന്നത്. എന്നാല്‍ ജീവന്റെ കണിക ബാക്കിയുണ്ടെന്ന് തിരിച്ചറിഞ്ഞവര്‍ പ്രാഥമിക ശ്രുശ്രൂഷ നല്‍കി. രാത്രിയില്‍ സ്വന്തം സുരക്ഷിതത്വത്തെ കുറിച്ച് ചിന്തിക്കാതെ ആംബുലന്‍സ് വരുന്നത് വരെ യുവാവിനെ പരിചരിച്ച് ഈ കുട്ടി ഡോക്ടര്‍മാര്‍ റോഡരികില്‍ നിന്നു.
ശ്വാസതടസമുണ്ടാകുന്ന രീതിയില്‍ തൊണ്ടയിലേക്ക് നാക്ക് ഇറങ്ങി പോകാതിരിക്കാന്‍ പേന ഉപയോഗിച്ചു. പത്രം ചുരുട്ടി കൃത്രിമ ശ്വാസോച്ഛാസം നല്‍കി. 25 മിനിട്ടുകള്‍ക്ക് ശേഷം ആംബുലന്‍സ് എത്തും വരെ സിപിആര്‍ നല്‍കി ജീവന്‍ പിടിച്ചുനിര്‍ത്തി. ആംബുലന്‍സ് എത്തിയപ്പോള്‍ പെട്ടെന്ന് തന്നെ സൈനും ഓക്‌സിജനും നല്‍കാനുള്ള നിര്‍ദ്ദേശവും നല്‍കിയാണ് ഫൈസയും സാവിത്രിയും മടങ്ങിയത്. ഇവരെ അഭിനന്ദിക്കാന്‍ വാക്കുകളില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha