ഡല്‍ഹിയില്‍ നടപ്പാക്കിയ ഒറ്റഇരട്ട വാഹന നിയന്ത്രണത്തില്‍ വലിയ അഴിമതി നടന്നിട്ടുണ്ടെന്ന് കേജ്‌രിവാളിനു നേരെ മഷിയെറിഞ്ഞ യുവതി ഭാവ്‌ന അറോറ. ഇതിനുള്ള തെളിവുകള്‍ തന്റെ പക്കലുണ്ടെന്നും കോടതിയില്‍ ഹാജരാക്കുമെന്നും ഭാവ്‌ന അറോറ പറഞ്ഞു. ഡല്‍ഹിയില്‍ നടന്നതു പ്രകൃതി വാതക അഴിമതിയുടെ ഭാഗമായി നടന്ന സംഭവമാണ്. ഒറ്റഇരട്ട വാഹന നിയന്ത്രണത്തില്‍ വലിയ അഴിമതി നടന്നിട്ടുണ്ടെന്നുള്ളതിന് തെളിവുകള്‍ തന്റെ പക്കലുണ്ട്. ഇതുമായി ബന്ധപ്പെട്ട് ഡല്‍ഹി മുഖ്യമന്ത്രി അരവിന്ദ് കേജ്‌രിവാളിനെയും ഡല്‍ഹി ഗതാഗത മന്ത്രി ഗോപാല്‍ റായിനെയും കാണണമെന്ന് ആവശ്യപ്പെട്ടിരുന്നു. എന്നാല്‍ അവര്‍ കാണാന്‍ അനുവാദം തന്നില്ലെന്നും ഭാവ്‌ന പറഞ്ഞു. അഴിമതിയുമായി ബന്ധപ്പെട്ട വിവരങ്ങള്‍ കോടതിയില്‍ സമര്‍പ്പിക്കും. ഈ വിഷയത്തില്‍ അന്വേഷണം നടത്തണമെന്നും അവര്‍ പറഞ്ഞു.

നഗരത്തിലെ ഒറ്റ ഇരട്ട വാഹന നിയന്ത്രണത്തിന്റെ വിജയം ആഘോഷിക്കാന്‍ മോഡല്‍ ടൗണ്‍ ഛത്രസാല്‍ സ്‌റ്റേഡിയത്തില്‍ നടന്ന ചടങ്ങിനിടെയാണു കേജ്‌രിവാളിനുനേരെ മഷിപ്രയോഗം നടന്നത്. സിഎന്‍ജി കുംഭകോണത്തില്‍ കേജ്‌രിവാളിനു പങ്കുണ്ടെന്നു വിളിച്ചു പറഞ്ഞായിരുന്നു യുവതിയുടെ മഷിപ്രയോഗം. എന്നാല്‍ \'അവരെ വെറുതെ വിടുക. സിഎന്‍ജി കുംഭകോണത്തെക്കുറിച്ചുള്ള തെളിവുകളടങ്ങിയ കടലാസുകള്‍ വാങ്ങുക\' എന്നായിരുന്നു കേജ്‌രിവാളിന്റെ ആദ്യപ്രതികരണം.
ചടങ്ങ് തീര്‍ന്നയുടന്‍ ഡല്‍ഹി പൊലീസിനും ആഭ്യന്തര മന്ത്രാലയത്തിനുമെതിരെ രൂക്ഷവിമര്‍ശനവുമായി എഎപി രംഗത്തെത്തി. ഷീല ദീക്ഷിത് മന്ത്രിസഭയുടെ കാലത്ത് സിഎന്‍ജി വാഹനങ്ങള്‍ക്കു ഫിറ്റ്‌നസ് സര്‍ട്ടിഫിക്കറ്റ് നല്‍കിയതുമായി ബന്ധപ്പെട്ടതാണു സിഎന്‍ജി കുംഭകോണം. ഇതിനെക്കുറിച്ച് അന്വേഷിക്കാന്‍ എഎപി സര്‍ക്കാര്‍ കമ്മിഷനെ നിയോഗിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha