ആത്മഹത്യ ചെയ്ത ദളിത് വിദ്യാര്‍ഥി രോഹിത് വെമുലയുടെ മൃതദേഹം പൊലീസ് രഹസ്യമായി സംസ്‌കരിച്ചതിനെതിരെ പ്രതിഷേധം ഇരമ്പുന്നു. ജന്മനാടായ ഗുണ്ടൂരിലെ ഉപ്പലില്‍ സംസ്‌കാരം നടത്തുമെന്നായിരുന്നു പൊലീസ് അറിയിച്ചിരുന്നത്. പൊതുദര്‍ശനത്തിനു വച്ചശേഷമായിരിക്കും സംസ്‌കാരമെന്നും രോഹിത്തിന്റെ ബന്ധുക്കളെയും സുഹൃത്തുക്കളെയും അറിയിച്ചിരുന്നു. പിന്നീട് ഉന്നതങ്ങളില്‍നിന്നുള്ള നിര്‍ദേശത്തെ തുടര്‍ന്ന് അമ്പെര്‍പേട്ട ശ്മശാനത്തില്‍ പൊലീസ് രഹസ്യമായി സംസ്‌കാരം നടത്തി. പൊതുദര്‍ശനത്തിന് അനുവദിച്ചില്ല.
രോഹിത്തിന്റെ സുഹൃത്ത് ഫെയ്‌സ്ബുക്കില്‍ ചിതയുടെ ചിത്രമടക്കം പോസ്റ്റിട്ടതോടെയാണ് സംസ്‌കാരം കഴിഞ്ഞതായി പുറംലോകം അറിഞ്ഞത്. പൊലീസ് തെറ്റിദ്ധരിപ്പിച്ചതായും സുഹൃത്തുക്കള്‍ക്കും മറ്റും അന്ത്യോപചാരം അര്‍പ്പിക്കാന്‍ അവസരം നിഷേധിച്ചതായും സുഹൃത്ത് കുറിപ്പില്‍ കുറ്റപ്പെടുത്തി. ഞായറാഴ്ച രാത്രി മുതല്‍ പുലര്‍ച്ചെവരെ മൃതദേഹവുമായി വിദ്യാര്‍ഥികള്‍ ക്യാമ്പസില്‍ പ്രതിഷേധിച്ചിരുന്നു. തിങ്കളാഴ്ച രാവിലെ പൊലീസ് ബലംപ്രയോഗിച്ച് മൃതദേഹം പിടിച്ചെടുത്ത് പോസ്റ്റ്‌മോര്‍ട്ടം നടത്തി.
രോഹിത് വെമുലയുള്‍പ്പെടെ അഞ്ച് ദളിത് വിദ്യാര്‍ഥികളെ അധികൃതര്‍ ഹോസ്റ്റലില്‍നിന്ന് പുറത്താക്കിയതിന് പിന്നിലെ മാനവശേഷി മന്ത്രാലയത്തിന്റെ ഇടപെടല്‍ പുറത്തുവന്നതോടെ മന്ത്രി സ്മൃതി ഇറാനി രാജിവയ്ക്കണമെന്ന ആവശ്യവും ശക്തിപ്പെട്ടു. വിദ്യാര്‍ഥികള്‍ക്കെതിരെ നടപടി ആവശ്യപ്പെട്ട് കേന്ദ്രമന്ത്രി ബണ്ഡാരു ദത്താത്രേയ സ്മൃതി ഇറാനിക്കയച്ച കത്ത് കഴിഞ്ഞദിവസം പുറത്തുവന്നു. കത്ത് കിട്ടിയശേഷം അഞ്ചുവട്ടം മന്ത്രാലയം സര്‍വകലാശാലയ്ക്ക് കത്തയച്ചു. ദത്താത്രേയക്കും വൈസ്ചാന്‍സലര്‍ അപ്പാറാവുവിനുമെതിരെ കേസെടുത്ത പൊലീസ് സ്മൃതി ഇറാനിക്കെതിരെയും കേസെടുക്കണമെന്ന ആവശ്യം ഉയര്‍ന്നിട്ടുണ്ട്. രോഹിത്തിന്റെ മരണത്തിന് ഉത്തരവാദികളായ കേന്ദ്രമന്ത്രിമാര്‍ രാജിവയ്ക്കുംവരെ എസ്എഫ്‌ഐ പ്രക്ഷോഭം തുടരുമെന്ന് അഖിലേന്ത്യാ പ്രസിഡന്റ് വി ശിവദാസന്‍ അറിയിച്ചു. സിപിഐ എം ജനറല്‍ സെക്രട്ടറി സീതാറാം യെച്ചൂരി ബുധനാഴ്ച കേന്ദ്രസര്‍വകലാശാല സന്ദര്‍ശിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha