മദ്യനയ കേസില്‍ ഡല്‍ഹി മുഖ്യമന്ത്രി അരവിന്ദ് കെജ്രിവാളിന്റെ ജുഡീഷ്യല്‍ കസ്റ്റഡി ജൂലൈ 3 വരെ നീട്ടി ഡല്‍ഹി കോടതി. പിന്‍വലിച്ച മദ്യനയ കേസില്‍ അരവിന്ദ് കെജ്രിവാള്‍ 100 കോടി രൂപ കിക്ക്ബാക്ക് ആവശ്യപ്പെട്ടതിന്റെ തെളിവുകള്‍ കൈവശമുണ്ടെന്ന് എന്‍ഫോഴ്സ്മെന്റ് ഡയറക്ടറേറ്റ് റൂസ് അവന്യൂ കോടതിയെ അറിയിച്ചു. വീഡിയോ കോണ്‍ഫറന്‍സിലൂടെയാണ് ഡല്‍ഹി മുഖ്യമന്ത്രിയെ കോടതിയില്‍ ഹാജരാക്കിയത്.

കേസില്‍ കള്ളപ്പണം വെളുപ്പിച്ചെന്ന ആരോപണത്തില്‍ സമര്‍പ്പിച്ച കുറ്റപത്രം കോടതി പരിഗണിച്ചതായി അഡീഷണല്‍ സോളിസിറ്റര്‍ ജനറല്‍ എസ് വി രാജു പറഞ്ഞു. കള്ളപ്പണം വെളുപ്പിക്കല്‍ കേസില്‍ ഡല്‍ഹി മുന്‍ മന്ത്രി മനീഷ് സിസോദിയ ഉള്‍പ്പടെയുള്ള പ്രതികളുടെ ജാമ്യാപേക്ഷ തള്ളിയത് കള്ളപ്പണം വെളുപ്പിക്കല്‍ കുറ്റം കോടതി അംഗീകരിക്കുന്നുവെന്നാണ് വ്യക്തമാക്കുന്നതെന്നും അദ്ദേഹം പറഞ്ഞു.

കള്ളപ്പണം വെളുപ്പിക്കലുമായി ബന്ധപ്പെട്ട കോടതിയുടെ അറിവ്, കള്ളപ്പണം വെളുപ്പിക്കല്‍ കേസാണ് ഇവിടെയുള്ളതെന്ന് പ്രഥമദൃഷ്ട്യാ കോടതിക്ക് ബോധ്യപ്പെട്ടിട്ടുണ്ടെന്ന് തെളിയിക്കുന്നു. സിബിഐ അന്വേഷണത്തില്‍ കെജ്രിവാള്‍ 100 കോടി രൂപ കൈക്കൂലി ആവശ്യപ്പെട്ടതായി കണ്ടെത്തി. അറസ്റ്റിന് മുമ്പ് തന്നെ ഞങ്ങള്‍ തെളിവുകള്‍ ശേഖരിച്ചിരുന്നു. ഇഡിയെ പ്രതിനിധീകരിച്ച് എഎസ്ജി രാജു പറഞ്ഞു.