കുഴല്‍ക്കിണറില്‍ വീണ മൂന്ന് വയസുകാരിയെ പുറത്തെടുത്തത് 10 ദിവസത്തിന് ശേഷം. രാജസ്ഥാനിലെ കോട്പുത്‌ലിയിലാണ് സംഭവം. ഇന്ന് പുലര്‍ച്ചെ കുഞ്ഞിനെ രക്ഷപ്പെടുത്തിയെങ്കിലും മരണം സംഭവിച്ചിരുന്നു. പുറത്തെത്തിച്ച ഉടന്‍ തന്നെ അടുത്തുള്ള ആശുപത്രിയിലേക്ക് കൊണ്ടുപോയി. അവിടെ ഡോക്ടര്‍മാര്‍ അവള്‍ മരിച്ചതായി പ്രഖ്യാപിക്കുകയും മൃതദേഹം പോസ്റ്റ്മോര്‍ട്ടത്തിനായി അയയ്ക്കുകയും ചെയ്തു.

കോട്പുത്ലിയിലെ 700 അടി താഴ്ചയുള്ള കുഴല്‍ക്കിണറില്‍ കുടുങ്ങിയ കുട്ടിയുടെ നില രക്ഷാപ്രവര്‍ത്തനത്തിന് മുമ്പേ തന്നെ വഷളായിത്തുടങ്ങിയിരുന്നു. ഡിസംബര്‍ 23ന് ഉച്ചയ്ക്ക് പുറത്ത് കളിക്കുന്നതിനിടെ കുഴല്‍ക്കിണറില്‍ വീഴുകയായിരുന്നു. ഏകദേശം 10 മിനിറ്റിനുശേഷം അവളുടെ കരച്ചില്‍ കേട്ട വീട്ടുകാര്‍ അവളെ കുഴല്‍ക്കിണറില്‍ കുടുങ്ങിയതായി കണ്ടെത്തി.

ദേശീയ, സംസ്ഥാന ദുരന്ത നിവാരണ സേനയും ഒരു മെഡിക്കല്‍ സംഘവും ഉടന്‍ എത്തി, കുട്ടിയെ രക്ഷിക്കാനുള്ള ശ്രമങ്ങള്‍ ആരംഭിച്ചു .പൈപ്പ് വഴിയാണ് ഓക്‌സിജന്‍ എത്തിച്ചത്. കയറില്‍ ഘടിപ്പിച്ച ഇരുമ്പ് വളയുപയോഗിച്ച് പെണ്‍കുട്ടിയെ പുറത്തെടുക്കാന്‍ നേരത്തെ ശ്രമം നടന്നിരുന്നു.

എന്നാല്‍, ഭാഗ്യം ഫലിക്കാത്തതിനെ തുടര്‍ന്ന് കുഴല്‍ക്കിണറിന് സമാന്തരമായി തുരങ്കം കുഴിക്കാന്‍ ബുധനാഴ്ച പൈലിങ് യന്ത്രം എത്തിച്ചു. പ്രവര്‍ത്തനം ത്വരിതപ്പെടുത്തുന്നതിനായി 50 ടണ്‍ ഭാരമുള്ള യന്ത്രം മാറ്റി 100 ടണ്‍ ശേഷിയുള്ള ക്രെയിന്‍ വ്യാഴാഴ്ച കൊണ്ടുവന്നു.

വെള്ളിയാഴ്ച മേഖലയില്‍ കനത്ത മഴ പെയ്തതിനാല്‍ കുഴിയടക്കല്‍ നിര്‍ത്തിവച്ചു .പിന്നീടുള്ള മണിക്കൂറുകളില്‍ ഭക്ഷണമോ ഓക്‌സിജനോ നല്‍കാനായില്ല, അവളുടെ നില വഷളായി.അപകടത്തെ തുടര്‍ന്ന് പെണ്‍കുട്ടിയുടെ അമ്മ ധോലെ ദേവിയുടെ ആരോഗ്യനില വഷളായി . വികാരാധീനയായ ധോലെ ദേവി, അശ്രദ്ധ ആരോപിച്ച് മകളെ എത്രയും വേഗം പുറത്തുകൊണ്ടുവരാന്‍ ഭരണകൂടത്തോട് അഭ്യര്‍ത്ഥിച്ചിരുന്നു.