തിരുപ്പതി ക്ഷേത്രത്തില്‍ തിക്കിലുംതിരക്കിലുംപ്പെട്ട് 6 മരണം. ഗുരുതരമായി പരിക്കേറ്റവരെ ആശുപത്രിയില്‍ പ്രവേശിപ്പിച്ചു. മരണസംഖ്യ ഉയരാനുള്ള സാധ്യതയാണുള്ളത്. ബുധനാഴ്ച വൈകിട്ട് വൈകുണ്ഠ് ഏകാദ്ശി ദര്‍ശന കൂപ്പണ്‍ വിതരണത്തിനിടെയാണ് അപകടം. പരിക്കേറ്റവരെ ചികിത്സയ്ക്കായി തിരുപ്പതി റുയ ആശുപത്രിയിലേക്ക് മാറ്റി.

മരിച്ചവരില്‍ ഒരാള്‍ തമിഴ്‌നാട് സ്വദേശിയാണെന്നാണ് റിപ്പോര്‍ട്ട്. മറ്റുള്ളവരുടെ വിവരങ്ങള്‍ പുറത്തുവന്നിട്ടില്ല. കൂപ്പണ്‍ വിതരണത്തിനിടെ ആളുകള്‍ തിരക്കുണ്ടാക്കുകയും സുരക്ഷാ സംവിധാനം മറികടന്ന് എത്തുകയും ചെയ്തതോടെയാണ് അപകടമുണ്ടായത്. പ്രാഥമിക ചികിത്സ നല്‍കിയ ശേഷമാണ് പലരെയും ആശുപത്രിയില്‍ എത്തിച്ചത്.

തിരുമല വെങ്കിടേശ്വര ക്ഷേത്രത്തിലെ വൈകുണ്ഠ ദ്വാര ദര്‍ശനത്തിനുള്ള ടോക്കണ്‍ വിതരണത്തിനിടെയാണ് അപകടം. അപകടസമയം 4,000ത്തിലധികം ഭക്തര്‍ സ്ഥലത്തുണ്ടായിരുന്നതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. ടിക്കറ്റ് കേന്ദ്രത്തിന് സമീപമാണ് തിക്കും തിരക്കുമുണ്ടായത്. അപകടത്തിന്റെ ദൃശ്യങ്ങള്‍ സമൂഹമാധ്യമങ്ങളിലൂടെ പുറത്തുവന്നു. ആളുകള്‍ തിരക്ക് കൂട്ടുന്നതിന്റെയും രണ്ട് സ്ത്രീകള്‍ക്ക് പോലീസ് സിപിആര്‍ നല്‍കുന്നതിന്റെയും പരിക്കേറ്റവരെ ആംബുലന്‍സുകളില്‍ മാറ്റുന്നതിന്റെയും ദൃശ്യങ്ങള്‍ പുറത്തുവന്നു. അപകടമുണ്ടാകുമ്പോള്‍ സ്ഥലത്തുണ്ടായിരുന്ന പോലീസ് ഉദ്യോഗസ്ഥരും സുരക്ഷാ ജീവനക്കാരുമാണ് പരിക്കേറ്റവര്‍ക്ക് ആവശ്യമായ സഹായം നല്‍കിയത്.

ക്ഷേത്രത്തില്‍ തിക്കിലും തിരക്കിലും അകപ്പെട്ട് ഭക്തര്‍ മരിച്ച സംഭവത്തില്‍ ആന്ധ്രാ പ്രദേശ് മുഖ്യമന്ത്രി ചന്ദ്രബാബു നായിഡു അഗാധമായ അനുശോചനം രേഖപ്പെടുത്തി. പരിക്കേറ്റവര്‍ക്ക് മതിയായ ചികിത്സ ഉറപ്പാക്കും. ഉന്നത ഉദ്യോഗസ്ഥര്‍ സ്ഥലം സന്ദര്‍ശിച്ച് പരിക്കേറ്റവര്‍ക്ക് മെച്ചപ്പെട്ട ചികിത്സ ഉറപ്പാക്കാന്‍ ദുരിതാശ്വാസ നടപടികള്‍ സ്വീകരിക്കും. ഇതിനായി നിര്‍ദേശം നല്‍കി. ഉദ്യോഗസ്ഥരുമായി ഫോണില്‍ സംസാരിച്ചുവെന്നും മുഖ്യമന്ത്രി പറഞ്ഞു.

കൂടുതല്‍ പോലീസ് ഉദ്യോഗസ്ഥര്‍ സ്ഥലത്തെത്തി സാഹചര്യങ്ങള്‍ വിലയിരുത്തി. പരിക്കേറ്റ് ചികിത്സയില്‍ കഴിയുന്നവരുടെ ആരോഗ്യനില സംബന്ധിച്ച വിവരങ്ങള്‍ പുറത്തുവന്നിട്ടില്ല. ഇവരില്‍ പലരുടെയും ആരോഗ്യനില ഗുരുതരമാണ്. തിരുമല തിരുപ്പതി ദേവസ്ഥാനങ്ങള്‍ (ടിടിഡി) സംഘടിപ്പിക്കുന്ന വൈകുണ്ഠ ഏകാദശിയും വൈകുണ്ഠ ദ്വാര ദര്‍ശനവും ജനുവരി 10 മുതല്‍ ജനുവരി 19 വരെയാണ് നടക്കുന്നത്. പത്ത് ദിവസത്തെ വൈകുണ്ഠ ദ്വാര ദര്‍ശനത്തിനായി രാജ്യത്തിന്റെ വിവിധ ഭാഗങ്ങളില്‍ നിന്ന് നൂറുകണക്കിന് ഭക്തരാണ് എത്തുന്നത്.