ആര്‍ട് ഓഫ് ലിവിങ്ങിന്റെ ലോക സാംസ്‌ക്കാരിക മേള യമുനാ തീരത്ത് നടത്താന്‍ ഹരിത ട്രൈബ്യൂണലിന്റെ അനുമതി. എന്നാല്‍ അഞ്ചു കോടി രൂപ പിഴ കെട്ടി വയ്ക്കാന്‍ നാഷണല്‍ ഗ്രീന്‍ ട്രൈബ്യൂണല്‍ സംഘാടകരോട് ആവശ്യപ്പെട്ടു. ഡല്‍ഹി പരിസ്ഥിതി നിയന്ത്രണ സമിതിക്കും ഒരു ലക്ഷം രൂപ പിഴയിട്ടു. ഡല്‍ഹി വികസന അതോരിറ്റിക്കും അഞ്ച് ലക്ഷം രൂപ പിഴയുണ്ട്. അനുമതിക്ക് ചട്ടങ്ങള്‍ പാലിച്ചില്ലെന്ന് ട്രൈബ്യൂണല്‍ വ്യക്തമാക്കി.

യമുനയുടെ ആവാസവ്യവസ്ഥ തന്നെ തകര്‍ക്കുന്നതാണ് പരിപാടിയെന്ന് ആരോപണമുയര്‍ന്നിരുന്നു. 35 ലക്ഷത്തോളം ആളുകളെയാണ് പരിപാടിയിലേക്ക് പ്രതീക്ഷിക്കുന്നത്. കുറഞ്ഞത് അഞ്ചു മൊബൈല്‍ ടവറുകളെങ്കിലും സ്ഥാപിക്കേണ്ടിവരും. പരിപാടിയുടെ ഭാഗമായി സൈന്യത്തെ ഉപയോഗിച്ച് യമുനയ്ക്ക് കുറുകെ പാലം പണിയിച്ചതും വിവാദമായിരുന്നു. ഇവിടെ തിക്കിലും തിരക്കിലും അപകടങ്ങളുണ്ടാകാനുള്ള സാധ്യതയുണ്ടെന്നും കരുതുന്നു.

ലോക സാംസ്‌ക്കാരിക മേള വിവാദത്തിലേക്ക് നീങ്ങിയ പശ്ചാത്തലത്തില്‍ പരിപാടിയില്‍ പങ്കെടുക്കാനുള്ള തീരുമാനം രാഷ്ട്രപതി പ്രണബ് മുഖര്‍ജി റദ്ദാക്കിയിട്ടുണ്ട്. സമാപന സമ്മേളനം ഉദ്ഘാടനം ചെയ്യാനാണ് രാഷ്ട്രപതിയെ ക്ഷണിച്ചിരുന്നത്. മേളയുടെ ഉദ്ഘാടനത്തിന് പ്രധാനമന്ത്രി നരേന്ദ്ര മോഡി പങ്കെടുക്കുന്ന കാര്യത്തില്‍ ഇതുവരെ തീരുമാനമൊന്നുമായിട്ടില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha