മധ്യപ്രദേശില്‍ മുന്‍ ആഭ്യന്തര മന്ത്രിയും നിലവിലെ എംഎല്‍എയുമായ ബാല ബച്ചന്റെ മകളടക്കം മൂന്നുപേര്‍ വാഹനാപകടത്തില്‍ ദാരണാന്ത്യം. ഇന്‍ഡോറിലെ തേജാജി നഗര്‍ ബൈപ്പാസിന് സമീപം രാലമണ്ഡല്‍ എന്ന സ്ഥലത്തുവെച്ച് വെള്ളിയാഴ്ച പുലര്‍ച്ചെ അഞ്ചേകാലോടെയാണ് നാടിനെ നടുക്കിയ അപകടം സംഭവിച്ചത്.

സംസ്ഥാന കോണ്‍ഗ്രസ് വക്താവ് ആനന്ദ് കസ്‌ലിവാലിന്റെ മകന്‍ പ്രഖര്‍ കസ്‌ലിവാലിന്റെ ജന്മദിനം ആഘോഷിച്ച ശേഷം വീട്ടിലേക്ക് മടങ്ങുകയായിരുന്നു ഇവര്‍. പ്രഖര്‍ കസ്‌ലിവാലിന്റെ നിയന്ത്രണത്തിലായിരുന്ന കാര്‍, അവിടെ നിര്‍ത്തിയിട്ടിരുന്ന ഒരു ട്രക്കിന്റെ പിന്‍ഭാഗത്തേക്ക് അതിശക്തമായി കൂട്ടിയിടിക്കുകയായിരുന്നു. അപകടത്തില്‍ ബാല ബച്ചന്റെ മകള്‍ പ്രേര്‍ണ ബച്ചന്‍, പ്രഖര്‍ കസ്‌ലിവാല്‍, മന്‍സിന്ദു എന്നീ മൂന്നുപേരും സംഭവസ്ഥലത്തുവെച്ചുതന്നെ മരണപ്പെട്ടു. കാറില്‍ ഉണ്ടായിരുന്ന അനുഷ്‌ക രഥി എന്ന മറ്റൊരു യാത്രക്കാരിക്ക് ഗുരുതരമായി പരിക്കേല്‍ക്കുകയും ഉടന്‍ തന്നെ അടുത്തുള്ള ആശുപത്രിയിലേക്ക് മാറ്റുകയും ചെയ്തു.

നിലവില്‍ അനുഷ്‌ക ചികിത്സയില്‍ തുടരുകയാണ്. സിവില്‍ സര്‍വീസ് പരീക്ഷയ്ക്കുള്ള തയ്യാറെടുപ്പിലായിരുന്നു മരണപ്പെട്ട പ്രേര്‍ണ ബച്ചന്‍.പ്രാഥമിക വിവരങ്ങള്‍ അനുസരിച്ച്, മദ്യലഹരിയിലായിരുന്ന പ്രഖര്‍ കസ്‌ലിവാലിന് വാഹനത്തിന്റെ നിയന്ത്രണം നഷ്ടപ്പെട്ടതാണ് അപകടത്തിലേക്ക് നയിച്ചത്. ശക്തമായ കൂട്ടിയിടിയില്‍ കാറിന്റെ മുന്‍ഭാഗം പൂര്‍ണ്ണമായും തകര്‍ന്നു. സംഭവത്തിന് പിന്നാലെ ട്രക്ക് ഡ്രൈവറെ പോലീസ് കസ്റ്റഡിയിലെടുത്തിട്ടുണ്ട്. തേജാജി നഗര്‍ പോലീസ് കേസെടുത്ത് അപകടത്തെക്കുറിച്ച് വിശദമായ അന്വേഷണം ആരംഭിച്ചിരിക്കുകയാണ്.