ബെംഗളൂരു ഗോവിന്ദപൂരില്‍ സ്വത്ത് വില്‍ക്കുന്നതിന് തുടര്‍ന്ന് നടന്ന തര്‍ക്കത്തില്‍ ജ്യേഷ്ഠന്റെ വീടിന് തീയിടാന്‍ ശ്രമിച്ച അനുജന്റെ ശരീരത്തിലേക്ക് തീ ആളിപ്പടര്‍ന്നു. അപകടത്തില്‍ പൊള്ളലേറ്റ മുനിരാജ് ആശുപത്രിയില്‍ ചികിത്സയിലാണ്. ചൊവ്വാഴ്ച രാത്രിയില്‍ ആയിരുന്നു സംഭവം. മുനിരാജ് ചിട്ടി ബിസിനസ് നടത്തി വരുന്ന വ്യക്തിയായിരുന്നു. എന്നാല്‍ ബിസിനസില്‍ സാമ്പത്തിക നഷ്ടം വന്നതിനെ തുടര്‍ന്ന് കടത്തിലായി. ഈ കടം വീട്ടാനാണ് കുടുംബസ്വത്ത് വില്‍ക്കണമെന്നാവശ്യപ്പെട്ട് മുനിരാജ് സഹോദരന്‍ രാമകൃഷ്ണയെ സമീപിച്ചത്.

എന്നാല്‍ രാമകൃഷ്ണന്‍ ഇതിന് അനുവാദം നല്‍കിയില്ല. ഇതില്‍ കുപിതനായ മുനിരാജ് ചൊവ്വാഴ്ച രാത്രി രാമകൃഷ്ണയുടെ വീട് കത്തിക്കണം എന്ന ഉദ്ദേശത്തോടെ എത്തി വീട് പുറത്തു നിന്ന് പൂട്ടി മുറിയിലേക്ക് പെട്രോള്‍ ഒഴിച്ച തീ കൊളുത്തി.

എന്നാല്‍ ഈ സമയത്തു പെട്രോള്‍ മുനിരാജിന്റെ കയ്യില്‍ തെറിച്ചിരുന്നു. ഇത് അറിയാതെയാണ് തീ കൊളുത്തിയത്. പെട്ടന്ന് തീ മുനിരാജിന്റെ കൈകളിലേക്ക് ആളിപടരുകയും തുടര്‍ന്ന് ശരീരത്തിലേക്ക് പടരുകയുമായിരുന്നു. പെട്ടെന്ന് മുനിരാജ് അലറി വിളിക്കാന്‍ തുടങ്ങി. നിലവിളി കേട്ട് ഓടിയെത്തിയ അയല്‍വാസികള്‍ തീ അണച്ച ശേഷം ആശുപത്രിയിലേക്ക് എത്തിക്കുകയായിരുന്നു.

അപകടത്തില്‍ മുനിരാജിന് ഗുരുതരമായി പൊള്ളലേറ്റിട്ടുണ്ട്. നിലവില്‍ ഹോസ്‌കോട്ടെ സര്‍ക്കാര്‍ ആശുപത്രിയില്‍ ചികിത്സയിലാണ്. സംഭവത്തില്‍ രാമകൃഷ്ണക്കും കുടുംബത്തിനും ഒന്നും പറ്റിയിട്ടില്ലെന്നാണ് പോലീസ് അറിയിച്ചത്. രാമകൃഷ്ണന്റെ വീട്ടിലെ സി.സി.ടി.വിയില്‍ അപകടത്തിന്റെ ദൃശ്യങ്ങള്‍ പതിഞ്ഞിട്ടുണ്ട്. സംഭവത്തില്‍ പൊലീസ് അന്വേഷണം ആരംഭിച്ചു.