കര്‍ണാടകയില്‍ 36കാരന്‍ സ്വന്തം പിതാവിനെ കമ്പിവടികൊണ്ട് തലയ്ക്കടിച്ചു കൊലപ്പെടുത്തി. ചിത്രദുര്‍ഗ ജില്ലയിലെ ഹൊസദുര്‍ഗയിലാണ് നാടിനെ നടുക്കിയ സംഭവം നടന്നത്. കര്‍ഷകനായ സന്നനിഗപ്പ (65) ആണ് കൊല്ലപ്പെട്ടത്. സംഭവത്തില്‍ മകന്‍ നിംഗരാജയെ പോലീസ് അറസ്റ്റ് ചെയ്തു. രാത്രിയില്‍ ഉറങ്ങിക്കിടക്കുകയായിരുന്ന പിതാവിനെ കമ്പി വടി കൊണ്ട് തലയ്ക്കടിക്കുകയായിരുന്നു.

ഗുരുതരമായി പരിക്കേറ്റ സന്നനിഗപ്പയെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. നിംഗരാജയുടെ അലസമായ ജീവിതശൈലിയെ ചൊല്ലി വീട്ടില്‍ നിരന്തരം തര്‍ക്കങ്ങള്‍ നിലനിന്നിരുന്നു. ജോലിക്ക് പോകാത്ത മകനോട് കൃഷിപ്പണിയില്‍ സഹായിക്കാന്‍ പിതാവ് ആവശ്യപ്പെട്ടിരുന്നെങ്കിലും നിംഗരാജ ഇതിന് തയ്യാറായിരുന്നില്ല.

തനിക്ക് വിവാഹപ്രായമായിട്ടും വീട്ടുകാര്‍ പെണ്ണ് ആലോചിക്കുന്നില്ല എന്നതായിരുന്നു നിംഗരാജയുടെ പ്രധാന പരാതി. സന്നനിഗപ്പയ്ക്ക് രണ്ട് ഭാര്യമാരുണ്ടായിരുന്നു. നിങ്ങള്‍ക്ക് രണ്ട് ഭാര്യമാരുണ്ട്, എനിക്ക് ഒന്നുപോലുമില്ല എന്ന് ആക്രോശിച്ചുകൊണ്ടായിരുന്നു ആക്രമണമെന്നാണ് റിപ്പോര്‍ട്ടുകള്‍. നിംഗരാജയുടെ മൂത്ത സഹോദരനാണ് കൊലപാതകവിവരം പോലീസിനെ അറിയിച്ചത്.