സഹോദരന് പണം നല്‍കുന്നതിനെ പറ്റിയുള്ള തര്‍ക്കത്തിനൊടുവില്‍ ഭാര്യയെ കഴുത്തില്‍ ചവിട്ടി കൊലപ്പെടുത്തി ഭര്‍ത്താവ്. 35 വയസുകാരിയായ കാവ്യയാണ് കൊല്ലപ്പെട്ടത്. ഭര്‍ത്താവ് ധാര്യപ്പയെ (45) പൊലീസ് അറസ്റ്റു ചെയ്തു. സംഭവത്തില്‍ വിശദമായ അന്വേഷണം നടത്തിവരികയാണെന്ന് പൊലീസ് അറിയിച്ചു. കര്‍ണാടകയിലെ നാഗസന്ദ്രയിലാണ് സംഭവം.

സഹോദരന് നല്‍കാന്‍ ധാര്യപ്പ ഉദേശിച്ചിരുന്ന രണ്ടു ലക്ഷം രൂപയെ ചൊല്ലിയുണ്ടായ തര്‍ക്കമാണ് കാവ്യയുടെ കൊലപാതകത്തില്‍ കലാശിച്ചത്. തര്‍ക്കം രൂക്ഷമായതോടെ, ധാര്യപ്പ ഭാര്യയെ ആക്രമിക്കുകയും തുടര്‍ന്ന് കഴുത്തില്‍ ചവിട്ടി വീഴ്ത്തുകയുമായിരുന്നു.

മൃതദേഹത്തോടൊപ്പം രണ്ട് മണിക്കൂറോളം വീട്ടിലുണ്ടായിരുന്ന ഇയാള്‍ പിന്നീട് പൊലീസിനെ വിവരമറിയിക്കുകയായിരുന്നു. ദമ്പതികള്‍ക്ക് പത്താം ക്ലാസ്സില്‍ പഠിക്കുന്ന ഒരു മകനും ജൂനിയര്‍ കോളജില്‍ പഠിക്കുന്ന ഒരു മകളുമുണ്ട്. കുട്ടികള്‍ വീട്ടിലില്ലാതിരുന്ന സമയത്താണ് കൊലപാതകം നടന്നതെന്ന് പൊലീസ് പറഞ്ഞു.