എല്‍ഡിഎഫ് സ്ഥാനാര്‍ത്ഥി കെ വി സുമേഷിനായി വോട്ട് അഭ്യര്‍ത്ഥിച്ച് ചലച്ചിത്രതാരം നിഖിലാ വിമല്‍. അഴീക്കോട് കഴിഞ്ഞ തവണയും താന്‍ സുമേഷിനായി വോട്ട് അഭ്യര്‍ത്ഥിച്ചിരുന്നെന്നും ജയിക്കാനായി പ്രാര്‍ത്ഥിച്ചിരുന്നെന്നും നിഖില പറഞ്ഞു. കണ്ണൂരിലെ വികസന പ്രവര്‍ത്തനങ്ങള്‍ ചൂണ്ടിക്കാട്ടിയ നിഖില, ഇത്തവണയും സുമേഷിനെ വിജയിപ്പിക്കണമെന്ന് പറഞ്ഞു. നേരത്തെ തളിപ്പറമ്പിലെ എല്‍ഡിഎഫ് സ്ഥാനാര്‍ത്ഥി പി കെ ശ്യാമളയ്ക്ക് വേണ്ടിയും നിഖില വോട്ട് അഭ്യര്‍ത്ഥിച്ചിരുന്നു.

'അഴീക്കോട് കഴിഞ്ഞ തവണ സുമേഷേട്ടന്‍ മത്സരിച്ചപ്പോള്‍ ഞാന്‍ റോഡ് ജാഥയില്‍ പങ്കെടുത്തിട്ടുണ്ട്. അതും എന്റെ ആദ്യത്തെ റോഡ് ജാഥയില്‍. ആ സമയത്ത് ഞാന്‍ എന്നും പ്രാര്‍ത്ഥിക്കുമായിരുന്നു സുമേഷേട്ടന്‍ ജയിക്കണേ ഇല്ലെങ്കില്‍ നാണക്കേടാകുമല്ലോയെന്ന്. കഴിഞ്ഞതവണത്തെ തുടര്‍ച്ചയായി ഇത്തവണയും സുമേഷേട്ടന് വോട്ട് ചെയ്യണമെന്ന് നിങ്ങളോട് വന്നു പറയാന്‍ സാധിച്ചതില്‍ വലിയ സന്തോഷം. ഇപ്രാവശ്യം ജയിക്കണമെന്നാണ് എന്റെ പ്രാര്‍ത്ഥന. ജില്ലാ പഞ്ചായത്തില്‍ പ്രവര്‍ത്തിക്കുന്ന കാലം തൊട്ട് സുമേഷേട്ടനെ അറിയാം.

പല പരിപാടികളിലും ഒരുമിച്ച് പങ്കെടുത്തിട്ടുണ്ട്. തളിപ്പറമ്പില്‍ താമസിക്കുന്ന എന്നെ സംബന്ധിച്ച് പുതിയ പറമ്പിലെ ബ്ലോക്ക് ഒഴിവാക്കിത്തന്നത് ഏറെ ഉപകാരപ്പെട്ടു. എനിക്ക് മാത്രമല്ല, ഒരുപാട് പേര്‍ക്ക് ഉപകാരപ്പെട്ടു. അതിന് സുമേഷേട്ടന്‍ വലിയ പരിശ്രമം നടത്തിയിട്ടുണ്ട്. കഴിഞ്ഞ പത്ത് വര്‍ഷത്തില്‍ നാട്ടില്‍ ഒരുപാട് വികസനം ഉണ്ടായിട്ടുണ്ട്. നമുക്ക് അറിയാവുന്നവരാണ് അതിന് പിന്നിലെന്നത് അഭിമാനവും സന്തോഷവുമുള്ള കാര്യമാണ്. ഇത്തവണത്തെ ഇലക്ഷനും സുമേഷേട്ടന്‍ വലിയ ഭൂരിപക്ഷത്തോടെ വിജയിക്കട്ടെയെന്ന് ആശംസിക്കുന്നു' നിഖില പറഞ്ഞു.