യുവനടിയുടെ ലൈംഗികാതിക്രമ പരാതിയില് അറസ്റ്റിലായ രഞ്ജിത്തിന്റെ അഭിഭാഷകന് വക്കാലത്തൊഴിഞ്ഞു
യുവനടി നല്കിയ ലൈംഗികാതിക്രമ പരാതിയില് അറസ്റ്റിലായ സംവിധായകന് രഞ്ജിത്തിനു വേണ്ടി ഹാജരായ അഭിഭാഷകന് വക്കാലത്തൊഴിഞ്ഞു. അനാവശ്യമായി വിവാദങ്ങളിലേക്ക് തന്റെ പേര് വലിച്ചിഴയ്ക്കാന് താല്പര്യമില്ലാത്തതിനാലാണ് വക്കാലത്ത് ഒഴിഞ്ഞതെന്ന് അഭിഭാഷകന് പറഞ്ഞു. ലൈംഗികാതിക്രമം നടന്നുവെന്ന് പരാതി ഉയര്ന്ന സിനിമയുടെ ആഭ്യന്തര പരാതി പരിഹാര സമിതി (ഐസിസി) അംഗം കൂടിയായിരുന്ന അഡ്വ. മുഹമ്മദ് സിയാദാണ് വക്കാലത്ത് ഒഴിഞ്ഞത്. ഐസിസി അംഗമായിരുന്ന അഭിഭാഷകന് തന്നെ പ്രതിഭാഗത്തിനു വേണ്ടി ഹാജരായത് വിവാദമായതോടെയാണ് അഭിഭാഷകന്റെ നടപടി.
വക്കാലത്ത് ഒഴിയുന്ന കാര്യം മുഹമ്മദ് സിയാദ് രഞ്ജിത്തിന്റെ കുടുംബത്തെ അറിയിച്ചിട്ടുണ്ട്. ശനിയാഴ്ച എറണാകുളം ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതി കേസ് പരിഗണിക്കുമ്പോള് മറ്റൊരു അഭിഭാഷകനാകും രഞ്ജിത്തിനു വേണ്ടി ഹാജരാകുക. ഇപ്പോള് 14 ദിവസത്തെ ജുഡീഷ്യല് കസ്റ്റഡിയിലുള്ള രഞ്ജിത്തിനെ കസ്റ്റഡിയില് വിട്ടുകിട്ടാന് കേസ് അന്വേഷിക്കുന്ന എസ്ഐടി ആവശ്യപ്പെടും. അന്നു തന്നെ രഞ്ജിത്തിന്റെ ജാമ്യാപേക്ഷയും കോടതി മുമ്പാകെ വരുന്നുണ്ട്.
''സിനിമയുടെ നിര്മാതാവാണ് ഐസിസി രൂപീകരിക്കുന്നത്. ഇങ്ങനെയൊരു കേസ് ഏറ്റെടുക്കുന്ന കാര്യം വന്നപ്പോള് നിര്മാതാവിനെ ഇക്കാര്യം അറിയിക്കുകയും ഐസിസിയില് നിന്ന് രാജിവയ്ക്കുന്ന കാര്യം രേഖാമൂലം തന്നെ നല്കുകയും ചെയ്തു. ഇക്കാര്യം ഫിലിം ചേംബറില് അറിയിക്കണമെന്നും പുതിയ ഒരാളെ ഐസിസിയിലേക്ക് നിയോഗിക്കണമെന്നും ഞാന് ആവശ്യപ്പെട്ടിരുന്നു. രാജി സ്വീകരിച്ചതായി രേഖാമൂലം തന്നെ എനിക്ക് മറുപടി നല്കുകയും ചെയ്തു'', മുഹമ്മദ് സിയാദ് പറഞ്ഞു. മാത്രമല്ല, താന് രഞ്ജിത്തിനു വേണ്ടി ഹാജരായതില് ധാര്മികമായോ നിയമപരമായോ പ്രഫഷണലായോ തെറ്റില്ലെന്നും അദ്ദേഹം പറഞ്ഞു. ''ഐസിസിക്ക് ഇത്തരമൊരു പരാതി ലഭിച്ചിട്ടില്ല. പരാതി ലഭിക്കുകയും അതില് ഇടപെടുകയും ആര്ക്കെങ്കിലും അനുകൂലമായോ പ്രതികൂലമായോ തീരുമാനമെടുക്കുകയും ചെയ്തിരുന്നു എങ്കില് അതില് ധാര്മികപ്രശ്നങ്ങള് ഉണ്ടെന്ന് പറയാമായിരുന്നു. എന്നാല് അതുണ്ടായിട്ടില്ല'', മുഹമ്മദ് സിയാദ് പറഞ്ഞു.
https://www.facebook.com/Malayalivartha
