ശനിയാഴ്ച രാംലീലാ മൈതാനത്ത് സത്യപ്രതിജ്ഞ, അണ്ണാ ഹസാരയേയും കിരണ് ബേദിയേയും ക്ഷണിക്കും
ആം ആദ്മി പാര്ട്ടി അധ്യക്ഷന് അരവിന്ദ് കെജ്രിവാളിന്റെ നേതൃത്വത്തിലുള്ള പതിയ സര്ക്കാര് ശനിയാഴ്ച സത്യപ്രതിജ്ഞ ചെയ്യും. കേജ്രിവാളിനൊപ്പം മന്ത്രിമാരായി ആറു പേരും സത്യപ്രതിജ്ഞചെയ്യും. അണ്ണാ ഹസാരയേയും കിരണ് ബേദിയേയും ചടങ്ങിലേയ്ക്ക് ക്ഷണിക്കുമെന്ന് പാര്ട്ടി നേതാക്കള് അറിയിച്ചു. രാംലീലാ മൈതാനത്ത് ഉച്ചയ്ക്ക് 12നാണ് സത്യപ്രതിജ്ഞ.
ഡല്ഹിയില് സര്ക്കാര് രൂപവത്കരിക്കാനുള്ള ആം ആദ്മി പാര്ട്ടിയുടെ തീരുമാനത്തെ ഇന്നലെ ട്വിറ്റര് വഴി പുറത്തുവിട്ട ഓഡിയോ സന്ദേശത്തില് കെജ്രിവാള് ന്യായീകരിച്ചു. കോണ്ഗ്രസിലെയും ബി.ജെ.പിയിലെയും അഴിമതിക്കാരായ മുന് മന്ത്രിമാര്ക്കെതിരേ അന്വേഷണം നടത്തുമെന്നും അദ്ദേഹം വ്യക്തമാക്കി. അതോടെ, ഡല്ഹിയിലെ കോണ്ഗ്രസ് ആസ്ഥാനത്തു തടിച്ചുകൂടിയ പ്രവര്ത്തകര് കെജ്രിവാളിന്റെ കോലം കത്തിക്കുകയും പ്രതിഷേധപ്രകടനം നടത്തുകയും ചെയ്തു. കഴിഞ്ഞ തെരഞ്ഞെടുപ്പില് തോറ്റ മുന് മുഖ്യമന്ത്രി ഷീലാ ദീക്ഷിതിന്റെ അറിവോടെയായിരുന്നു പ്രവര്ത്തകരുടെ വികാരപ്രകടനമെന്നാണു സൂചന.
അതേസമയം, ആം ആദ്മി പാര്ട്ടിക്കു സര്ക്കാര് രൂപവത്കരിക്കാന് പിന്തുണ നല്കിയതു കോണ്ഗ്രസ് പുനഃപരിശോധിച്ചേക്കുമെന്നു റിപ്പോര്ട്ടുണ്ട്. കോണ്ഗ്രസ് പുറത്തുനിന്നു നല്കുന്ന പിന്തുണയോടെ സര്ക്കാരുണ്ടാക്കാന് തയാറാണെന്നു കെജ്രിവാള് കഴിഞ്ഞ ദിവസം ലഫ്. ഗവര്ണര് നജീബ് ജംഗിനെ കണ്ടു വ്യക്തമാക്കിയിരുന്നു. തുടര്ന്നു ഗവര്ണര് ഇക്കാര്യം രാഷ്ട്രപതിയെ അറിയിച്ചു. ഇന്നലെ രാഷ്ട്രപതിയുടെ അംഗീകാരം ലഭിച്ചതോടെയാണു കെജ്രിവാളിന്റെ നേതൃത്വത്തില് മന്ത്രിസഭയുണ്ടാക്കാന് സാഹചര്യമൊരുങ്ങിയത്.
https://www.facebook.com/Malayalivartha
