ഇനി ഒളിച്ചോടരുത് മോളേ.. ആ അസുഖം ഞാന്‍ തീര്‍ത്തുതരാം പിതാവ് രോഷത്തോടെ പറഞ്ഞ് അത് ചെയ്തു. മറ്റൊരാള്‍ക്കൊപ്പം ഒളിച്ചോടിയ യുവതിയെ ഭാര്യ നോക്കി നില്‍ക്കേ പിതാവ് കഴുത്തില്‍ കുരുക്കിട്ട് കൊന്നു. ലുധിയാനയിലെ ജോധാനില്‍ നടന്ന സംഭവത്തില്‍ 60 കാരന്‍ പാല്‍സിംഗാണ് അറസ്റ്റിലായത്. വിവാഹിതയായ മകള്‍ ഭര്‍ത്താവിനെ ഉപേക്ഷിച്ച് മറ്റൊരാള്‍ക്കൊപ്പം പോയതിന് നാട്ടുക്കൂട്ടം ഇയാളെ അപമാനിച്ചിരുന്നു. ഇതിന് പിന്നാലെയാണ് തന്റെ പദ്ധതി പാല്‍ സിംഗ് നടപ്പാക്കിയത്. 
ജോധാനിലെ സഹോലി ഗ്രാമീണനായ പാല്‍ സിംഗ് ഒരു ഫാക്ടറി ജീവനക്കാരനാണ്. 14 വര്‍ഷം മുമ്പാണ് ഇയാള്‍ മകള്‍ ഹര്‍പ്രീത് കൗറിനെ വിവാഹം കഴിച്ചയച്ചത്. ഇയാളുടെ മരുമകന്‍ ജലന്ധറിലെ കട്ടക്കളത്തിലാണ് ജോലി നോക്കുന്നത്. മകള്‍ ഭര്‍ത്താവിനൊപ്പം ബാസിയാന്‍ ഗ്രാമത്തില്‍ കഴിയുകയായിരുന്നു. ഇതിനിടയില്‍ രണ്ടു ദിവസം മുമ്പ് ബാസിയാനിലെ ഒരു ഗ്രാമീണനൊപ്പം ഹര്‍പ്രീത് ഹീരാന്‍ ഗ്രാമത്തിലെ ബന്ധുവിന്റെ വീട്ടിലേക്ക് ഒളിച്ചോടിയിരുന്നു. വീട്ടുകാര്‍ പാല്‍ സിംഗിനെ വിളിച്ചു വരുത്തിയെങ്കിലും അവര്‍ക്കൊപ്പം പോകാന്‍ ഹര്‍പ്രീത് സമ്മതിച്ചില്ല. 
പിന്നീട് ഭര്‍ത്തൃവീട്ടുകാര്‍ കൂടി ഏറ്റെടുക്കാന്‍ തയ്യാറാകാത്ത സാഹചര്യത്തില്‍ പിതാവ് നിര്‍ബ്ബന്ധിച്ച് മകളെ കൂട്ടിക്കൊണ്ടു വീട്ടിലേക്ക് പോകുകയും ചെയ്തു. വെള്ളിയാഴ്ച പുലര്‍ച്ചെ മൂന്ന് മണിയോടെ മകള്‍ ഉറങ്ങാന്‍ കാത്തിരുന്ന പിതാവ് ഷൂവിന്റെ ചരട് കൊണ്ട് കഴുത്തില്‍ മുറുക്കിയെങ്കിലും കൊല്ലാനായില്ല. തുടര്‍ന്ന് തലപ്പാവ് അഴിച്ചെടുത്ത് അതുപയോഗിച്ച് കൃത്യം പൂര്‍ത്തിയാക്കുകയായിരുന്നു. ഭാര്യയുടെ മുന്നിലിട്ടായിരുന്നു മകളെ കൊലപ്പെടുത്തിയത്. നിശബ്ദമായി ഇരുന്നില്ലെങ്കില്‍ മകളുടെ വിധി തന്നെയുണ്ടാകുമെന്ന് ഭാര്യയെ ഭീഷണിപ്പെടുത്തി. 
കൃത്യം നടത്തിയ ശേഷം കുറ്റവാളി സ്ഥലത്തു നിന്ന് പോയപ്പോള്‍ ഭാര്യ നാട്ടുകാരെ വിവരം അറിയിക്കുകയും അവര്‍ പോലീസിനെ വിളിക്കുകയുമായിരുന്നു. പോലീസ് പിന്നീട് ഷൂ ലേസിലും ടര്‍ബനിലും രക്തത്തുള്ളികള്‍ കണ്ടെത്തി. ഞായറാഴ്ച ഗ്രാമത്തില്‍ നിന്നും രക്ഷപ്പെടാന്‍ ശ്രമിക്കുന്നതിനിടയില്‍ പ്രതി പിടിയിലായി. കൊല്ലപ്പെട്ട സ്ത്രീയ്ക്ക് 12 കാരിയായ ഒരു മകളും 11, എട്ട് വയസ്സുകാരായ രണ്ട് ആണ്‍കുട്ടികളും ഉണ്ട്. ദോഹയിലും ഖത്തറിലുമൊക്കെ കൂലിപ്പണി ചെയ്യുകയാണ് സഹോദരങ്ങള്‍.