കന്നഡ സിനിമയുടെ ചിത്രീകരണത്തിനിടെ തടാകത്തില്‍ കാണാതായ നടന്മാരില്‍ ഒരാളുടെ മൃതദേഹം കണ്ടെത്തി. എന്നാല്‍ ഇതാരുടേതാണെന്നു തിരിച്ചറിയാന്‍ കഴിഞ്ഞിട്ടില്ല. തടാകത്തിന്റെ മധ്യഭാഗത്തായാണ് മൃതദേഹം കണ്ടെത്തിയത്. മൃതദേഹം കരയ്‌ക്കെത്തിക്കാനുള്ള ശ്രമങ്ങള്‍ തുടരുകയാണ്. കാണാതായ രണ്ടാമത്തെയാള്‍ക്കായുള്ള തിരച്ചിലും തുടരുന്നുണ്ട്. ദേശീയ ദുരന്ത നിവാരണ സേനയുടെ 30 പേരടങ്ങിയ സംഘമാണ് തിരച്ചില്‍ നടത്തുന്നത്.
ഇന്നലെ മാസ്തി ഗുഡി എന്ന സിനിമയുടെ ക്ലൈമാക്‌സ് ചിത്രീകരണത്തിനിടെയാണു ദാരുണമായ ഈ സംഭവം ഉണ്ടായത്. ചിത്രീകരണത്തിനിടെ നൂറടി ഉയരത്തില്‍ ഹെലികോപ്റ്ററില്‍നിന്നു ചാടിയ രണ്ടു നടന്മാരെ തടാകത്തില്‍ കാണാതാവുകയായിരുന്നു. വില്ലന്‍, സഹനടന്‍ വേഷങ്ങളില്‍ ശ്രദ്ധേയരായ അനില്‍, ഉദയ് എന്നിവരാണു മുങ്ങിത്താഴ്ന്നത്. ഇവര്‍ക്കു മുന്‍പേ ചാടിയ നായകന്‍ ദുനിയ വിജയ് നീന്തി രക്ഷപ്പെട്ടു.

അതേസമയം, ആവശ്യമായ സുരക്ഷാ മുന്‍കരുതലുകള്‍ എടുക്കാതെയാണ് ചിത്രീകരണം നടത്തിയതെന്നു വ്യക്തമാക്കുന്ന കൂടുതല്‍ വിവരങ്ങള്‍ പുറത്തുവന്നു. നൂറടി ഉയരത്തില്‍ ചാടേണ്ട നടന്മാര്‍ക്ക് ഇതിനുള്ള പരിശീലനം നല്‍കിയിരുന്നില്ല. അപകടമുണ്ടായാല്‍ രക്ഷാപ്രവര്‍ത്തനത്തിനായി ഡീസല്‍ ബോട്ട് തയാറാക്കി നിര്‍ത്തിയിരുന്നെങ്കിലും യന്ത്രത്തകരാര്‍ മൂലം ഇതു പ്രവര്‍ത്തിച്ചില്ല. തുടര്‍ന്ന് കുട്ടവഞ്ചിയിലാണ് രക്ഷാപ്രവര്‍ത്തനത്തിനിറങ്ങിയത്. എന്നാല്‍ ഹെലികോപ്റ്ററിന്റെ കാറ്റുമൂലം നടന്മാരുടെ അടുത്തേക്ക് തുഴഞ്ഞെത്താന്‍ കുട്ടവഞ്ചിക്ക് കഴിഞ്ഞില്ല. വളരെ നേരം കഴിഞ്ഞാണ് നടന്മാര്‍ ചാടിയ സ്ഥലത്തേക്ക് എത്താനായത്. അപ്പോഴേക്കും ഉദയും അനിലും മുങ്ങിത്താഴ്ന്നിരുന്നു.

കന്നഡ സൂപ്പര്‍താരം ശിവരാജ്കുമാറിന്റെ 'ദൊഡ്ഡമനെ ഹുഡുഗ' ഉള്‍പ്പെടെ ഒട്ടേറെ ചിത്രങ്ങളില്‍ വില്ലന്‍ വേഷത്തില്‍ തിളങ്ങിയിട്ടുള്ള നടനാണ് ഉദയ്. ദുനിയ വിജയ് ഫാന്‍സ് അസോസിയേഷന്‍ പ്രസിഡന്റ് കൂടിയാണ് ബോഡി ബില്‍ഡറായ അനില്‍.