ജനപ്രിയ വാഗ്‌ദാനങ്ങളാല്‍ നിറയുമെന്ന പ്രതീക്ഷ സൃഷ്ടിച്ചുകൊണ്ട്‌ കേന്ദ്ര ധനമന്ത്രി പി. ചിദംബരം അടുത്ത സാമ്പത്തിക വര്‍ഷത്തേക്കുള്ള ഇടക്കാല ബഡ്‌ജറ്റ്‌ ഇന്ന്‌ അവതരിപ്പിക്കുന്നു. ലോക്‌സഭാ തിരഞ്ഞെടുപ്പ്‌ മുന്നില്‍ കണ്ടുകൊണ്ട്‌ സാധരണക്കാരണന്‌ ഇഷ്ടപ്പെടുന്ന ചില പ്രഖ്യപനങ്ങള്‍ നടത്തിയേക്കുമെങ്കിലും നിയമ ഭേദഗതി ആവശ്യമുള്ള ആദായ നികുതി ഉള്‍പ്പടെയുള്ള പ്രത്യക്ഷ നിരക്കുകളില്‍ മാറ്റം വരുത്താനിടയില്ല. ഒമ്പതാം ബഡ്‌ജറ്റ്‌ അവതരണാമാണ്‌ ഇന്ന്‌ നടക്കുന്നത്‌. യുപിഎ സര്‍ക്കാരിന്റെ കഴിഞ്ഞ പത്തുവര്‍ഷത്തെ നേട്ടങ്ങള്‍ നിരത്തിയാവും ബഡ്‌ജറ്റ്‌ അവതരണം.
വാഹന വിപണി, നിര്‍മ്മാണ മേഖല എന്നിവയ്‌ക്ക്‌ ഗുണകരമാകുന്ന എക്‌സൈസ്‌ നികുതി ഇളവ്‌, ഭക്ഷ്യ സബ്‌സിഡിക്ക്‌ കൂടുതല്‍ തുക, പ്രതിവര്‍ഷം ഒരു കോടിയിലധികം രൂപ വരുമാനമുള്ളവര്‍ക്ക്‌ കഴിഞ്ഞ ബഡ്‌ജറ്റില്‍ ഏര്‍പ്പെടുത്തിയ 10% സര്‍ചാര്‍ജ്‌ ഇത്തവണയും തുടര്‍ന്നേക്കും. ആകെ 42,800 പേര്‍ക്കാണ്‌ ഇതു ബാധകമായിരുന്നത്‌. പ്രതീക്ഷിക്കുന്ന വാഗ്‌ദാനങ്ങളില്‍ ചിലതാണിതൊക്കെ. ആദായ നികുതി സ്ലാബുകളില്‍ കഴിഞ്ഞ തവണ ചിദംബരം കാര്യമായ മാറ്റം വരുത്തിയിരുന്നില്ല എന്നാല്‍ തിരഞ്ഞെടുപ്പ്‌ മുന്നില്‍ കണ്ട്‌ ഇത്തവണ ചില മാറ്റങ്ങളുണ്ടായേക്കും.
വിലക്കയറ്റം തടയാനുള്ള പ്രഖ്യാപനങ്ങളും ഇടക്കാല ബഡ്‌ജറ്റില്‍ ഉണ്ടാകും. നിലവില്‍ സാമ്പത്തിക വളര്‍ച്ച 5 ശതമാനത്തിലും താഴെയാണ്‌. 2012-13 സാമ്പത്തിക വര്‍ഷത്തില്‍ ദശാബ്ദത്തിലെ ഏറ്റവും മോശം വളര്‍ച്ച നിരക്കായ 4.5 രാജ്യം രേഖപ്പെടുത്തിയിരുന്നു.
തിരഞ്ഞെടുപ്പിനു ശേഷം അധികാരത്തിലെത്തുന്ന സര്‍ക്കാര്‍ ജൂലൈയില്‍ സമ്പൂര്‍ണ്ണ ബഡ്‌ജറ്റ്‌ അവതരിപ്പിക്കുമെന്നതിനാല്‍ മൂന്നോ നാലോ മാസത്തേക്കുള്ള ഭരണ ചെലവിന്‌ തുക വകയിരുത്തിയുള്ള വോട്ട്‌ ഓണ്‍ അക്കൗണ്ടാണ്‌ ധനമന്ത്രി പി. ചിദംബരം അവതരിപ്പിക്കുക.