കല്യാണം കഴിച്ച്‌ കുടുംബജീവിതം നയിക്കാനാവാത്തതിന്റെ പേരില്‍ യുവാവ്‌ സഹോദരി സഹോദരന്മാരുടെ മക്കളായ മൂന്ന്‌ പെണ്‍കുട്ടികളെ തട്ടികൊണ്ടു പോകുകയും തീ വച്ച്‌ കൊലപ്പെടുത്തുകയും ചെയ്‌തു. അതിനുശേഷം യുവാവിനെ കാണ്മാനില്ല. അടുത്തുള്ള നദിയില്‍ ചാടി ആത്മഹത്യ ചെയ്‌തതാണെന്ന്‌ പോലീസ്‌ സംശയിക്കുന്നു.
ആന്ധ്രാപ്രദേശിലെ നിസാമാബാദില്‍ ഒരു വിവാഹ ചടങ്ങിനിടെയായിരുന്നു സംഭവം. ആ സ്ഥലത്തെ കര്‍ഷക പ്രമുഖനായ രഘുപതി റെഡ്ഡിയുടെ കൊച്ചുമകളായ ശ്രീ ( 9 ) . അക്ഷയ ( 6 ) , ഖുഷി ( 4 0 എന്നിവരാണ്‌ കൊല്ലപ്പെട്ടത്‌. രഘുപതി റെഡ്ഡിയുടെ മകനാണ്‌ ഇവരെ തട്ടികൊണ്ടുപോയ നരേന്ദ്രറെഡ്ഡി. കുട്ടികളെ സ്വാധീനിച്ച്‌ പതുക്കെ ആരും കാണാതെ കാറില്‍ കയറ്റി 40 കിലോമീറ്റര്‍ അകലെ കൊണ്ടുപോയി . വിജനമായ സ്ഥലത്തെത്തിയപ്പോള്‍ അവരെ അവിടെ ഇറക്കി പെട്രോളൊഴിച്ച്‌ തീ കത്തിക്കുകയായിരുന്നു. കുട്ടികളെ കാണാതായപ്പോള്‍ അന്വേഷിച്ചിറങ്ങിയ ബന്ധുക്കളെ വിളിച്ച്‌ താന്‍ ആത്മഹത്യ ചെയ്യുകയാണെന്ന്‌ നരേന്ദ്ര വിളിച്ചു പറഞ്ഞു. രഘുനാഥറെഡ്ഡിയുടെ മക്കളെല്ലാം വിവാഹം കഴിച്ച്‌ നല്ലതുപോലെ ജീവിക്കുമ്പോള്‍ തനിക്ക്‌ അതിന്‌ കഴിയാത്തതിന്റെ നിരാശയിലാണ്‌ ഇങ്ങനെ ചെയ്യുന്നതെന്നും അയാള്‍ പറഞ്ഞു.
പോലീസും നാട്ടുകാരും ചേര്‍ന്നു നടത്തിയ അന്വേഷണത്തിലാണ്‌ പാലത്തിനു സമീപം കത്തി കരിഞ്ഞ മൃതദേഹങ്ങള്‍ കണ്ടെത്തിയത്‌. പാലത്തിനു സമീപം നരേന്ദ്രയുടെ ചെരുപ്പും വാച്ചും മറ്റും കാണുകയും ചെയ്‌തു. ഇയാള്‍ നദിയില്‍ ചാടിയതാകാമെന്ന്‌ പോലീസ്‌ സംശയിക്കുന്നു. വിഷാദ രോഗിയായ ഇയാള്‍ കടുത്ത സാമ്പത്തിക ബുദ്ധിമുട്ടിലുമായിരുന്നതായും മുമ്പ്‌ ആത്മഹത്യയ്‌ക്ക്‌ ശ്രമിച്ചിട്ടുണ്ടെന്നും പോലീസ്‌ പറയുന്നു.